મહાભારત · અધ્યાય 12.96

નાધર્મેણ મહીં જેતું લિપ્સેત જગતીપતિઃ ।
અધર્મવિજયં લબ્ધ્વા કો નુ મન્યેત ભૂમિપઃ ॥

અધર્મયુક્તો વિજયો હ્યધ્રુવોઽસ્વર્ગ્ય એવ ચ ।
પાતયત્યેવ રાજાનં મહીં ચ ભરતર્ષભ ॥

વિશીર્ણકવચં ચૈવ તવાસ્મીતિ ચ વાદિનમ્ ।
કૃતાઞ્જલિં ન્યસ્તશસ્ત્રં ગૃહીત્વા ન વિહિંસયેત્ ॥

બલેન વિજિતો યશ્ચ ન તં યુધ્યેત ભૂમિપઃ ।
સંવત્સરં વિપ્રણયેત્તસ્માજ્જાતઃ પુનર્ભવેત્ ॥

નાર્વાક્સંવત્સરાત્કન્યા પ્રષ્ટવ્યા વિક્રમાહૃતા ।
એવમેવ ધનં સર્વં યચ્ચાન્યત્સહસા હૃતમ્ ॥

ન તુ વધ્યે ધનં તિષ્ઠેત્પિબેયુર્બ્રાહ્મણાઃ પયઃ ।
યુઞ્જીરન્નપ્યનડુહઃ ક્ષન્તવ્યં વા પુનર્ભવેત્ ॥

રાજ્ઞા રાજૈવ યોદ્ધવ્યસ્તથા ધર્મો વિધીયતે ।
નાન્યો રાજાનમભ્યસ્યેદરાજન્યઃ કથઞ્ચન ॥

અનીકયોઃ સંહતયોર્યદીયાદ્બ્રાહ્મણોઽન્તરા ।
શાન્તિમિચ્છન્નુભયતો ન યોદ્ધવ્યં તદા ભવેત્ ॥

મર્યાદાં શાશ્વતીં ભિન્દ્યાદ્બ્રાહ્મણં યોઽભિલઙ્ઘયેત્ । અથ ચેલ્લઙ્ઘયેદેવ મર્યાદાં ક્ષત્રિયબ્રુવઃ ।
અસઙ્ખ્યેપતદૂર્ધ્વં સ્યાદનાદેયશ્ચ સંસદિ ॥

યસ્તુ ધર્મવિલોપેન મર્યાદાભેદનેન ચ ।
તાં વૃત્તિં નાનુવર્તેત વિજિગીષુર્મહીપતિઃ ॥

ધર્મલબ્ધાદ્ધિ વિજયાલ્લાભઃ કોઽભ્યધિકો ભવેત્ ॥

સહસા ન્યાય્યભૂતાનિ ક્ષિપ્રમેવ પ્રસાદયેત્ ।
સાન્ત્વેન ભોગદાનેન સ રાજ્ઞાં પરમો નયઃ ॥

ભુજ્યમાના હ્યભોગેન સ્વરાષ્ટ્રાદભિતાપિતાઃ ।
અમિત્રાન્પર્યુપાસીરન્વ્યસનૌઘપ્રતીક્ષિણઃ ॥

અમિત્રોપગ્રહં ચાસ્ય તે કુર્યુઃ ક્ષિપ્રમાપદિ ।
સન્તુષ્ટાઃ સર્વતો રાજન્રાજવ્યસનકાઙ્ક્ષિણઃ ॥

નામિત્રો વિનિકર્તવ્યો નાતિચ્છેદ્યઃ કથઞ્ચન ।
જીવિતં હ્યપ્યતિચ્છિન્નઃ સન્ત્યજેદેકદા નરઃ ॥

અલ્પેનાપિ ચ સંયુક્તસ્તુષ્યતે નાપરાધિતઃ ।
શુદ્ધં જીવિતમેવાપિ તાદૃશો બહુમન્યતે ॥

યસ્ય સ્ફીતો જનપદઃ સમ્પન્નઃ પ્રિયરાજકઃ ।
સન્તુષ્ટભૃત્યસચિવો દૃઢમૂલઃ સ પાર્થિવઃ ॥

ઋત્વિક્પુરોહિતાચાર્યા યે ચાન્યે શ્રુતસત્તમાઃ ।
પૂજાર્હાઃ પૂજિતા યસ્ય સ વૈ લોકવિદુચ્યતે ॥

એતેનૈવ ચ વૃત્તેન મહીં પ્રાપ સુરોત્તમઃ ।
અન્યેઽપિ ચૈવ વિજયં વિજિગીષન્તિ પાર્થિવાઃ ॥

ભૂમિવર્જં ધનં રાજા જિત્વા રાજન્મહાહવે ।
અપિ ચાન્નોષધીઃ શશ્વદાજહાર પ્રતર્દનઃ ॥

અગ્રિહોત્રાગ્નિશેષં ચ હવિર્ભોજનમેવ ચ ।
આજહાર દિવોદાસસ્તતો વિપ્રકૃતોઽભવત્ ॥

સરાજકાનિ રાષ્ટ્રાણિ નાભાગો દક્ષિણાં દદૌ ।
અન્યત્ર શ્રોત્રિયસ્વાચ્ચ તાપસાર્થાચ્ચ ભારત ॥

ઉચ્ચાવચાનિ વિત્તાનિ ધર્મજ્ઞાનાં યુધિષ્ઠિર ।
આસન્રાજ્ઞાં પુરાણાનાં સર્વં તન્મમ રોચતે ॥

સર્વવિદ્યાતિરેકેણ જયમિચ્છેન્મહીપતિઃ ।
ન માયયા ન દમ્ભેન ય ઇચ્છેદ્ભૂતિમાત્મનઃ ॥