Mahabharata · Chapter 12.87

rāṣṭraguptiṃ ca me rājanrāṣṭrasyaiva tu sangraham /
samyagjijñāsamānāya prabrūhi bharatarṣabha //
bhīṣma uvāca /

rāṣṭraguptiṃ ca te samyagrāṣṭrasyaiva tu sangraham /
hanta sarvaṃ pravakṣyāmi tattvamekamanāḥ śṛṇu //

grāmasyādhipatiḥ kāryo daśagrāmapatistathā /
viṃśatitriṃśatīśaṃ ca sahasrasya ca kārayet //

grāmeyāngrāmadoṣāṃśca grāmikaḥ pratibhāveyet /
tānācakṣīta daśine daśiko viṃśine punaḥ //

viṃśādhipastu tatsarvaṃ vṛttaṃ jānapade jane /
grāmāṇāṃ śatapālāya sarvameva nivedayet //

yāni grāmyāṇi bhojyāni grāmikastānyupāśniyā /
daśapastena bhartavyastenāpi dviguṇādhipaḥ //

grāmaṃ grāmaśatādhyakṣo bhoktumarhati satkuraḥ / mahāntaṃ bharataśreṣṭha susphītaṃ janasankulam /
tatra hyanekapāyattaṃ rājño bhavati bhārata //

śākhānagaramarhastu sahasrapatiruttamaḥ /
dhānyahairaṇyabhogena bhoktuṃ rāṣṭrīyasangataḥ //

teṣāṃ sangrāmakṛtyaṃ syādvāmakṛtyaṃ ca teṣu yat /
dharmajñaḥ sacivaḥ kaścittattatpaśyedatandritaḥ //

nagarenagare vā syādekaḥ sarvārthacintakaḥ /
uccaiḥ sthāne ghorarūpo nakṣatrāṇāmiva grahaḥ //

bhavetsa tānparikrāmetsarvāneva sabhāsadaḥ /
teṣāṃ vṛttiṃ pariṇayetkaścidrāṣṭreṣu taccaraḥ //

jighāṃsavaḥ pāpakāmāḥ parasvādāyinaḥ śaṭhāḥ /
rakṣābhyadhikṛtā nāma tebhyo rakṣedimāḥ prajāḥ //

vikrayaṃ krayamadhvānaṃ bhaktaṃ ca saparivyayam /
yogakṣemaṃ ca samprekṣya vaṇijāṃ kārayetkarān //

utpattiṃ dānavṛttiṃ ca śilpaṃ samprekṣya cāsakṛt /
śilpaṃ prati karānevaṃ śilpinaḥ prati kārayet //

uccāvacakaranyāyāḥ pūrvarājñāṃ yudhiṣṭhira /
yathāyathā na sīderaṃstathā kuryānmahīpatiḥ //

phalaṃ karma ca samprekṣya tataḥ sarvaṃ prakalpayet /
phalaṃ karma ca nirhetu na kaścitsampravartate //

yathā rājā ca kartā ca syātāṃ karmaṇi bhāginau /
saṃvekṣya tu tathā rājñā praṇeyāḥ satataṃ karāḥ //

nocchidyāhātmano mūlaṃ pareṣāṃ cāpi tṛṣṇayā /
īhādvārāṇi saṃrudhya rājā saṃvṛtadarśanaḥ //

pradviṣanti parikhyātaṃ rājānamatikhādinam /
pradviṣṭasya kutaḥ śreyo saṃvṛto labhate śriyam //

vatsaupamyena dogdhavyaṃ rāṣṭramakṣīṇabuddhinā /
bhṛto vatso jātabalaḥ ṣīḍāṃ sahati bhārata //

na karma kurute vatso bhṛśaṃ dugdho yudhiṣṭhira /
rāṣṭramapyātidugdhaṃ hi na karma kurute mahat //

yo rāṣṭramanugṛhṇāti parirakṣansvayaṃ nṛpaḥ /
sañjātamupajīvansa labhate sumahatphalam //

āpadarthaṃ ca nicayātrājāno hi cicinvate /
rāṣṭraṃ ca kośabhūtaṃ syātkośo veśmagatastathā //

paurajānapadānsarvānsaṃśritoṣāśritāṃstathā /
yathāśaktyanukampeta sarvānsvalpadhanānapi //

bāhyaṃ janaṃ bhedayitvā bhoktavyo madhyamaḥ sukham /
evaṃ nāsya prakupyanti janāḥ sukhitaduḥ khitāḥ //

prāmeva tu dhanādānamanubhāṣya tataḥ punaḥ /
sannipatya svaviṣaye bhayaṃ rāṣṭre pradarśayet //

iyamāpatsamutpannā paracakrabhayaṃ mahat /
api cāntāya kalpante veṇoriva phalāgamāḥ //

arayo me samutthāya bahubhirdasyubhiḥ saha / idamātmavadhāyaiva rāṣṭramicchanti bādhitum /

asyāmāpadi ghorāyāṃ samprāpte dāruṇe bhaye /
paritrāṇāya bhavataḥ prārthayiṣye dhanāni vaḥ //

pratidāsye ca bhavatāṃ sarvaṃ cāhaṃ bhayakṣaye /
nārayaḥ pratidāsyanti yaddhareyurbalāditaḥ //

kalatramāditaḥ kṛtvā sarvaṃ vo vinaśediti /
śarīraputradārārthamarthasañcaya iṣyate //

nandāmi vaḥ prabhāveṇa putrāṇāmiva codaye /
yakhāśaktyupagṛhṇāmi rāṣṭrasyāpīḍayā ca vaḥ //

āpatsveva nivoḍhavyaṃ bhavadbhiḥ sangatairiha /
na vaḥ priyataraṃ kāryaṃ dhanaṃ kasyāñcidāpadi //

iti vācā madhurayā ślakṣṇayā sopacārayā /
svaraśmīnabhyavasṛjedyogamādhāya kālavit //

pracāraṃ bhṛtyabharaṇaṃ vyayaṃ sangrāmato bhayam /
yogakṣeṇaṃ ca samprekṣya gominaḥ kārayetkaram //

upekṣitā hi naśyeyurgomino'raṇyavāsinaḥ /
tasmātteṣu viśeṣeṇa mṛdupūrvaṃ samācaret //

sāntvanaṃ rakṣaṇaṃ dānamavasthā cāpyabhīkṣṇaśaḥ /
gomināṃ pārtha kartavyaḥ saṃvibhāgaḥ priyāṇi ca //

ajasramupayoktavyaṃ phalaṃ gomiṣu bhārata /
prabhāvayanti rāṣṭraṃ ca vyavahāraṃ kṛṣiṃ tathā //

tasmādgomiṣu yatnena prītiṃ kuryādvicakṣaṇaḥ /
dayāvānapramattaśca karānsampraṇayanmṛdūn //

sarvatra kṣemacaraṇaṃ sulabhaṃ nāma gomiṣu /
na hyataḥ sadṛśaṃ kiñciddhanamasti yudhiṣṭhira //