Mahabharata · Chapter 12.79

kva samarthāḥ kathaṃśīlā ṛtvijaḥ syuḥ pitāmaha /
kathaṃvidhāśca rājendra tadbrūhi vadatāṃ vara //
bhīṣma uvāca /

pratikarmaparā rājanvṛttirasya vidhīyate /
chandaḥ sāmādi vijñāya dvijānāṃ śrutamevaca //

ye tvekaratayo nityaṃ dhīrāśca priyavādinaḥ /
parasparasya suhṛdaḥ samantātsamadarśinaḥ //

ānṛśaṃsyaṃ satyavākyamahiṃsā dama ārjavam /
adroho'nabhimānaśca hrīstitikṣā damaḥ śamaḥ //

yasminnetāni dṛśyante sa purohita ucyate / dhīmānsatyadhṛtirdānto bhūtānāmavihiṃsakaḥ /
akāmadveṣasaṃyuktastribhiḥ śuklaiḥ samanvitaḥ //

ahiṃsako jñānatṛptaḥ sa brahmāsanamarhati /
ete mahartvijastāta sarve mānyā yathārhataḥ //
yudhiṣṭhira uvāca /

yadidaṃ vedavacanaṃ dakṣiṇāsu vidhīyate /
idaṃ deyamidaṃ deyaṃ na kvacivdyavatiṣṭhate //

deyaṃ pratidhanaṃ śāstramāpaddharmā na śāstrataḥ /
ājñā śāstrasya ghore yaṃ na śaktiṃ samavekṣate //

śraddhāmālambya yaṣṭavyamityeṣā vaidikī śrutiḥ /
mithyopetasya yajñasya kimu śraddhā kariṣyati //
bhīṣma uvāca /

na vedānāṃ paribhavānna śāṭhyena na māyayā /
kaścinmahadavāpnoti mā te bhūdbuddhirīdṛśī //

yajñāṅgaṃ dakṣiṇā tāta mantrāṇāṃ paribṛṃhaṇam /
na mantrā dakṣiṇāhīnāstārayanti kathañcana //

śaktistu pūrṇapātreṇa sammitā nāvamā bhavet /
avaśyaṃ tāta yaṣṭavyaṃ tribhirvarṇairthathābalam //

somo rājā brāhmaṇānāmityeṣā vaidikī śrutiḥ /
taṃ ca vikretumicchanti na tathā vṛttiriṣyate //

tena krītena dharmeṇa tato yajñaḥ pratāyate /
ityevaṃ dharmamākhyātamṛṣibhirdharmakovidaiḥ //

pumānyajñaśca somaśca nyāyavṛtto yadā bhavet /
anyāyavṛttaḥ puruṣo na parasya na cātmanaḥ //

śarīraṃ yajñapātrāṇi ityeṣā śrūyate śrutiḥ /
tāni samyakpraṇītāni brāhmaṇānāṃ mahātmanām //

tapo yajñādapi śreṣṭhamityeṣā paramā śrutiḥ /
tatte tapaḥ pravakṣyāmi vidvaṃstadapi me śṛṇu //

ahiṃsā satyavacanamānṛśaṃsyaṃ damo ghṛṇā /
etattapo vidurdhīrā na śarīrasya śoṣaṇam //

aprāmāṇyaṃ ca vedānāṃ śāstrāṇāṃ cātilaṅghanam /
avyavasthā ca sarvatra tadvai nāśanamātmanaḥ //

nibodha daśahotṝṇāṃ vidhānaṃ pārtha yādṛśam / cittiḥ sruk cittamājyaṃ ca pavitraṃ jñānamuttamam /
na śāṭhyaṃ na ca jihyatvaṃ kālo deśaśca te daśa //

sarvaṃ dihnaṃ mṛtyupadamārjavaṃ brahmaṇaḥ padam /
etāvāñjñānaviṣayaḥ kiṃ pralāpaḥ kariṣyati //