Mahabharata · Chapter 12.63

cāturāśramyadharmāśca yatidharmāśca pāṇḍava /
lokavedottarāścaiva kṣātradharme samāhitāḥ //

sarvāṇyetāni karmāṇi kṣātre bharatasattama /
nirāśiṣo jīvalokāḥ kṣatradharme vyavasthite //

apratyakṣaṃ bahuphalaṃ dharmamāśramavāsinām /
prarūpayanti tadbhāvamāgamaireva śāśvatam //

apare vacanaiḥ puṇyairvādino lokaniścaye /
aniścayajñā dharmāṇāmadṛṣṭānte pare ratāḥ //

pratyakṣaṃ phalabhūyiṣṭhamātmasākṣikamacchalam /
sarvalokahitaṃ dharmaṃ kṣatriyeṣu pratiṣṭhitam //

dharmāśrame'dhyavasināṃ brāhmaṇānāṃ yudhiṣṭhira / yathā trayāṇāṃ varṇānāṃ saṃkhyātopaśrutiḥ purā /
rājadharmeṣvanumatā lokāḥ sucaritaiḥ saha //

udāhṛtaṃ te rājendra yathā viṣṇuṃ mahaujasam / sarvabhūteśvaraṃ devaṃ brāhmaṃ nārāyaṇaṃ purā /
jagmuḥ subahuśaḥ śūrā rājāno daṇḍanītaye //

ekaikamātmanaḥ karma tulayitvāśramaṃ purā /
jānaḥ paryupāsanta dṛṣṭāntavacane sthitāḥ //

sādhyā devā vasavaścāśvinau ca rudrāśca viśve marutāṃ gaṇāśca /
sṛṣṭāḥ purā hyādidevena devāḥ kṣātre dharme vartayante ca siddhāḥ //

atra te vartayiṣyāmi dharmamarthaviniścaye /
nirmaryāde vartamāne dānavaikārṇave purā //

babhūva rājā rājendra māndhātā nāma vīryavān /
purā vasumatīpālo yajñaṃ cakre didṛkṣayā //

anādimadhyanidhanaṃ devaṃ nārāyaṇaṃ prabhum /
sa rājā rājaśārdūla māndhātā parameśvaram //

jagāma śirasā pādau yajñe viṣṇormahātmanaḥ /
darśayāmāsa taṃ viṣṇū rūpamāsthāya vāsavam //

sa pārthivairvṛtaḥ sadbhirarcayāmāsa taṃ prabhum / tasya pārthivasaṅghasya tasya caiva mahātmanaḥ /
saṃvādo'yaṃ mahānāsīdviṣṇuṃ prati mahādyutim //
indra uvāca /

kimiṣyase dharmabhūtāṃ variṣṭha yaṃ draṣṭukāmo'si tamaprameyam /
anantamāyāmitamantravīryaṃ nārāyaṇaṃ hyādidevaṃ purāṇam //

nāsau devo viśvarūpo mayā'pi śakyo draṣṭuṃ brahmaṇā vā'pi sākṣāt
ye'nye kāmāstava rājanhṛdisthā dāsye caitāṃstvaṃ hi martyeṣu rājā //

satye sthito dharmaparo jitendriyaḥ śūro dṛḍhaprītirataḥ surāṇām /
buddhyā bhaktyā cottamaḥ śraddhayā ca tataste'haṃ dajhi varānyatheṣṭam //
māndhātovāca /

asaṃśayaṃ bhagavannādidevaṃ vakṣyāmi tvā'haṃ śirasā samprasādya /
tyaktvā kāmāndharmakāmo hyaraṇya micche gantuṃ satpathaṃ sādhujuṣṭam //

kṣātrāddharmādvipulādaprameyā ślokāḥ prāptāḥ sthāpitaṃ svaṃ yaśaśca /
dharmo yo'sāvādidevātpravṛtto lokaśreṣṭhaṃ taṃ na jānāmi kartum //
indra uvāca /

asainikā dharmaparāśca dharme parāṃ gatiṃ na nayante hyayuktam /
kṣātro dharmo hyādidevātpravṛttaḥ paścādanye śeṣabhūtāśca dharmāḥ //

śeṣāḥ sṛṣṭā hyantavanto hyanantāḥ saprasthānāḥ kṣātradharmā viśiṣṭāḥ /
asmindharme sarvadharmāḥ praviṣṭāḥ kṣātraṃ dharmaṃ śreṣṭhatamaṃ vadanti //

karmaṇā vai purā devā ṛṣayaścāmitaujasaḥ /
trātāḥ sarve prasahyārīnkṣatradharmeṇa viṣṇunā //

yadi hyasau bhagavannāhaniṣya dripū sarvānasurānaprameyaḥ /
na ca brahmā naiva lokādikartā santo dharmāścādidharmāśca na syuḥ //

imāmurvī nājayadvikrameṇa devaśreṣṭhaḥ sāsurāmādidevaḥ /
cāturvarṇyaṃ cāturāśramyadharmāḥ sarve na syurbrāhmaṇānāṃ vināśāt //

naṣṭā dharmāḥ śatadhā śāśvatāste kṣātreṇa dharmeṇa punaḥ pravṛddhāḥ /
yugeyuge hyādidharmāḥ pravṛttā lokajyeṣṭhaṃ kṣātradharmaṃ vadanti //

ātmatyāgaḥ sarvabhūtānukampā lokajñānaṃ pālanaṃ mokṣaṇaṃ ca /
viṣaṇṇānāṃ mokṣaṇaṃ pīḍitānāṃ kṣātre dharme vidyate pārthivānām //

nirmaryādāḥ kāmamanyupravṛttā bhītā rājño nādhigacchanti pāpam /
śiṣṭāścānye sarvadharmopapannāḥ sādhvācārāḥ sādhudharmaṃ vadanti //

putravatpālyamānāni dharmaliṅgāni pārthivaiḥ /
loke bhūtāni sarvāṇi carante nātra saṃśayaḥ //

sarvadharmaparaṃ kṣātraṃ lokaśreṣṭhaṃ sanātanam /
śaśvadakṣaraparyantamakṣaraṃ sarvatomukham //