Mahabharata · Chapter 12.62

jyākarṣaṇaṃ śatrunivarhaṇaṃ ca kṛpirvaṇijyā paśupālanaṃ ca /
śuśrūṣaṇaṃ cāpi tathā'rthaheto rakāryametatparamaṃ dvijasya //

sevyaṃ tu brahma ṣaṭ्karma gṛhasthena manīṣiṇā /
kṛtakṛtyasya cāraṇye vāso viprasya śasyate //

rājapreṣyaṃ kṛṣidhanaṃ jīvanaṃ ca vaṇijyayā /
kauṭilyaṃ kaulaṭeyaṃ ca brāhmaṇasya vigarhitam //

śūdro rājanbhavati brahmabandhu rduścāritro yaśca dharmādapetaḥ /
vṛpalīpatiḥ piśuno nartanaśca / grāmapreṣyo yaśca bhavedvikarmā //

evaṃvidho brāhmaṇaḥ kauravendra vṛttāpeto yo bhavenmandacetāḥ /
japanvedānajapaṃścāpi rājan samaḥ śūdrairdāsavaccāpi bhojyaḥ / ete sarve śūdrasamā bhavanti rājannetānvarjayeddevakṛtye //

nirmaryāde vākchaṭhe krūravṛttau / hiṃsākāme tyaktavṛttasvadharmo /
havyaṃ kavyaṃ yāni cānyāni rājan deyānyadeyāni bhavanti tasmin //

tasmāddharmo vihito brāhmaṇasya damaḥ śaucaṃ cārjavaṃ cāpi rājan /
tathā viprasyāśramāḥ sarva eva purā rājanbrahmaṇā sannisṛṣṭāḥ //

yaḥ syāddāntaḥ somapāścāryaśīlaḥ sānukrośaḥ sarvasaho nirāśīḥ /
ṛjurmṛduranṛśaṃsaḥ kṣamāvān sa vai vipro netaraḥ pāpakarmā //

vipraṃ vaiśyaṃ rājaputraṃ ca rājan lokāḥ sarve saṃśritā dharmakāmāḥ /
tasmādvarṇāñjātidharmeṣu saktā ñjetuṃ viṣṇurnecchati pāṇḍuputra //

lokaścāyaṃ sarvalokasya na syā ccāturvarṇyaṃ vedavādāśca na syuḥ /
sarvāścejyāḥ sarvalokakriyāśca sadyaḥ sarve cāśramāścaiva na syuḥ //

yacca trayāṇāṃ varṇānāmicchedāśramasevanam /
kartumāśramadṛṣṭāṃśca dharmāstāñśṛṇu pāṇḍava //

śuśrūṣoḥ kṛtakāryasya kṛtasantānakarmaṇaḥ /
abhyanujñāpya rājānaṃ śūdrasya jagatīpate //

alpāntaragatasyāpi deśadharmagatasya vā /
āśramā vihitāḥ sarve varjayitvā nirāśiṣam //

bhaikṣacaryāṃ nacaivāhustasya taddharmavādinaḥ /
tathā vaiśyasya rājendra rājaputrasya caiva hi //

kṛtakṛtyo vayotīto rājñaḥ kṛtapariśramaḥ /
vaiśyo gacchedanujñāto nṛpeṇāśramasaṃśrayam //

vedānadhītya dharmeṇa rājaśāstrāṇi cānagha /
santānādīni karmāṇi kṛtvā somaṃ niṣevya ca //

pālayitvā prajāḥ sarvā dharmeṇa vadatāṃvara /
rājasūyāśvamedhādīnmakhānanyāṃstathaiva ca //

ānayitvā yathānyāyaṃ viprebhyo dattadakṣiṇaḥ /
sangrāme vijayaṃ prāpya tathā'lpaṃ yadi vā bahu //

sthāpayitvā prajāpālaṃ putraṃ rājye ca pāṇḍava /
anyagotraṃ praśastaṃ vā kṣatriyaṃ kṣatriyarṣabha //

arcayitvā pitṝñśrāddhaiḥ pitṛyajñairyathāvidhi /
devānyajñairṛṣīnvedairarcayitvā tu yatnataḥ //

antakāle ca samprāpte ya icchedāśramāntaram /
sonupūrvyāśramānrājangatvā siddhimavāpnuyāt //

rājarṣitvena rājendra bhaikṣyacaryādyasevayā /
apetagṛhadharmāpi carejjīvitakāmyayā //

na caitannaiṣṭhikaṃ karma trayāṇāṃ bhūridakṣiṇa /
caturṇāṃ rājaśārdūla prāhurāśramavāsinām //

bāhvāyattaṃ kṣatriyairmānavānāṃ lokaśreṣṭhaṃ dharmamāsevamānaiḥ /
sarve dharmāḥ sopadharmāstrayāṇāṃ rājño dharmaṃ nītiśāstre śṛṇomi //

yathā rājanhastipade padāni saṃlīyante sarvasatvodbhavāni /
evaṃ dharmānrājadharmeṣu sarvān sarvāvasthānsampralīnānnibodha //

alpāśrayānalpaphalānvadanti dharmānanyāndharmavido manuṣyāḥ /
mahāśrayaṃ bahukalyāṇarūpaṃ kṣātraṃ dharmaṃ netaraṃ prāhurāryāḥ //

sarve dharmā rājadharmapradhānāḥ sarve varṇāḥ pālyamānā bhavanti /
sarvastyāgo rājadharmeṣu rājaṃ styāgaṃ dharmaṃ cāhuragryaṃ purāṇam //

majjetrayī daṇḍanītau hatāyāṃ sarve dharmāḥ prakṣayeyurviruddhāḥ /
sarve dharmāścāśramāṇāṃ hatāḥ syuḥ kṣātre naṣṭe rājadharme purāṇe //

sarve bhogā rājadharmeṣu dṛṣṭāḥ sarvā dīkṣā rājadharmeṣu coktāḥ /
sarvā vidyā rājadharmeṣu yuktāḥ sarve lokā rājadharme praviṣṭāḥ //

sarve dharmā rājadharmeṣu dṛṣṭāḥ sarve bhogā rājadharmeṣu rājan /
sarve yogā rājadharmeṣu coktāḥ sarve dharmā rājadharme praviṣṭāḥ / tasmāddharmo rājadharmādviśiṣṭo nānyo loke vidyate'jātaśatro //

sarvāṇyetāni karmāṇi kṣātre bharatasattama /
bhavanti jīvalokāśca kṣatradharme pratiṣṭhitāḥ //

yathā jīvāḥ prākṛtairvadhyamānā dharmaśrutīnāmupapīḍanāya /
evaṃ dharmā rājadharmairviyuktāḥ sañcinvanto nādriyante svadharmam //