Mahabharata · Chapter 12.60

āśramāṇāṃ mahābāho śṛṇu satyaparākrama /
caturṇāmapi nāmāni karmāṇi ca yudhiṣṭhira //

vānaprasthaṃ bhaikṣacaryaṃ gārhasthyaṃ ca mahāśramam /
brahmacaryāśramaṃ prāhuścaturthaṃ brahmaṇeritam //

cūḍākaraṇasaṃskāraṃ dvijātitvamavāpya ca /
ādhānādīni karmāṇi prāpya vedānadhītya ca //

sadāro vā'pyadāro vā vinītaḥ saṃyatendriyaḥ /
vānaprasthāśramaṃ gacchetkṛtakṛtyo gṛhāśramāt //

tatrāraṇyakaśāstrāṇi samadhītya sa dharmavit /
ūrdhvaretāḥ prajā hitvā gacchatyakṣarasātmatām //

etānyeva nimittāni munīnāmūrdhvaretasām /
kartavyānīha vipreṇa rājannādau vipaścitā //

caritabrahmacaryasya brāhmaṇasya viśāmpate /
bhaikṣacaryāsvadhīkāraḥ praśasto dehamokṣaṇe //

yatrāstamitaśāyī syānniragniraniketanaḥ /
yathopalabdhajīvī syānmunirdānto jitendriyaḥ //

nirāśīrnirnamaskāro nirbhogo nirvikāravān /
vipraḥ kṣemāśramaṃ prāpto gacchatyakṣarasātmatām //

adhītya vedānkṛtasarvakṛtyaḥ santānamutpādya sukhāni bhuktvā /
samāhitaḥ pracaredduścaraṃ taṃ gārhasthyadharmaṃ munidharmajuṣṭam //

svadāratuṣṭastvṛtukālagāmī niyogasevī na śaṭho na jihnaḥ /
mitāśano devarataḥ kṛtajñaḥ satyo mṛduścānṛśaṃsaḥ kṣamāvān //

dānto vidheyo havyakavyāpramatto hyannasya dātā satataṃ dvijebhyaḥ /
amatsarī sarvaliṅgapradātā vaitānanityaśca gṛhāśramī syāt //

athātra nārāyaṇagītamāhu rmaharṣayastāta mahānubhāvāḥ /
mahārthamatyantatapaḥ prayuktaṃ taducyamānaṃ hi mayā nibodha //

satyārjavaṃ cātithipūjanaṃ ca dharmastathārthaśca ratiḥ svadāraiḥ /
niṣevitavyāni sukhāni loke hyasminpare caiva mataṃ mamaitat //

bharaṇaṃ putradārāṇāṃ vedānāṃ cānupālanam /
sevatāmāśramaṃ śreṣṭhaṃ vadanti paramarṣayaḥ //

evaṃ hi yo brāhmaṇo yajñaśīlo gārhasthyamadhyāvasate yathāvat /
gṛhasthavṛttiṃ pratigāhya samya ksvarge viśuddhaṃ phalamaśnute saḥ //

tasya dehaṃ parityajya iṣṭakāmākṣayā matāḥ /
ānantyāyopakalpante sarvatokṣiśiromukhāḥ //

vasanneko japannekaḥ sarvānvedānyudhiṣṭhira /
ekasminneva cācārye śuśrūṣurmalapaṅkavān //

brahmacārī vratī nityaṃ nityaṃ dīkṣāparo vaśī / gurucchāyānugo nityamadhīyānaḥ suyantritaḥ /
avicālyavratopetaṃ kṛtyaṃ kurvanvasetsadā //

śuśrūṣāṃ satataṃ kurvanguroḥ sampraṇameta ca /
ṣaṭ्karmasvanivṛttaśca na pravṛttaśca sarvaśaḥ //

nācaratyadhikāreṇa seveta dviṣato na ca /
eṣo'śramapadastāta brahmacāriṇa iṣyate //