Mahabharata · Chapter 12.54

athāvravīnmahātejā vākyaṃ kauravanandanaḥ /
hanta dharmānpravakṣyāmi dṛḍhe vāṅbhanasī mama //

tava prasādādgovinda bhūtātmā hyasi śāśvataḥ / yudhiṣṭhirastu dharmātmā māṃ dharmānanupṛcchatu /
evaṃ prīto bhaviṣyāmi dharmānvakṣyāmi cākhilān //

yasminrājarṣabhe jāte dharmātmani mahātmani /
ahṛṣyannṛṣayaḥ sarve sa māṃ pṛcchatu pāṇḍavaḥ //

sarveṣāṃ dīptayaśasāṃ kurūṇāṃ dharmacāriṇām /
yasya nāsti samaḥ kaścitsa māṃ pṛcchatu pāṇḍavaḥ //

dhṛtirdamo brahmacaryaṃ kṣamā dharmaśca nityadā /
yasminnojaśca tejaśca sa māṃ pṛcchatu pāṇḍavaḥ //

sambandhino'tithīnbhṛtyānsaṃśritāṃścaiva yo bhṛśam /
sammānayati satkṛtya sa māṃ pṛcchatu pāṇ़ḍavaḥ //

satyaṃ dānaṃ tapaḥ śauryaṃ śāntirdākṣyamasambhramaḥ /
yasminnetāni sarvāṇi sa māṃ pṛcchatu pāṇḍavaḥ //

yo na kāmānna saṃrambhānna bhayānnārthakāraṇāt /
kuryādadharmaṃ dharmātmā sa māṃ pṛcchatu pāṇḍavaḥ //

satyanityaḥ kṣamānityo jñānanityo'tithipriyaḥ /
yo dadāti satāṃ nityaṃ sa māṃ pṛcchatu pāṇḍavaḥ //

ijyādhyayananityaśca dharme ca nirataḥ sadā /
kṣāntaḥ śrutarahasyaśca sa māṃ pṛcchatu pāṇḍavaḥ //
vāsudeva uvāca /

lajjayā parayopeto dharmarājo yudhiṣṭhiraḥ /
abhiśāpabhayādbhīto bhavantaṃ nopasarpati //

lokasya kadanaṃ kṛtvā lokanātho viśāmpate /
abhiśāpabhayādbhīto bhavantaṃ nopasarpati //

pūjyānmānyāṃśca bhaktāṃśca gurūnsambandhibāndhavān /
arghārhāniṣubhirbhittvā bhavantaṃ nopasarpati //
bhīṣma uvāca /

brāhmaṇānāṃ yathā dharmo dānamadhyayanaṃ tapaḥ /
kṣatriyāṇāṃ tathā kṛṣṇa samare dehapātanam //

pitṝnpitāmahānbhrātṝngurūnsambandhibāndhavān /
mithyāpravṛttānyaḥ sakhye nihanyāddharma eva saḥ //

samayatyāgino lubdhāngurūnapi ca keśava /
nihanti samare pāpānkṣatriyo yaḥ sa dharmavit //

yo lobhānna samīkṣeta dharmasetuṃ sanātanam /
nihanti yastaṃ samare kṣatriyo vai sa dharmavit //

lohitodāṃ keśatṛṇāṃ gajaśailāṃ dhvajadrumām /
mahīṃ karoti yuddheṣu kṣatriyo yaḥ sa dharmavit //

āhūtena raṇe nityaṃ yoddhavyaṃ kṣatrabandhunā /
dharmyaṃ svargyaṃ ca lokyaṃ ca yuddhaṃ hi manurabravīt //
vaiśampāyana uvāca /

evamuktastu bhīṣmeṇa dharmaputro yudhiṣṭhiraḥ /
vinītavadupāgamya tasthai sandarśane'grataḥ //

athāsya pādau jagrāha bhīṣmaścāpi nananda tam /
mūrdhniṃ cainamupāghrāya niṣīdetyabravīttadā //

tamuvācātha gāṅgeyo vṛṣabhaḥ sarvadhanvinām /
māṃ pṛccha tāta visrabdhaṃ mā bhaistvaṃ kurusattama //