Mahabharata · Chapter 12.5

āditkṛtabalaṃ karṇaṃ dṛṣṭvā rājā sa māgadhaḥ /
āhvayaddvairathenājau jarāsandho mahīpatiḥ //

tayoḥ samabhavadyuddhaṃ divyāstraviduṣordvayoḥ /
yudhi nānāpraharaṇairanyonyamabhivarṣatoḥ //

kṣīṇabāṇau vidhanuṣau bhagnakhaṅgau mahīṃ gatau /
bāhubhiḥ samasajjetāmubhāvatibalānvitau //

[bāhukaṇṭakayuddhena tasya karṇo'tha yudhyataḥ.] vibhedaṃ sandhiṃ dehasya jarayā śleṣitasya hi //

sa vikāraṃ śarīrasya dṛṣṭvā nṛpatirātmanaḥ /
prīto'smītyabravītkarṇaṃ vairamutsṛjya dūrataḥ //

prītyā dadau sa karṇāya mālinīṃ nagarīmanu /
aṅgeṣu naraśārdūla sa rājā'sītsapatnajit //

pālayāmāsa varṇāṃstu karṇaḥ parabalārdanaḥ /
duryodhanasyānumate tavāpi viditaṃ tathā //

evaṃ śastrapratāpena prathitaḥ so'bhavatkṣitau /
tvaddhitārthaṃ surendreṇa bhikṣito varmakuṇḍale //

sa divye sahaje prādātkuṇḍale paramārcite /
sahajaṃ kavacaṃ cāpi mohito devamāyayā //

vimuktaḥ kuṇḍalābhyāṃ ca sahajena ca varmaṇā /
nihato vijayenājau vāsudevasya paśyataḥ //

brāhmaṇasyāpi śāpena rāmasya ca mahātmanaḥ /
kuntyāśca varadānena māyayā ca śatakratoḥ //

bhīṣmāvamānātsaṅkhyāyāṃ rathānāmardhakīrtanāt / śalyatejovadhāccāpi vāsudevanayena ca /

rudrasya devarājasya yamasya varuṇasya ca /
kuberadroṇayoścaiva kṛpasya ca mahātmanaḥ //

astrāṇi divyānyādāya yudhi gāṇḍīvadhanvanā /
hato vaikartanaḥ karṇo divākarasamadyutiḥ //

evaṃ śaptastava bhrātā bahubhiścāpi vañcitaḥ /
na śocyaḥ puruṣavyāghra yuddhe hi nidhanaṃ gataḥ //