Mahabharata · Chapter 12.4

karṇastu samavāpyaivamastraṃ bhārgavanandanāt /
duryodhanena sahito mumude bharatarṣabha //

tataḥ kadācidājātaḥ samājagmuḥ svayaṃvare /
kaliṅgaviṣaye rājanrājñaścitrāṅgadasya ca //

śrīmadrājapuraṃ nāma nagaraṃ tatra bhārata /
rājānaḥ śataśastatra kanyārthe samupāgaman //

śrutvā duryodhanastatra sametānsarvapārthivān /
rathena kāñcanāṅgena karṇena sahito yayau //

tataḥ svayaṃvare tasminnānādeśyā mahārathāḥ /
samājagmurnṛpatayaḥ kanyārthe nṛpasattama //

śiśupālo jarāsandho bhīṣmako vakra eva ca /
kapotaromā nīlaśca rukmī ca dṛḍhavikramaḥ //

sṛgālaśca mahārājaḥ strīrājyādhipatiśca yaḥ /
viśokaḥ śatadhanvā ca bhojo vīraśca nāmataḥ //

ete cānye ca bahavo dakṣiṇāṃ diśamāśritāḥ /
mlecchāścāryāśca rājānaḥ prācyodīcyāstathaiva ca //

kāñcanāṅgadinaḥ sarve śuddhajāmbūnadaprabhāḥ /
sarve bhāsvaradehāśca vyāghrā iva balotkaṭāḥ //

tataḥ samupaviṣṭeṣu teṣu rājasu bhārata /
viveśa raṅgaṃ sā kanyā dhātrīvarṣavarānvitā //

tataḥ saṃśrāvyamāṇeṣu rājñāṃ nāmasu bhārata /
atyakrāmaddhārtarāṣṭraṃ sā kanyā varavarṇinī //

duryodhanastu kauravyo nāmarṣayata laṅghanam /
pratyapedhacca tāṃ kanyāmasatkṛtya narādhipān //

sa vīryamadamattatvādbhīṣmadroṇāvupāśritaḥ /
rathamāropya tāṃ kanyāmājuhāva narādhipān //

tamanvagādrathī khaṅgī baddhagodhāṅgulitravān /
karṇaḥ śastrabhṛtāṃ śreṣṭhaḥ pṛṣṭhataḥ puruṣarṣabha //

tato vimardaḥ sumahānrājñāmāsīdyuyutsatām / sannahyatāṃ tanutrāṇi rathānyojayatāmapi /

te'bhyadhāvanta sankruddhāḥ karṇaduryodhanāvubhau /
śaravarṣāṇi muñcanto meghāḥ parvatayoriva //

karṇasteṣāmāpatatāmekaikena śareṇa ha /
dhanūṃṣi ca śaravrātānpātayāmāsa bhūtale //

tato vidhanuṣaḥ kāṃścitkāṃścidudyatakārmukān /
kāṃścidutsṛjato bāṇānrathaśaktigadāstathā //

lāghavāvdyākulīkṛtya karṇaḥ praharatāṃ varaḥ /
hatasūtāṃśca bhūyiṣṭhānsa vijigye narādhipān //

te svayaṃ vāhayanto'śvānyāhi yāhīti vādinaḥ /
vyapeyuste raṇaṃ hitvā rājāno bhagnamānasāḥ //

duryodhanastu karṇena pālyamāno'bhyayāttadā /
hṛṣṭaḥ kanyāmupādāya nagaraṃ nāgasāhvayam //