મહાભારત · અધ્યાય 12.5

આદિત્કૃતબલં કર્ણં દૃષ્ટ્વા રાજા સ માગધઃ ।
આહ્વયદ્દ્વૈરથેનાજૌ જરાસન્ધો મહીપતિઃ ॥

તયોઃ સમભવદ્યુદ્ધં દિવ્યાસ્ત્રવિદુષોર્દ્વયોઃ ।
યુધિ નાનાપ્રહરણૈરન્યોન્યમભિવર્ષતોઃ ॥

ક્ષીણબાણૌ વિધનુષૌ ભગ્નખઙ્ગૌ મહીં ગતૌ ।
બાહુભિઃ સમસજ્જેતામુભાવતિબલાન્વિતૌ ॥

[બાહુકણ્ટકયુદ્ધેન તસ્ય કર્ણોઽથ યુધ્યતઃ.] વિભેદં સન્ધિં દેહસ્ય જરયા શ્લેષિતસ્ય હિ ॥

સ વિકારં શરીરસ્ય દૃષ્ટ્વા નૃપતિરાત્મનઃ ।
પ્રીતોઽસ્મીત્યબ્રવીત્કર્ણં વૈરમુત્સૃજ્ય દૂરતઃ ॥

પ્રીત્યા દદૌ સ કર્ણાય માલિનીં નગરીમનુ ।
અઙ્ગેષુ નરશાર્દૂલ સ રાજાઽસીત્સપત્નજિત્ ॥

પાલયામાસ વર્ણાંસ્તુ કર્ણઃ પરબલાર્દનઃ ।
દુર્યોધનસ્યાનુમતે તવાપિ વિદિતં તથા ॥

એવં શસ્ત્રપ્રતાપેન પ્રથિતઃ સોઽભવત્ક્ષિતૌ ।
ત્વદ્ધિતાર્થં સુરેન્દ્રેણ ભિક્ષિતો વર્મકુણ્ડલે ॥

સ દિવ્યે સહજે પ્રાદાત્કુણ્ડલે પરમાર્ચિતે ।
સહજં કવચં ચાપિ મોહિતો દેવમાયયા ॥

વિમુક્તઃ કુણ્ડલાભ્યાં ચ સહજેન ચ વર્મણા ।
નિહતો વિજયેનાજૌ વાસુદેવસ્ય પશ્યતઃ ॥

બ્રાહ્મણસ્યાપિ શાપેન રામસ્ય ચ મહાત્મનઃ ।
કુન્ત્યાશ્ચ વરદાનેન માયયા ચ શતક્રતોઃ ॥

ભીષ્માવમાનાત્સઙ્ખ્યાયાં રથાનામર્ધકીર્તનાત્ । શલ્યતેજોવધાચ્ચાપિ વાસુદેવનયેન ચ ।

રુદ્રસ્ય દેવરાજસ્ય યમસ્ય વરુણસ્ય ચ ।
કુબેરદ્રોણયોશ્ચૈવ કૃપસ્ય ચ મહાત્મનઃ ॥

અસ્ત્રાણિ દિવ્યાન્યાદાય યુધિ ગાણ્ડીવધન્વના ।
હતો વૈકર્તનઃ કર્ણો દિવાકરસમદ્યુતિઃ ॥

એવં શપ્તસ્તવ ભ્રાતા બહુભિશ્ચાપિ વઞ્ચિતઃ ।
ન શોચ્યઃ પુરુષવ્યાઘ્ર યુદ્ધે હિ નિધનં ગતઃ ॥