Mahabharata · Chapter 12.47

tataḥ sa ca hṛṣīkeśaḥ sa ca rājā yudhiṣṭhiraḥ /
kṛpādayaśca te sarve catvāraḥ pāṇḍavāśca te //

rathaistairnagaraprakhyaiḥ patākādhvajaśobhitaiḥ /
yayurāśu kurukṣetraṃ vājibhiḥ śīghragāmibhiḥ //

te'vatīrya kurukṣetre keśamaḍhajjāsthisankule /
dehanyāsaḥ kṛnto yatra kṣatriyaistairmahārathaiḥ //

gajāśvadehāsthicayaiḥ parvatairiva sañcitam /
naraśīrṣakapālaiśca haṃsairiva ca sarvaśaḥ //

citāsahasrairnicitaṃ varmaśastrasamākulam /
āpānabhūmiṃ kālasya tadā bhuktojjhitāmiva //

bhūtasaṅghānucaritaṃ rakṣogaṇaniṣevitam /
paśyantaste kurukṣetraṃ yayurāśu mahārathāḥ //

gacchanneva mahābāhuḥ sarvaṃ yādavanandanaḥ /
yudhiṣṭhirāya provāca jāmadagnyasya vikramam //

amī rāmahradāḥ pañca dṛśyante pārtha dūrataḥ /
yeṣu santarpayāmāsa pitṝnkṣatriyaśoṇitaiḥ //

triḥsaptakṛtvo vasudhāṃ kṛtvā niḥkṣatriyāṃ prabhuḥ /
ihedānīṃ tato rāmaḥ karmaṇo virarāma ha //
yudhiṣṭhira uvāca /

triḥsaptakṛtvaḥ pṛthivī kṛtā niḥkṣatriyā purā /
rāmeṇeti yadāttha tvamatra me saṃśayo mahān //

kṣatrabījaṃ yathā dagdhaṃ rāmeṇa yadupuṅgava /
kathaṃ bhūyaḥ samutyattiḥ kṣatrasyāmitavikrama //

mahātmanā bhagavatā rāmeṇa yadupuṅgava /
kathamutsādittaṃ kṣatraṃ kathamṛddhigataṃ punaḥ //

mahatā rathayuddhena koṭiśaḥ kṣatriyā hatāḥ /
tathā'bhūcca mahī kīrṇā kṣatriyairvadatāṃ vara //

kimarthaṃ bhārgaveṇedaṃ kṣatramutsāditaṃ purā /
rāmeṇa yaduśārdūla kurukṣetre mahātmanā //

etanme chindhi vārṣṇeya saṃśayaṃ tārkṣyaketana /
āgamo hi paraḥ kṛṣṇa tvatto no vāsavānuja //
vaiśampāyana uvāca /

tato vrajanneva gadāgrajaḥ prabhuḥ śaśaṃsa tasmai nikhilena tattvataḥ /
yudhiṣṭhirāyāpratimaujase tadā yathā'bhavatkṣatriyasankulā mahī //