Mahabharata · Chapter 12.46

śaratalpe śayānastu bharatānāṃ pitāmahaḥ /
kathamutsṛṣṭavāndehaṃ kaṃ ca yogamadhārayat //
vaiśampāyana uvāca /

śṛṇuṣvāvahito rājañśucirbhūtvā samāhitaḥ /
bhīṣmasya kuruśārdūla dehotsargaṃ mahātmanaḥ //

pravṛttamātre tvayanamuttareṇa divākare /
śuklapakṣasya cāṣṭabhyāṃ māghamāsasya pārthiva //

prājāpatye ca nakṣatre madhyaṃ prāpte divākare / samāveśayadātmānamātmatyeva samāhitaḥ //

vikīrṇāṃśurivādityo bhīṣmaḥ śaraśataiścitaḥ /
śuśubhe parayā lakṣmyā vṛto brāhmaṇasattamaiḥ //

vyāsena devaśravasā nāradena surarṣiṇā /
devasthānena vātsyena tathā'śmakasumantunā //

tathā jaimininā caiva pailena ca mahātmanā /
śāṇḍilyadevalābhyāṃ ca maitreyeṇa ca dhīmatā //

asitena vasiṣṭhena kauśikena mahātmanā /
hāritalomaśābhyāṃ ca tathā'treyeṇa dhīmatā //

[bṛhaspatiśca śukraśca cyavanaśca mahāmuniḥ /
sanatkumāraḥ kapilo cālmīkistumburuḥ kuruḥ //

maudgalyo bhārgavo rāmastṛṇabindurmahāmuniḥ /
pippalādo'tha vāyuśca savartaḥ pulahaḥ kacaḥ //

kāśyapaśca pulastyaśca kraturdakṣaḥ parāśaraḥ /
marīciraṅgirāḥ kāśyo gautamo gālavo muniḥ //

dhaumyo vibhāṇḍo māṇḍavyodhaumraḥ kṛṣṇānubhautikaḥ / ulūkaḥ paramo vipro mārkaṇḍeyo mahāmuniḥ /
bhāskariḥ pūraṇaḥ kṛṣṇaḥ sūtaḥ paramadhārmikaḥ //

etaiścānyairmunigaṇairmahābhāgairmahātmabhiḥ /
śraddhādamaśamopetairvṛtaścandra iva grahaiḥ //

bhīṣmastu puruṣavyāghraḥ karmaṇā manasā girā /
śaratalpagataḥ kṛṣṇaṃ pradadhyau prāñjaliḥ śuciḥ //

svareṇa hṛṣṭapuṣṭena tuṣṭāva madhusūdanam / yogeśvaraṃ pajhanābhaṃ viṣṇuṃ jiṣṇuṃ jagatpatim /
anādinidhanaṃ viṣṇumātmayoniṃ sanātanam //

kṛtāñjalipuṭo bhūtvā vāgvidāṃ pravaraḥ prabhuḥ //
bhīṣmaḥ paramadharmātmā vāsudevamathāstuvat //
bhīṣma uvāca /

ārirādhayiṣuḥ kṛṣṇaṃ vācaṃ jigadiṣāmi yām /
tayā vyāsasamāsinyā prīyatāṃ puruṣottamaḥ //

śuciṃ śucipadaṃ haṃsaṃ tatparaṃ parameṣṭhinam /
yuktvā sarvātmanā'tmānaṃ taṃ prapadye prajāpatim //

anādyantaṃ paraṃ brahma na devā narṣayo viduḥ /
eko'yaṃ veda bhagavāndhātā nārāyaṇo hariḥ //

nārāyaṇādṛṣigaṇāstathā siddhamahoragāḥ /
devā devarṣayaścaiva yaṃ vidurduḥkhabheṣajam //

devadānavagandharvā yakṣarākṣasapannagāḥ /
yaṃ na jānanti ko hyeṣa kuto vā bhagavāniti //

yamāhurjagataḥ kośaṃ yasmiṃśca nihitāḥ prajāḥ / yasmim̐llokāḥ sphurantyete jāle śakunayo yathā //

yasminviśvāni bhūtāni tiṣṭhanti ca viśanti ca /
guṇabhūtāni bhūteśe sūtre maṇigaṇā iva //

yaṃ ca viśvasya kartāraṃ jagatastasthuṣāṃ patim vadanti jagato'dhyakṣamadhyātmaparicintakāḥ //

yasminnitye tate tantau dṛḍhe sragiva tiṣṭhati /
sadasadgrathitaṃ viśvaṃ viśvāṅge viśvakarmaṇi //

hariṃ sahasraśirasaṃ sahasracaraṇekṣaṇam /
sahasrabāhumakuṭaṃ sahasravadanojjvalam //

prāhurnārāyaṇaṃ devaṃ yaṃ viśvasya parāyaṇam / aṇīyasāmaṇīyāṃsaṃ sthaviṣṭhaṃ ca sthavīyasām /
garīyasāṃ gariṣṭhaṃ ca śreṣṭhaṃ ca śreyasāmapi //

caṃ vākeṣvanuvākeṣu niṣatsūpaniṣatsu ca /
gṛṇanti satyakarmāṇaṃ satyaṃ satyeṣu sāmasu //

caturbhiścaturātmānaṃ satvasthaṃ sātvatāṃ patim /
yaṃ divyairdevamarcanti guhyaiḥ paramanāmabhiḥ //

[yasminnityaṃ tapastaptaṃ yadaṅgeṣvanutiṣṭhati / sarvātmā sarvavitsarvaḥ sarvajñaḥ sarvabhāvanaḥ // ]

yaṃ devaṃ devakī devī vasudevādajījanat /
bhaumasya brahmaṇo guptyai dīptamagnimivāraṇiḥ //

yamananyo vyapetāśīrātmānaṃ vītakalmaṣam /
iṣṭvānantyāya govindaṃ paśyatyātmānamātmani //

apratarkyamavijñeyaṃ hariṃ nārāyaṇaṃ vibhum / ativāyvindrakarmāṇamatisūryāgnitejasam /
atibuddhīndriyātmānaṃ taṃ prapadye prajāpatim //

purāṇe puruṣaṃ proktaṃ brahmaproktaṃ yugādiṣu /
kṣaye sankarṣaṇaṃ proktaṃ tamupāsyamupāsmahe //

yamekaṃ bahudhātmānaṃ prādurbhūtamadhokṣajam /
nānyabhaktāḥ kriyāvanto yajante sarvakāmadam //

ṛtamekākṣaraṃ brahma yattatsadasataḥ param /
anādimadhyaparyantaṃ na devā narṣayo viduḥ //

yaṃ surāsuragandharvāḥ siddhā ṛṣimahoragāḥ /
prayatā nityamarcanti paramaṃ sukhabheṣajam //

anādinidhanaṃ devamātmayoniṃ sanātanam /
aprekṣyamanabhijñeyaṃ hariṃ nārāyaṇaṃ prabhum //
atha bhīṣmastavarājaḥ //

hiraṇyavarṇaṃ yaṃ garbhamaditirdaityanāśanam /
ekaṃ dvādaśadhā jajñe tasmai sūryātmane namaḥ //

śukle devānpitṝnkṛṣṇe tarpayatyamṛtena yaḥ /
yaśca rājā dvijātīnāṃ tasmai somātmane namaḥ //

hutāśanamukhairdevairdhāryate sakalaṃ jagat / haviḥ prathamabhoktā yastasmai hotrātmane namaḥ //

mahatastamasaḥ pāre puruṣaṃ hyatitejasam /
yaṃ jñātvā mṛtyumatyeti tasmai jñeyātmane namaḥ //

yaṃ bṛhantaṃ bṛhatyukthe yamagnau yaṃ mahādhvare /
yaṃ viprasaṅghā gāyanti tasmai vedātmane namaḥ //

pādāṅgaṃ sandhiparvāṇaṃ svaravyañjanabhūṣitam /
yamāhurakṣaraṃ viprāstasmai vāgātmane namaḥ //

[yajñāṅgo yo varāho vai bhūtvā gāmujjahāraha / lokatrayahitārthāya tasmai vīryātmane namaḥ // ]

ṛgyajuḥsāmadhāmānaṃ daśārdhahavirākṛtim /
yaṃ saptatantuṃ tanvanti tasmai yajñātmane namaḥ //

[caturbhiśca caturbhiśca dvābhyāṃ pañcabhireva ca / hūyate ca punardvābhyāṃ tasmai homātmane namaḥ // ]

yaḥ suparṇo yajurnāma cchandogātrastrivṛcchirāḥ /
rathantarabṛhatpakṣastasmai stotrātmane namaḥ //

yaḥ sahasrasave satre jajñe viśvasṛjāmṛṣiḥ /
hiraṇyapakṣaḥ śakunistasmai tārkṣyātmane namaḥ //

yaścinoti satāṃ setumṛtenāmṛtayoninā /
dharmārthavyavahārāṅgaistasmai satyātmane namaḥ //

yaṃ pṛthagdharmacaraṇāḥ pṛthagdharmaphalaiṣiṇaḥ /
pṛthagdharmaiḥ samarcanti tasmai dharmātmane namaḥ //

[yataḥ sarve prasūyante hyanaṅgātmāṅgadehinaḥ / unmādaḥ sarvabhūtānāṃ tasmai kāmātmane namaḥ // ]

yaṃ taṃ vyaktasthamavyaktaṃ vicinvanti maharṣayaḥ /
kṣetre kṣetrajñamāsīnaṃ tasmai kṣetrātmane namaḥ //

yaṃ dṛgātmānamātmasthaṃ vṛtaṃ ṣoḍaśabhirguṇaiḥ /
prāhuḥ saptadaśaṃsāṅkhyāstasmai sāṅkhyātmane namaḥ //

yaṃ vinidrā jitaśvāsāḥ santuṣṭāḥ saṃyatendriyāḥ /
jyotiḥ paśyanti yuñjānāstasmai yogātmena namaḥ //

apuṇyapuṇyoparame yaṃ punarbhavanirbhayāḥ /
śāntāḥ sannyāsino yānti tasmai mokṣātmane namaḥ //

yasyāgrirāsyaṃ dyaurmūrdhā khaṃ nābhiścaraṇau kṣitiḥ /
sūryaścakṣurdiśaḥ śrotraṃ tasmai lokātmane namaḥ //

yugeṣvāvartate yoṃ'śairmāsartvayanahāyanaiḥ /
sargapralayayoḥ kartā tasmai kālātmane namaḥ //

yo'sau yugasahasrānte pradīptārcirvibhāvasuḥ /
sambhakṣayati bhūtāni tasmai ghorātmane namaḥ //

sambhakṣya sarvabhūtāni kṛtvā caikārṇavaṃ jagat /
bālaḥ svapiti yaścaikastasmai māyātmane namaḥ //

sahasraśirase tasmai puruṣāyāmitātmane /
catuḥsamudrapayasi yoganidrātmane namaḥ //

ajasya nābhāvadhyekaṃ yasminviśvaṃ pratiṣṭhitam /
puṣkaraṃ puṣkarākṣasya tasmai pajhātmane namaḥ //

yasya keśeṣu jīmūtā nadyaḥ sarvāṅgasandhiṣu /
kukṣau samudrāścatvārastasmai toyātmane namaḥ //

yasmātsargāḥ pravartante sargapralayavikriyāḥ /
yasmiṃścaiva pralīyante tasmai hetvātmane namaḥ //

[yo niṣaṇṇo bhavedrātrau divā bhavati viṣṭhitaḥ / iṣṭāniṣṭasya ca draṣṭā tasmai draṣṭrātmane namaḥ // ]

akāryaḥ sarvakāryeṣu dharmakāryārthamudyataḥ /
vaikuṇṭhasya hi tadrūpaṃ tasmai kāryātmane namaḥ //

brahma vaktaṃ bhujau kṣatraṃ kṛtsnamūrūdaraṃ viśaḥ /
pādau yasyāśritāḥ śūdrāstasmaivarṇātmane namaḥ //

annapānendhanamayo rasaprāṇavivardhanaḥ /
yo dhārayati bhūtāni tasmai prāṇātmane namaḥ //

[prāṇānāṃ dhāraṇārthāya yo'nnaṃ bhuṅkte caturvidham / antarbhūtaḥ pacatyagnistasmai pākātmane namaḥ // ]

viṣaye vartamānānāṃ yaṃ taṃ vaiṣayikairguṇaiḥ /
prāhurviṣayagoptāraṃ tasmai goptrātmane namaḥ //

aprameyaśarīrāya sarvato buddhicakṣuṣe /
apāraparimāṇāya tasmai divyātmane namaḥ //

paraḥ kālātparo yajñātparaḥ sadasataśca yaḥ /
anādirādirviśvasya tasmai viśvātmane namaḥ //

vaidyuto jāṭharaścaiva pāvakaḥ śucireva ca /
dahanaḥ sarvabhakṣāṇāṃ tasmai vahnyātmane namaḥ //

rasātalagataḥ śrīmārnananto bhagavānprabhuḥ /
jagaddhārayate yo'sau tasmai śeṣātmane namaḥ //

jvalanārkendutārāṇāṃ jyotiṣāṃ divyamūrtinām /
yastejayati tejāṃsi tasmai tejātmane namaḥ //

ātmajñānamidaṃ jñānaṃ jñātvā pañcasvavasthitam /
yaṃ jñānenādhigacchanti tasmai jñānātmane namaḥ //

sāṅkhyairyogairviniścitya sādhyaiśca paramarṣibhiḥ /
yasya tu jñāyate tatvaṃ tasmai guhyātmane namaḥ //

jaṭine daṇḍine nityaṃ lambodaraśarīriṇe /
kamaṇḍaluniṣaṅgāya tasmai brahmātmane namaḥ //

[śūline tridaśeśāya tryambakāya mahātmane /
bhasmadigdhordhvaliṅgāya tasmā rudrātmane namaḥ //

candrārdhakṛtaśīrṣāya vyālayajñopavītine / pinākaśūlahastāya tasmai ugrātmane namaḥ // ]

yo jāto vasudevena devakyāṃ yadunandanaḥ /
śaṅkhacakragadāpāṇirvāsudevātmane namaḥ //

śiraḥkapālamālāya vyāghracarmanivāsine /
bhasmadigdhaśarīrāya tasmai rudrātmane namaḥ //

yo mohayati bhūtāni sarvapāśānubandhanaiḥ /
sarvasya rakṣaṇārthāya tasmai mohātmane namaḥ //

caitanyaṃ sarvato nityaṃ sarvaprāṇihṛdi sthitam /
sarvātītataraṃ sūkṣmaṃ tasmai sūkṣmātmane namaḥ //

pañcabhūtātmabhūtāya bhūtādinidhanāya ca /
akrodhadrohamohāya tasmai śāntātmane namaḥ //

yasminsarvaṃ yataḥ sarvaṃ yaḥ sarvaṃ sarvataśca yaḥ /
yaśca sarvamayo devastasmai sarvātmane namaḥ //

yaḥ śete kṣīraparyaṅke divyanāgavibhūṣite /
phaṇāsahasraracite tasmai nidrātmane namaḥ //

viśve ca marutaścaiva rudrādityāśvināvapi /
vasavaḥ siddhasādhyāśca tasmai devātmane namaḥ //

avyaktaṃ buddhyahankāro manobuddhīndriyāṇi ca /
tanmātrāṇi viśeṣāśca tasmai tatvātmane namaḥ //

bhūtaṃ bhavyaṃ bhaviṣyacca bhūtādiprabhavāvyayaḥ /
yo'grajaḥ sarvabhūtānāṃ tasmai bhūtātmane namaḥ //

yaṃ hi sūkṣmaṃ vicinvanti paraṃ sūkṣmavido janāḥ /
sūkṣmātsūkṣmaṃ ca yadbrahma tasmai sūkṣmātmane namaḥ //

matsyo bhūtvā viriñcāya yena vedāḥ samāhṛtāḥ /
rasātalagataḥ śīghraṃ tasmai matsyātmane namaḥ //

mandarādrirdhṛto yena prāpte hyamṛtamanthane /
atikarkaśadehāya tasmai kūrmātmane namaḥ //

vārāhaṃ rūpamāsthāya mahīṃ savanaparvatām /
uddharatyekadaṃṣṭreṇa tasmai kroḍātmane namaḥ //

nārasiṃhavapuḥ kṛtvā sarvalokabhayankaram /
hiraṇyakaśipuṃ jaghne tasmai siṃhātmane namaḥ //

piṅgekṣaṇasaṭaṃ yasya rūpaṃ daṃṣṭrānakhairyutam /
dānavendrāntakaraṇaṃ tasmai dṛptātmane namaḥ //

yaṃ na devā na gandharvā na daityā na ca dānavāḥ / tatvato hi vijānanti tasmai sūkṣmātmane namaḥ // ]
vāmanaṃ rūpamāsthāya baliṃ saṃyamya māyayā / trailokyaṃ krāntavānyastu tasmai krāntātmane namaḥ //

jamadagnisuto bhūtvā rāmaḥ śastrabhṛtāṃ varaḥ /
mahīṃ niḥkṣatriyāṃ cakre tasmai rāmātmane namaḥ //

triḥsaptakṛtvo yaścaiko dharme vyutkrāntigauravāt /
jaghāna kṣatriyānsaṅkhye tasmai krodhātmane namaḥ //

[vibhajya pañcadhā'tmānaṃ vāyurbhūtvā śarīragaḥ / yaśceṣṭayati bhūtāni tasmai vāyvātmane namaḥ // ]

rāmo daśirathirbhūtvā pulastyakulanandanam /
jaghāna rāvaṇaṃ saṅkhye tasmai kṣatrātmane namaḥ //

yo halī musalī śrīmānnīlāmbaradharaḥ sthitaḥ /
rāmāya rauhiṇeyāya tasmai bhogātmane namaḥ //

śaṅkhine cakriṇe nityaṃ śārṅgiṇe pītavāsase /
vanamālādharāyaiva tasmai kṛṣṇātmane namaḥ //

vasudevasutaḥ śrīmānkrīḍito nandagokule /
kaṃsasya nidhanārthāya tasmai krīḍātmane namaḥ //

vāsudevatvamāgamya yadorvaṃśasamudbhavaḥ /
bhūbhāraharaṇaṃ cakre tasmai kṛṣṇātmane namaḥ //

sārathyamarjunasyājau kurvangītāmṛtaṃ dadau /
lokatrayopakārāya tasmai brahmātmane namaḥ //

dānavāṃstu vaśe kṛtvā punarbuddhatvamāgataḥ /
sargasya rakṣaṇārthāya tasmai buddhātmane namaḥ //

haniṣyati kalau prāpte mlecchāṃsturagavāhanaḥ /
dharmasaṃsthāpako yastu tasmai kalkyātmane namaḥ //

tārānvaye kālanemiṃ hatvā dānavapuṅgavam /
dadau rājyaṃ mahendrāya tasmai sāṅkhyātmane namaḥ //

yaḥ sarvaprāṇināṃ dehe sākṣibhūto hyavasthitaḥ /
akṣaraḥ kṣaramāṇānāṃ tasmai sākṣyātmane namaḥ //

namostu te mahādeva namaste bhaktavatsala /
subrahmaṇya namaste'stu prasīda parameśvara //

avyaktavyaktarūpeṇa vyāptaṃ sarvaṃ tvayā vibho /
nārāyaṇaṃ sahasrākṣaṃ sarvalokamaheśvaram //

hiraṇyanābha yajñāṅgamamṛtaṃ viśvatomukham /
sarvadā sarvakāryeṣu nāsti teṣāmamaṅgalam //

yeṣāṃ hṛdistho deveśo maṅgalāyatanaṃ hariḥ /
maṅgala bhagavānviṣṇurmaṅgalaṃ madhusūdanaḥ //

maṅgalaṃ puṇ़ḍarīkākṣo maṅgalaṃ garuḍadhvajaḥ /
viśvakarmannamaste'stu viśvātmanviśvasambhava //

apavargasthabhūtānāṃ pañcānāṃ paramāsthita /
namaste triṣu lokeṣu vamaste paratastriṣu //

namaste dikṣu sarvāsu tvaṃ hi sarvaparāyaṇam /
namaste bhagavanviṣṇo tyekānāṃ prabhavāvyaya //

tvaṃ hi kartā hṛṣīkeśaḥ saṃhartā cāparājitaḥ /
tena paśyāmi te divyānbhāvānhi triṣuvartmasu //

tacca paśyāmi tatvena yatte rūpaṃ sanātanam / divaṃ te śirasā vyāptaṃ padbhyāṃ devī vasundharā /
vikrameṇa trayo lokāḥ puruṣo'si sanātanaḥ //

[diśo bhujā raviścakṣurvīrye śukraḥ pratiṣṭhitaḥ / saptamārgā niruddhāste vāyoramitatejasaḥ // ]

vyaktāvyaktasvarūpeṇa vyāptaṃ sarvaṃ tvayā vibho /
avyaktaṃ brāhmaṇaṃ rūpaṃ vyaktametaccarācaram //

atasīpuṣpasankāśaṃ pītavāsasamacyutam /
ye namasyanti govindaṃ na teṣāṃ vidyate bhayam //

[eko'pi kṛṣṇasya kṛtaḥ praṇāmo daśāśvamedhāvabhṛthena tulyaḥ /
daśāśvamedhī punareti janma kṛṣṇapraṇāmī na punarbhavāya //

kṛṣṇavratāḥ kṛṣṇamanusmaranto rātrau ca kṛṣṇaṃ punarutthitā ye /
te kṛṣṇadehāḥ praviśanti kṛṣṇa mājyaṃ yathā mantrahutaṃ hutāśe //

namo narakasantrāsarakṣāmaṇḍalakāriṇe /
saṃsāranimnagāvartatarikāṣṭhāya viṣṇave //

namo brahmaṇyadevāya gobrāhmaṇahitāya ca /
jagaddhitāya kṛṣṇāya govindāya namonamaḥ //

prāṇakāntārapātheyaṃ saṃsārocchedabheṣajam / duḥkhaśokaparitrāṇaṃ harirityakṣaradvayam // ]

nārāyaṇaparaṃ brahma nārāyaṇaparaṃ tapaḥ /
nārāyaṇaparaṃ satyaṃ nārāyaṇaparaṃ param //

yathā viṣṇumayaṃ satyaṃ yathā viṣṇumayaṃ haviḥ /
tathā viṣṇumayaṃ sarvaṃ pāpmā ne naśyatāṃ tathā //

tasya yajñavarāhasya viṣṇoramitatejasaḥ /
praṇāmaṃ ye'pi kurvanti teṣāmapi namonamaḥ //

tvāṃ prapannāya bhaktāya gatimiṣṭāṃ jigīṣave /
yacchreyaḥ puṇḍarīkākṣa taddhyāyasva surottama //

iti vidyātapoyonirayonirviṣṇurīḍitaḥ /
vāgyajñenārcito devaḥ prīyatāṃ me janārdanaḥ //
vaiśampāyana uvāca /

etāvaduktvā vacanaṃ bhīṣmastadratamānasaḥ /
nama ityeva kṛṣṇāya praṇāmamakarottadā //

tasminnuparate vākye tataste brahmavādinaḥ /
bhīṣmaṃ vāgbhirvāṣpagalāstamānarcurmahādyutim //

te'stuvantaśca viprendrāḥ keśavaṃ puruṣottamam /
bhīṣmaṃ ca śanakaiḥ sarve praśaśaṃsuḥ punaḥ punaḥ //

adhigamya tu yogena bhaktiṃ bhīṣmasya mādhavaḥ /
trailokyadarśanaṃ jñānaṃ divyaṃ dattvā yayau hariḥ //

viditvā bhaktiyogaṃ taṃ bhīṣmasya puruṣottamaḥ /
sahasotthāya taṃ hṛṣṭo yānamevānvapadyata //

keśavaḥ sātyakiścaiva rathenakena jagmatuḥ /
apareṇa mahātmānau yudhiṣṭhiradhanañjayau //

bhīmaseno yamau cobhau rathamekaṃ samāsthitāḥ /
kṛpo yuyutsuḥ sūtaśca sañjayaścāparaṃ ratham //

te rathairnagarākāraiḥ prayātāḥ puruṣarṣabhāḥ /
nemighoṣeṇa mahatā kampayante vasundharām //

tato giraḥ puruṣavarastaveritāṃ dvijeritāḥ pathiṣu manāk sa śuśruve /
kṛtāñjaliṃ praṇatamathāparaṃ janaṃ sa keśihā muditamanāsthanandata //

iti smaranpaṭhati ca śārṅgadhanvanaḥ śṛṇotu vā yadukulanandanastavam /
sa cakrabhṛtpratihatasarvākilviṣo janārdanaṃ praviśati dehasankṣaye //

yaṃ yoginaḥ prāṇaviyogakāle yatnena citte viniveśayanti /
sa taṃ purastāddharimīkṣamāṇaḥ prāṇāñjahau prāptaphalo hi bhīṣmaḥ //

svavarājaḥ samāpto'yaṃ viṣṇoradbhutakarmaṇaḥ /
gāṅgeyena purā gīto mahāpātakanāśanaḥ //

imaṃ naraḥ stavarājaṃ mumukṣuḥ paṭhañśuciḥ kaluṣitakalmaṣāpaham /
atītya lokānmalinaḥ samāmatā npadaṃ sa gacchatyamṛtaṃ mahātmanaḥ //