Mahabharata · Chapter 12.45

kimidaṃ paramāścaryaṃ dhyāyasyamitavikrama /
kaccillokatrayasyāsya svasti lokaparāyaṇa //

indriyāṇi manaścaiva buddhau saṃveśitāni te / caturthaṃ dhyānamārgaṃ tvamālambya puruṣarṣabha /
apakrānto yato jīvastena me vismitaṃ manaḥ //

nigṛhīto hi vāyuste pañcakarmā śarīragaḥ /
indriyāṇi ca sarvāṇi manasi sthāpitāni te //

vākca satvaṃ ca govinda buddhau saṃveśitāni te /
sarve caiva guṇā devāḥ kṣetrajñe te niveśitāḥ //

neṅganti tava romāṇi sthirā buddhistathā manaḥ /
kāṣṭhakuḍyaśilābhūto nirīhaścāsi mādhava //

yathā dīpo nivātastho niriṅgo jvalate'cyuta /
tathā'si bhagavandena niścalo yoganiścayāt //

yadi śrotumihārhāmi na rahasyaṃ ca te yadi /
chindhi me saṃśayaṃ deva prapannāyābhiyācate //

tvaṃ hi kartā vikartā ca tvaṃ kṣaraścākṣaraśca ha /
anādinidhano hyādyastvamekaḥ puruṣottama //

tvaṃ prapannāya bhaktāya śirasā praṇatāya ca /
dhyānasyāsya yathātattvaṃ brūhi dharmabhṛtāṃ vara //

tataḥ svagocare nyasya manobuddhīndriyāṇi ca /
smitapūrvamuvācedaṃ bhagavānvāsavānujaḥ //
vāsudeva uvāca /

śaratalpagato bhīṣmaḥ śāmyanniva hutāśanaḥ /
māṃ dhyāti puruṣavyāghrastato me tadgataṃ manaḥ //

yasya jyātalanirghoṣaṃ visphūrjitamivāśaneḥ /
na saheddevarājo'pi tamasmi manasā gataḥ //

yenābhijitya tarasā samastaṃ rājamaṇḍalam /
ūḍhāstisraḥ purā kanyāstamasmi manasā gataḥ //

trayoviṃśatirātraṃ yo yodhayāmāsa bhārgavam /
na ca rāmeṇa nistīrṇastamasmi manasā gataḥ //

yaṃ gaṅgā garbhavidhinā dhārayāmāsa bhāratam /
vasiṣṭhaśiṣyaṃ taṃ tāta gato'smi manasā nṛpa //

divyāsrāṇi mahātejā yo dhārayati buddhimān /
sāṅgāṃśca caturo vedāṃstamasmi manasā gataḥ //

rāmasya dayitaṃ śiṣyaṃ jāmadagnyasya pāṇḍava /
ādhāraṃ sarvravidyānāṃ tamasmi manasā gataḥ //

ekīkṛtyendriyagrāmaṃ manaḥ saṃyamya medhayā / śaraṇaṃ māmupāgacchattato me tadgataṃ manaḥ //

sa hi bhūtaṃ bhaviṣyacca bhavacca bharatarṣabha /
vetti dharmavidāṃ śreṣṭhastamasmi manasā gataḥ //

tasminhi puruṣavyāghre śānte bhīṣme mahātmani /
bhaviṣyati mahī pārtha naṣṭacandreva śarvarī //

tadyudhiṣṭhira gāṅgeyaṃ bhīṣmaṃ bhīmaparākramam /
abhigamyopasangṛhya pṛccha yatte manogatam //

cāturvidyaṃ cāturhotraṃ cāturāśramyameva ca /
rājadharmāṃści nikhilānpṛcchainaṃ pṛthivīpate //

tasminnastamite bhīṣme kauravāṇāṃ dhuṃradhare /
jñānānyalpībhaviṣyanti tasmāttvāṃ codayāmyaham //

tacchrutvā vāsudevasya tathyaṃ vacanamuttamam /
sāśrukaṇṭhaḥ sa dharmajño janārdanamuvāca ha //

yadbhavānāha bhīṣmasya prabhāvaṃ prati mādhava /
tathā tannātra sandeho vidyate mama mādhava //

mahābhāgyaṃ ca bhīṣmasya prabhāvaśca mahādyute /
śrutaṃ mayā kathayatāṃ brāhmaṇānāṃ mahātmanām //

bhavāṃśca kartā lokānāṃ yadbravītyarisūdana /
tathā tadranabhidhyeyaṃ vākyaṃ yādavanandana //

yadi tvanugrahavatī buddhiste mayi mādhava /
tvāmagrataḥ puraskṛtya bhīṣmaṃ yāsyāmahe vayam //

āvṛtte bhagavatyarke sa hi lokāngamiṣyati /
tvaddarśanaṃ mahābāho tasmādarhati kauravaḥ //

tava hyādyasya devasya kṣarasyaivākṣarasya ca /
darśanaṃ tvasya lābhaḥ syāttvaṃ hi brahmamayo nidhiḥ //
vaiśampāyana uvāca /

śrutvaivaṃ dharmarājasya vacanaṃ madhusūdanaḥ /
pārśvasthaṃ sātyakiṃ prāha ratho me yujyatāmiti //

sātyakistvāśu niṣkramya keśavasya samīpataḥ /
dārukaṃ prāha kṛṣṇasya yujyatāṃ ratha ityuta //

sa sātyakerāśu vaco niśamya rathottamaṃ kāñcanabhūṣitāṅgam /
masāragalvarkamayairvibhaṅgai rvibhūṣitaṃ hemanibaddhacakram //

divākarāṃśuprabhamāśugāminaṃ vicitranānāmaṇibhūṣitāntaram /
navoditaṃ sūryamiva pratāpinaṃ vicitratārkṣyadhvajinaṃ patākinam //

sugrīvaśaibyaprapnukhairvarāśvai rmanojavaiḥ kāñcanabhūṣitāṅgaiḥ /
saṃyuktamāvedayadacyutāya kṛtāñjalirdāruko rājasiṃha //