Mahabharata · Chapter 12.44

prāpya rājyaṃ mahābāhurdharmaputro yudhiṣṭhiraḥ /
yadanyadakarodvipra tanme vaktumihārhasi //

bhagavānvā hṛṣīkeśastrailokyasya paro guruḥ /
ṛṣe yadakarodvīrastacca vyākhyātumarhasi //
vaiśampāyana uvāca /

śṛṇu tattvena rājendra kīrtyamānaṃ mayā'nagha /
vāsudevaṃ puraskṛtya yadakurvata pāṇḍavāḥ //

prāpya rājyaṃ mahārāja kuntīputro yudhiṣṭhiraḥ /
varṇānsaṃsthāpayāmāsa nayena vinayena ca //

brāhmaṇānāṃ sahasraṃ ca snātakānāṃ mahātmanām /
sahasraniṣkairekaikaṃ tarpayāmāsa pāṇḍavaḥ //

tathā'nujīvino bhṛtyānsaṃśritānatithīnapi /
kāmaiḥ santarpayāmāsa kṛpaṇāṃstārkikānapi //

purohitāya dhaumyāya prādādayutaśaḥ sa gāḥ /
dhanaṃ suvarṇaṃ rajataṃ vāsāṃsi vividhānyapi //

kṛpāya ca mahārāja pitṛvattamatarpayat /
vidurāya ca rājā'sau pūjāṃ cakre yatavrataḥ //

bhakṣyānnapānairvividhairvāsobhiḥ śayanāsanaiḥ /
sarvānsantopayāmāsa saṃśritāndadatāṃ varaḥ //

labdhapraśamanaṃ kṛtvā sa rājā rājasattama /
yuyutsordhārtarāṣṭrasya pūjāṃ cakre mahāyeśāḥ //

dhṛtarāṣṭrāya tadrājyaṃ gāndhāryai vidurāya ca /
nivedya susthavadrājā sukhamāste yudhiṣṭhiraḥ //

tathā sarvaṃ sa nagaraṃ prasādya bharatarṣabha /
vāsudevaṃ mahātmānamabhyagacchatkṛtāñjaliḥ //

tato mahati paryaṅke maṇikāñcanabhūṣite /
dadarśa kṛṣṇamāsīnaṃ nīlaṃ merāvivāmbudam //

jājvalyamānaṃ vapuṣā divyābharaṇabhūṣitam /
pītakauśeyavasanaṃ hemnevopagata maṇim //

kaustubhenorasisthena maṇinā'bhivirājitam /
udyatevodayaṃ śailaṃ sūryeṇābhivirājitam //

naupamyaṃ vidyate tasya triṣu lokeṣu kiñcana //

so'bhigamya mahātmānaṃ viṣṇuṃ puruṣasattamam /
uvāca madhuraṃ rājā smitapūrvamidaṃ tadā //

sukhena te niśā kaccidvyuṣṭā buddhimatāṃ vara /
kaccijjñānāni sarvāṇi prasannāni tavācyuta //

tathaivopaśritā devī buddhirbuddhimatāṃ vara /
vayaṃ rājyamanuprāptāḥ pṛthivī ca vaśe sthitā //

tava prasādādbhagavaṃstrilokagativikrama /
jayaṃ prāptā yaśaścāgryaṃ na ca dharmacyutā vayam //

taṃ tathā bhāṣamāṇaṃ tu dharmarājamarindamam /
novāca bhagavānkiñciddhyānamevānvapadyata //