મહાભારત · અધ્યાય 12.44

પ્રાપ્ય રાજ્યં મહાબાહુર્ધર્મપુત્રો યુધિષ્ઠિરઃ ।
યદન્યદકરોદ્વિપ્ર તન્મે વક્તુમિહાર્હસિ ॥

ભગવાન્વા હૃષીકેશસ્ત્રૈલોક્યસ્ય પરો ગુરુઃ ।
ઋષે યદકરોદ્વીરસ્તચ્ચ વ્યાખ્યાતુમર્હસિ ॥
વૈશમ્પાયન ઉવાચ ।

શૃણુ તત્ત્વેન રાજેન્દ્ર કીર્ત્યમાનં મયાઽનઘ ।
વાસુદેવં પુરસ્કૃત્ય યદકુર્વત પાણ્ડવાઃ ॥

પ્રાપ્ય રાજ્યં મહારાજ કુન્તીપુત્રો યુધિષ્ઠિરઃ ।
વર્ણાન્સંસ્થાપયામાસ નયેન વિનયેન ચ ॥

બ્રાહ્મણાનાં સહસ્રં ચ સ્નાતકાનાં મહાત્મનામ્ ।
સહસ્રનિષ્કૈરેકૈકં તર્પયામાસ પાણ્ડવઃ ॥

તથાઽનુજીવિનો ભૃત્યાન્સંશ્રિતાનતિથીનપિ ।
કામૈઃ સન્તર્પયામાસ કૃપણાંસ્તાર્કિકાનપિ ॥

પુરોહિતાય ધૌમ્યાય પ્રાદાદયુતશઃ સ ગાઃ ।
ધનં સુવર્ણં રજતં વાસાંસિ વિવિધાન્યપિ ॥

કૃપાય ચ મહારાજ પિતૃવત્તમતર્પયત્ ।
વિદુરાય ચ રાજાઽસૌ પૂજાં ચક્રે યતવ્રતઃ ॥

ભક્ષ્યાન્નપાનૈર્વિવિધૈર્વાસોભિઃ શયનાસનૈઃ ।
સર્વાન્સન્તોપયામાસ સંશ્રિતાન્દદતાં વરઃ ॥

લબ્ધપ્રશમનં કૃત્વા સ રાજા રાજસત્તમ ।
યુયુત્સોર્ધાર્તરાષ્ટ્રસ્ય પૂજાં ચક્રે મહાયેશાઃ ॥

ધૃતરાષ્ટ્રાય તદ્રાજ્યં ગાન્ધાર્યૈ વિદુરાય ચ ।
નિવેદ્ય સુસ્થવદ્રાજા સુખમાસ્તે યુધિષ્ઠિરઃ ॥

તથા સર્વં સ નગરં પ્રસાદ્ય ભરતર્ષભ ।
વાસુદેવં મહાત્માનમભ્યગચ્છત્કૃતાઞ્જલિઃ ॥

તતો મહતિ પર્યઙ્કે મણિકાઞ્ચનભૂષિતે ।
દદર્શ કૃષ્ણમાસીનં નીલં મેરાવિવામ્બુદમ્ ॥

જાજ્વલ્યમાનં વપુષા દિવ્યાભરણભૂષિતમ્ ।
પીતકૌશેયવસનં હેમ્નેવોપગત મણિમ્ ॥

કૌસ્તુભેનોરસિસ્થેન મણિનાઽભિવિરાજિતમ્ ।
ઉદ્યતેવોદયં શૈલં સૂર્યેણાભિવિરાજિતમ્ ॥

નૌપમ્યં વિદ્યતે તસ્ય ત્રિષુ લોકેષુ કિઞ્ચન ॥

સોઽભિગમ્ય મહાત્માનં વિષ્ણું પુરુષસત્તમમ્ ।
ઉવાચ મધુરં રાજા સ્મિતપૂર્વમિદં તદા ॥

સુખેન તે નિશા કચ્ચિદ્વ્યુષ્ટા બુદ્ધિમતાં વર ।
કચ્ચિજ્જ્ઞાનાનિ સર્વાણિ પ્રસન્નાનિ તવાચ્યુત ॥

તથૈવોપશ્રિતા દેવી બુદ્ધિર્બુદ્ધિમતાં વર ।
વયં રાજ્યમનુપ્રાપ્તાઃ પૃથિવી ચ વશે સ્થિતા ॥

તવ પ્રસાદાદ્ભગવંસ્ત્રિલોકગતિવિક્રમ ।
જયં પ્રાપ્તા યશશ્ચાગ્ર્યં ન ચ ધર્મચ્યુતા વયમ્ ॥

તં તથા ભાષમાણં તુ ધર્મરાજમરિન્દમમ્ ।
નોવાચ ભગવાન્કિઞ્ચિદ્ધ્યાનમેવાન્વપદ્યત ॥