Mahabharata · Chapter 12.43

tato visarjayāmāsa sarvāstāḥ prakṛtīrnṛpaḥ /
viviśuścābhyanujñātā yathāsvāni gṛhāṇi te //

tato yudhiṣṭhiro rājā bhīmaṃ bhīmaparākramam /
sāntvayannabravīcchrīmānarjunaṃ yamajau tathā //

śatrubhirvividhaiḥ śastraiḥ kṣatadehā mahāraṇe /
śrāntā bhavantaḥ subhṛśaṃ tāpitāḥ śokamanyubhiḥ //

araṇye duḥkhavasatirmatkṛte bharatarṣabhāḥ /
bhavadbhiranubhūtā hi yathā kāpuruṣaistathā //

yathāsukhaṃ yathājoṣaṃ jayo'yamanubhūyatām /
viśrāntām̐llabdhaviśvāsāñśvaḥ sametā'smi vaḥ punaḥ //

tato duryodhanagṛhaṃ prāsādairupaśobhitam /
bahuratnasamākīrṇaṃ dāsīdāsasamākulam //

dhṛtarāṣṭrābhyanujñātaṃ bhrātrā dattaṃ vṛkodaraḥ /
pratipede mahābāhurmandiraṃ maghavāniva //

yathā duryodhanagṛhaṃ tathā duḥśāsanasya tu /
prāsādabhālāsaṃyuktaṃ hematoraṇabhūṣitam //

dāsīdāsasusampūrṇaṃ prabhūtadhanadhānyavat /
pratipede mahābāhurarjuno rājaśāsanāt //

durmarṣaṇasya bhavanaṃ duḥśāsanagṛhādvaram /
kuberabhavanaprakhyaṃ maṇihemavibhūṣitam //

nakulāya varārhāya karśitāya mahāvane /
dadau prīto mahārāja dharmaputro yudhiṣṭhiraḥ //

durmukhasya ca veśmāgryaṃ śrīmatkanakabhūṣaṇam /
pūrṇapajhadalākṣīṇāṃ strīṇāṃ śayanasankulam //

pradadau sahadevāya santataṃ priyakāriṇe /
mumude tacca labdhvā'sau kailāsaṃ dhanado yathā //

yuyutsurviduraścaiva sañjayaśca viśāmpate /
sudharmā caiva dhaumyaśca yathā svāñjagmurālayān //

saha sātyakinā śaurirarjunasya niveśanam /
viveśa puruṣavyāghro vyāghro giriguhāmiva //

tatra bhakṣyānnapānaiste muditāḥ susukhoṣitāḥ /
sukhaprabaddhā rājānamupatasthuryudhiṣṭhiram //