Mahabharata · Chapter 12.40

prakṛtīnāṃ ca tadvākyaṃ deśakālopabṛṃhitam /
śrutvā yudhiṣṭhiro rājā'thottaraṃ pratyabhāṣata //

dhanyāḥ pāṇḍusutā nūnaṃ yeṣāṃ brāhmaṇapuṅgavāḥ /
tathyānvāpyathavā'tathyānguṇānāhuḥ samāgatāḥ //

anugrāhyā vayaṃ nūnaṃ bhavatāmiti me matiḥ /
yadevaṃ guṇasampannānasmānbrūtha vimatsarāḥ //

dhṛtarāṣṭro mahārājaḥ pitā no daivataṃ param /
śāsane'sya priye caiva stheyaṃ matpriyakāṅkṣibhiḥ //

etadarthaṃ hi jīvāmi kṛtvā jñātivadhaṃ mahat /
asya śuśrūṣaṇaṃ kāryaṃ mayā nityamatandriṇā //

yadi cāhamanugrāhyo bhavatāṃ suhṛdāṃ tathā /
dhṛtarā yathāpūrvaṃ vṛttiṃ vartitumarhatha //

eṣa nātho hi jagato bhavatāṃ ca mayā saha /
asya prasāde pṛthivī pāṇḍavāḥ sarva eva ca //

etanmanasi kartavyaṃ bhavadbhirvacanaṃ mama /
anujñāpyātha tānrājā yatheṣṭaṃ gamyatāmiti //

paurajānapadānsarvānvisṛjya kurunandanaḥ /
yauvarājyena kaunteyaṃ bhīmasenamayojayat //

mantre ca niścaye caiva ṣāṅguṇyasya ca cintane /
viduraṃ buddhisampannaṃ prītimānsa samādiśat //

kṛtākṛtaparijñāne tathā'yavyayacintane /
sañjayaṃ yojayāmāsa vṛddhaṃ sarvaguṇairyutam //

balasya parimāṇe ca bhaktavetanayostathā /
nakulaṃ vyādiśadrājā karmaṇāṃ cānvavekṣaṇe //

paracakroparodhe ca dṛptānāṃ cāvamardane /
yudhiṣṭhiro mahārāja phalgunaṃ vyādideśa ha //

dvijānāṃ devakāryeṣu kāryeṣvanyeṣu caiva ha /
dhaumyaṃ purodhasāṃ śreṣṭhaṃ nityameva samādiśat //

sahadevaṃ samīpasthaṃ nityameva samādiśat /
tane gopyo hi nṛpatiḥ sarvāvastho viśāmpate //

yānyānamanyadyogyāṃśca yeṣu yeṣviha karmasu /
tāṃstāṃsteṣveva yuyuje prīyamāṇo mahīpatiḥ //

viduraṃ sañjayaṃ caiva yuyutsuṃ ca mahāmatim /
abravītparavīraghno dharmātmā dharmavatsalaḥ //

utthāyotthāya tatkāryamasya rājñaḥ piturmama /
sarvaṃ bhavadbhiḥ kartavyamapramattairyathā mama //

paurajānapadānāṃ ca yāni kāryāṇi nityaśaḥ /
rājānaṃ samanujñāpya tāni kāryāṇi dharmataḥ //