Mahabharata · Chapter 12.41

tato yudhiṣṭhiro rājā jñātīnāṃ ye hatā yudhi /
śrāddhāni kārayāmāsa teṣāṃ pṛthagudāradhīḥ //

dhṛtarāṣṭro dadau rājā putrāṇāmaurdhvadehikam / sarvakāmaguṇopetamannaṃ gāśca dhanāni ca /
ratnāni ca vicitrāṇi mahārhāṇi mahāyaśāḥ //

yudhiṣṭhirastu droṇasya karṇasya ca mahātmanaḥ /
dhṛṣṭadyumnābhimanyubhyāṃ heḍimbasya ca rakṣasaḥ //

virāṭaprabhṛtīnāṃ ca suhṛdāmupakāriṇām /
drupadadraupadeyānāṃ draupadyā sahito dadau //

brāhmaṇānāṃ sahasrāṇi pṛthagekaikamuddiśan /
dhanai ratnaiśca gobhiśca vastraiśca samatarpayat //

ye cānye pṛthivīpālā yeṣāṃ nāsti suhṛjjanaḥ /
uddiśyoddiśya teṣāṃ ca cakre rājaurdhvadehikam //

sabhāḥ prapāśca vividhāstaṭākāni ca pāṇḍavaḥ /
suhṛdāṃ kārayāmāsa sarveṣāmaurdhvadehikam //

sa teṣāmanṛṇo bhūtvā gatvā lokeṣvavācyatām /
kṛtakṛtyo'bhavadrājā prajā dharmeṇa pālayan //

dhṛtarāṣṭraṃ yathāpūrvaṃ gāndhārīṃ viduraṃ tathā /
sarvāṃśca kauravānmānyānbhṛtyāṃśca samapūjayat //

yāśca tatra striyaḥ kāściddhatavīrā hatātmajāḥ //
sarvāstāḥ kauravo rājā sampūjyāpālāyaddhṛṇī //

dīnāndhakṛpaṇānāṃ ca gṛhācchādanabhojanaiḥ /
ānṛśaṃsyaparo rājā cakārānugrahaṃ prabhuḥ //

sa vijitya mahīṃ kṛtsnāmānṛṇyaṃ prāpya vairiṣu /
niḥsapatnaḥ sukhī rājā vijahāra yudhiṣṭhiraḥ //