Mahabharata · Chapter 12.39

tataḥ kuntīsuto rājā gatamanyurgatajvaraḥ /
kāñcane prāḍbhukho hṛṣṭo nyaṣīdatparamāsane //

tamevābhimukhau pīṭhe pradīpte kāñcane śubhe /
sātyakirvāsudevaśca niṣīdaturarindamau //

madhye kṛtvā tu rājānaṃ bhīmasenārjunāvubhau /
niṣīdaturmahātmānau ślakṣṇayormaṇipīṭhayoḥ //

dānte śayyāsane śubhre jāmbūnadavibhūṣite /
pṛthā'pi sahadevena sahāste nakulena ca //

sudharmā viduro dhaumyo dhṛtarāṣṭraśca kauravaḥ /
niṣedurjvalanākāreṣvāsaneṣu pṛthakpṛthak //

yuyutsuḥ sañjayaścaiva gāndhārī ca yaśasvinī /
dhṛtarāṣṭro yato rājā tataḥ sarve samāviśan //

tatropaviṣṭo dharmātmā śvetāḥ sumanaso'spṛśat /
svastikānakṣatānbhūmiṃ suvarṇaṃ rajataṃ maṇīn //

tataḥ prakṛtayaḥ sarvāḥ puraskṛtya purohitam /
dadṛśurdharmarājānamādāya bahumaṅgalam //

pṛthivīṃ ca suvarṇaṃ ca ratnāni vividhāni ca /
ābhiṣecanikaṃ bhāṇḍaṃ sarvasambhārasambhṛtam //

kāñcanaudumbarāstatra rājatāḥ pṛthivīmayāḥ /
pūrṇakumbhāḥ sumanaso lājā barhīṣi gorasāḥ //

śamīpippalapālāśasamidho madhusarpiṣī /
sruva audumbaraḥ śaṅkhastathā hemavibhūṣitaḥ //

dāśārheṇābhyanujñātastatra dhaumyaḥ purohitaḥ /
prāgudakpravaṇe vedīṃ lakṣaṇenopalikhya ca //

vyāghracarmottare śukle sarvatobhadra āsane /
dṛḍhapādapratiṣṭhāne hutāśanasamatvipi //

upaveśya mahātmānaṃ kṛṣṇāṃ ca drupadātmajām /
juhāva pāvakaṃ dhīmānvidhimantrapuraskṛtam //

tata utthāya dāśārhaḥ śaṅkhamādāya pūritam / abhyaṣiñcatpatiṃ pṛthvyāḥ kuntīputraṃ yudhiṣṭhiram /
dhṛtarāṣṭraśca rājarṣiḥ sarvāḥ prakṛtayastathā //

anujñāto'tha kṛṣṇena bhrātṛbhiḥ saha pāṇḍavaḥ /
pāñcajanyābhiṣiktaśca rājā'mṛtamukho'bhavat //

tato'nuvādayāmāsuḥ paṇavānakadundubhīn //

dharmarājo'pi tatsarvaṃ pratijagrāha dharmataḥ /
pūjayāmāsa tāṃścāpi vidhivadbhūridakṣiṇaḥ //

tato niṣkasahasreṇa brāhmaṇānsvastyavācayan /
vedādhyayanasampannāndhṛtiśīlasamanvitān //

te prītā brāhmaṇā rājansvastyūcurjayameva ca /
haṃsā iva ca nardantaḥ praśaśaṃsuryudhiṣṭhiram //

yudhiṣṭhira mahābāho diṣṭyā jayasi pāṇḍava /
diṣṭyā svadharmaṃ prāpto'si vikrameṇa mahādyute //

diṣṭyā gāṇḍīvadhanvā ca bhīmasenaśca pāṇḍavaḥ /
tvaṃ cāpi kuśalī rājanmādrīputrau ca pāṇḍavau //

muktā vīrakṣayāttasmātsangrāmādvijitadviṣaḥ /
kṣipramuttarakāryāṇi kuru sarvāṇi bhārata //

tataḥ prītyā'rcitaḥ sadbhirdharmarājo yudhiṣṭhiraḥ /
pratipede mahadrājyaṃ suhṛdbhiḥ saha bhārata //