મહાભારત · અધ્યાય 12.40

પ્રકૃતીનાં ચ તદ્વાક્યં દેશકાલોપબૃંહિતમ્ ।
શ્રુત્વા યુધિષ્ઠિરો રાજાઽથોત્તરં પ્રત્યભાષત ॥

ધન્યાઃ પાણ્ડુસુતા નૂનં યેષાં બ્રાહ્મણપુઙ્ગવાઃ ।
તથ્યાન્વાપ્યથવાઽતથ્યાન્ગુણાનાહુઃ સમાગતાઃ ॥

અનુગ્રાહ્યા વયં નૂનં ભવતામિતિ મે મતિઃ ।
યદેવં ગુણસમ્પન્નાનસ્માન્બ્રૂથ વિમત્સરાઃ ॥

ધૃતરાષ્ટ્રો મહારાજઃ પિતા નો દૈવતં પરમ્ ।
શાસનેઽસ્ય પ્રિયે ચૈવ સ્થેયં મત્પ્રિયકાઙ્ક્ષિભિઃ ॥

એતદર્થં હિ જીવામિ કૃત્વા જ્ઞાતિવધં મહત્ ।
અસ્ય શુશ્રૂષણં કાર્યં મયા નિત્યમતન્દ્રિણા ॥

યદિ ચાહમનુગ્રાહ્યો ભવતાં સુહૃદાં તથા ।
ધૃતરા યથાપૂર્વં વૃત્તિં વર્તિતુમર્હથ ॥

એષ નાથો હિ જગતો ભવતાં ચ મયા સહ ।
અસ્ય પ્રસાદે પૃથિવી પાણ્ડવાઃ સર્વ એવ ચ ॥

એતન્મનસિ કર્તવ્યં ભવદ્ભિર્વચનં મમ ।
અનુજ્ઞાપ્યાથ તાન્રાજા યથેષ્ટં ગમ્યતામિતિ ॥

પૌરજાનપદાન્સર્વાન્વિસૃજ્ય કુરુનન્દનઃ ।
યૌવરાજ્યેન કૌન્તેયં ભીમસેનમયોજયત્ ॥

મન્ત્રે ચ નિશ્ચયે ચૈવ ષાઙ્ગુણ્યસ્ય ચ ચિન્તને ।
વિદુરં બુદ્ધિસમ્પન્નં પ્રીતિમાન્સ સમાદિશત્ ॥

કૃતાકૃતપરિજ્ઞાને તથાઽયવ્યયચિન્તને ।
સઞ્જયં યોજયામાસ વૃદ્ધં સર્વગુણૈર્યુતમ્ ॥

બલસ્ય પરિમાણે ચ ભક્તવેતનયોસ્તથા ।
નકુલં વ્યાદિશદ્રાજા કર્મણાં ચાન્વવેક્ષણે ॥

પરચક્રોપરોધે ચ દૃપ્તાનાં ચાવમર્દને ।
યુધિષ્ઠિરો મહારાજ ફલ્ગુનં વ્યાદિદેશ હ ॥

દ્વિજાનાં દેવકાર્યેષુ કાર્યેષ્વન્યેષુ ચૈવ હ ।
ધૌમ્યં પુરોધસાં શ્રેષ્ઠં નિત્યમેવ સમાદિશત્ ॥

સહદેવં સમીપસ્થં નિત્યમેવ સમાદિશત્ ।
તને ગોપ્યો હિ નૃપતિઃ સર્વાવસ્થો વિશામ્પતે ॥

યાન્યાનમન્યદ્યોગ્યાંશ્ચ યેષુ યેષ્વિહ કર્મસુ ।
તાંસ્તાંસ્તેષ્વેવ યુયુજે પ્રીયમાણો મહીપતિઃ ॥

વિદુરં સઞ્જયં ચૈવ યુયુત્સું ચ મહામતિમ્ ।
અબ્રવીત્પરવીરઘ્નો ધર્માત્મા ધર્મવત્સલઃ ॥

ઉત્થાયોત્થાય તત્કાર્યમસ્ય રાજ્ઞઃ પિતુર્મમ ।
સર્વં ભવદ્ભિઃ કર્તવ્યમપ્રમત્તૈર્યથા મમ ॥

પૌરજાનપદાનાં ચ યાનિ કાર્યાણિ નિત્યશઃ ।
રાજાનં સમનુજ્ઞાપ્ય તાનિ કાર્યાણિ ધર્મતઃ ॥