Mahabharata · Chapter 12.372

vivasvato gacchati paryayeṇa voḍuṃ bhavāṃstaṃ yathamekacakram /
āścaryabhūtaṃ yadi tatra kiñci ddṛṣṭaṃ tvayāśaṃsitumarhasi tvam //
nāga uvāca /

āścaryāṇāmanekānāṃ pratiṣṭhā bhagavānraviḥ /
yato bhūtāḥ pravartante sarve trailokyasammatāḥ //

yasya raśmisahasreṣu śākhāsviva vihangamāḥ /
vasantyāśritya munayaḥ saṃsiddhā daivataiḥ saha //

yato pāyurviniḥsṛtya sūryaraśmyāśrito mahān /
vijṛmbhatyambare tatra kimāścaryamataḥ param //

vibhajyaṃ taṃ tu viprarṣe prajānāṃ hitakāmyayā /
toyaṃ sṛjati varṣāsu kimāścaryamataḥ param //

yasya maṇḍalamadhyastho mahātmā paramatviṣā / 12-372-6 dīptaḥ samīkṣate'lokānkimāścaryamataḥ param //

śukro nāmāsitaḥ pādo yaśca vāridharo'mbare /
toyaṃ sṛjati varṣāsu kimāścaryamataḥ param //

yo'ṣṭamāsāṃstu śucinā kiraṇenokṣitaṃ payaḥ /
pratyādatte punaḥ kāle kimāścaryamataḥ param //

yasya tejoviśeṣeṣu svayamātmā pratiṣṭhitaḥ /
yato bījaṃ mahī ceyaṃ dhāryate sacarācaram //

yatra devo mahābāhuḥ śāśvataḥ puruṣottamaḥ /
anādinidhano vipra kimāścaryamataḥ param //

āścaryāṇāmivāścaryamidamekaṃ tu me śṛṇu /
vimale yanmayā dṛṣṭamambare sūryasaṃśrayāt //

purā madhyāhnasamaye lokāṃstapati bhāskare /
pratyādityapratīkāśaḥ sarvataḥ samadṛśyata //

sa lokāṃstejasā sarvānsvabhāsā nirvibhāsayan /
ādityādhimukho'bhyeti gaganaṃ pāṭayanniva //

hutāhutiriva jyotirvyāpya tejomarīcibhiḥ /
anirdeśyena rūpeṇa dvitīya iva bhāskaraḥ //

tasyābhigamanaprāptau hastau dattau vivasvatā /
tenāpi dakṣiṇo hasto dattaḥ pratyarcitārthinā //

tato bhittvaiva gagana praviṣṭo raśmimaṇḍalam /
ekībhūtaṃ ca tattejaḥ kṣaṇenādityatāṃ gatam //

tatra naḥ saṃśayo jātastayostejaḥ samāgame /
anayoḥ ko bhavetsūryo rathastho yo'yamāgataḥ //

te vayaṃ jātasandehāḥ paryapṛcchāmahe ravim /
ka eṣa divamākramya gataḥ sūrya ivāparaḥ //