Mahabharata · Chapter 12.373
naiṣa devo'nilasakho nāsuro na ca yannagaḥ /
uñchavṛttivrate siddho munireṣa divaṃ gataḥ //
eṣa mūlaphalāhāraḥ śīrṇaparṇāśanastathā /
abbhakṣo vāyubhakṣaśca āsīdvipraḥ samāhitaḥ //
bhavaścānena vipreṇa saṃhitābhirabhiṣṭutaḥ /
svargadvāre kṛtodyogo yenāsau trividaṃ gataḥ //
asangatiranākāṅkṣī nityamuñchaśilāśanaḥ /
sarvabhūtahite yukta eṣa vipro bhujangamāḥ //
na hi devā na gandharvā nāsurā na ca pannagāḥ /
prabhavantīha bhūtānāṃ prāptānāmuttamāṃ gatim //
etadevaṃvidhaṃ dṛṣṭamāścaryaṃ tatra me dvija / saṃsiddho mānuṣaḥ kāmaṃ yosau siddhagatiṃ gataḥ /
sūryeṇa sahito brahmanpṛthivīṃ parivartate //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0