Mahabharata · Chapter 12.371

sa pannagapatistatra prayayau brāhmaṇaṃ prati /
tameva manasā dhyāyankāryavattāṃ vicārayan //

tamatikramya nāgendro matimānsa nareśvara /
provāca madhuraṃ vākyaṃ prakṛtyā dharmavatsalaḥ //

bhobho kṣāmyābhibhāṣae tvāṃ na roṣaṃ kartumarhasi /
iha tvamabhisamprāptaḥ kasyārthe kiṃ prayojanam //

ābhimukhyādabhikramya snehātpṛcchāmi te dvija /
vivikte gomatītīre kaṃ vā tvaṃ paryupāsase //
brāhmaṇa uvāca /

dharmāraṇyaṃ hi māṃ viddhi nāgaṃ draṣṭumihāgatam /
padmanābhaṃ dvijaśreṣṭha tatra me kāryamāhitam //

tasya cāhamasānnidhye śrutavānasmi taṃ gatam /
svajanāttaṃ pratīkṣāmi parjanyamiva karṣakaḥ //

tasya cākleśakaraṇaṃ svastikārasamāhitam /
āvartayāmi tadbrahma yogayukto nirāmayaḥ //
nāga uvāca /

aho kalyāṇavṛttastvaṃ sādhuḥ sajjanavatsalaḥ /
avācyastvaṃ mahābhāga paraṃ snehena paśyasi //

ahaṃ sa nāgo viprarṣe yathā māṃ vindate bhavān /
ājñāpaya yathāsvairaṃ kiṃ karomi priyaṃ tava //

bhavantaṃ svajanādasmi samprāptaṃ śrutavānaham /
atastvāṃ svayamevāhaṃ draṣṭumabhyāgato dvija //

samprāptaśca bhavānadya kṛtārthaḥ pratiyāsyati /
visrabdho māṃ dvijaśreṣṭha viṣaye yoktamarhasi //

vayaṃ hi bhavatā sarve guṇakrītā viśeṣataḥ /
yastvamātmahitaṃ tyaktvā māmevehānurudhyase //
brāhmaṇa uvāca /

āgato'haṃ mahābhāga tava darśanalālasaḥ /
kañcidarthamanaryajñaḥ praṣṭukāmo bhujangama //

ahamātmānamātmastho mārgagāṇo'tmano gatim /
vāsārthinaṃ mahāprajñaṃ calaccittamupāsmi ha //

prakāśitastvaṃ sa guṇairyaśogarbhagabhastibhiḥ /
śaśāṅkakarasaṃsparśairhṛdyairātmaprakāśitaiḥ //

tasya me praśnamutpannaṃ chindhi tvamanilāśana /
paścātkāryaṃ vadiṣyāmi śrotumarhati tadbhavān //