Mahabharata · Chapter 12.37

praveśane tu pārthānāṃ janānāṃ puravāsinām /
didṛkṣūṇāṃ sahasrāṇi samājagmuḥ sahasraśaḥ //

sa rājamārgaḥ śuśubhe samalankṛtacatvaraḥ /
yathā candrodaye rājanvardhamāno mahodadhiḥ //

gṛhāṇi rājamārgeṣu ratnavanti mahānti ca /
prākampantīva bhāreṇa strīṇāṃ pūrṇāni bhārata //

tāḥ śanairiva savrīḍaṃ praśaśaṃsuryudhiṣṭhiram /
bhīmasenārjunau caiva mādrīputrau ca pāṇḍavau //

dhanyā tvamasi pāñcāli yā tvaṃ puruṣasattamān /
upatiṣṭhasi kalyāṇi maharṣimiva gautamī //

tava karmāṇyamoghāni vratacaryā ca bhāmini /
iti kṛṣṇāṃ mahārāja praśaśaṃsustadā striyaḥ //

praśaṃsāvacanaistāsāṃ mithaḥ śabdaiśca bhārata /
prītijaiśca tadā śabdaiḥ puramāsītsamākulam //

tamatītya yathāyuktaṃ rājamārgaṃ yudhiṣṭhiraḥ /
alankṛtaṃ śobhamānamupāpādrājaveśma ha //

tataḥ prakṛtayaḥ sarvāḥ paurā jānapadāstadā /
ūcuḥ karṇasukhā vācaḥ samupetya tatastataḥ //

diṣṭyā jayasi rājendra śatrūñchatruniṣūdana /
diṣṭyā rājyaṃ punaḥ prāptaṃ dharmeṇa ca balena ca //

bhava nastvaṃ mahārāja rājeha śaradāṃ śatam /
prajāḥ pālaya dharmeṇa yathendrastridivaṃ tathā //

evaṃ rājakuladvāri maṅgalairabhipūjitaḥ /
āśīrvādāndvijairuktānpratigṛhya samantataḥ //

praviśya bhavanaṃ rājā devarājagṛhopamam /
śrutvā vijayasaṃyuktaṃ rathātpaścādavātarat //

praviśyābhyantaraṃ śrīmāndaivatānyabhigamya ca /
pūjayāmāsa ratnaiśca gandhamālyaiśca sarvaśaḥ //

niścakrāma tataḥ śrīmānpunareva mahāyaśāḥ /
dadarśa brāhmaṇāṃścaiva so'bhirūpānavasthitān //

sa saṃvṛtastadā viprairāśīrvādavivakṣubhiḥ /
śuśubhe vimalaścandrastārāgaṇavṛto yathā //

tāṃstu vai pūjayāmāsa kaunteyo vidhivaddvijān / sumanomodakai ratnairhiraṇyena ca bhūriṇā /
gobhirvastraiśca rājendra vividhaiśca kimicchakaiḥ //

dhaumyaṃ guruṃ puraskṛtya jyeṣṭhaṃ pitarameva ca / praviveśa sabhāṃ rājā sudharmāṃ vāsavo yathā //

tataḥ puṇyāhaghoṣo'bhūddivaṃ stabdhveva bhārata /
suhṛdāṃ prītijananaḥ puṇyaḥ śrutisukhāvahaḥ //

haṃsavanneduṣāṃ rājandvijānāṃ tatra bhāratī /
śuśruve vedaviduṣāṃ puṣkalārthapadākṣarā //

tato dundubhinirghoṣaḥ śaṅkhānāṃ ca manoramaḥ /
jayaṃ pravadatāṃ tatra svanaḥ prādurabhūnnṛpa //

niḥśabde ca sthite tatra tato viprajane punaḥ /
rājānaṃ brāhmaṇacchajhā cārvāko rākṣaso'bravīt //

tatra duryodhanasakhā bhikṣurūpeṇa saṃvṛtaḥ /
sāṅkhyaḥ śikhī tridaṇḍī ca dhṛṣṭo vigatasādhvasaḥ //

vṛtaḥ sarvaistathā viprairāśīrvādavivakṣubhiḥ /
parassahasrai rājendra taponiyamasaṃsthitaiḥ //

suduṣṭaḥ pāpamāśaṃsuḥ pāṇḍavānāṃ mahātmanām /
anāmantryaiva tānviprāṃstamuvāca mahīpatim //
cārvāka uvāca /

ime prāhurdvijāḥ sarve samāropya vaco mayi /
dhigbhavantaṃ kunṛpatiṃ jñātighātinamastu vai //

kiṃ te rājyena kaunteya kṛtvemaṃ jñātisankṣayam /
ghātayitvā gurūṃścaiva mṛtaṃ śreyo na jīvitam //

iti te vai dvijāḥ śrutvā tasya duṣṭasya rakṣasaḥ /
vivyathuścukruśuścaiva tasya vākyapradharṣitāḥ //

tataste brāhmaṇāḥ sarve sa ca rājā yudhiṣṭhiraḥ /
vrīḍitāḥ paramodvigrāstūṣṇīmāsanviśāmpate //
yudhiṣṭhira uvāca /

prasīdantu bhavanto me praṇatasyābhiyācataḥ /
pratyāsannavyasaninaṃ na māṃ dhikkartumarhatha //
vaiśampāyana uvāca /

tato rājanbrāhmāṇāste sarva eva viśāmpate /
ūcurnaiṣa dvijo'smākamanyastu tava pārthiva //

jajñuścainaṃ mahātmānastatastaṃ jñānacakṣuṣā /
brāhmaṇā vedavidvāṃsastapobhirvimalīkṛtāḥ //
brāhmaṇā ūcuḥ /

eṣa duryodhanasakhā viśruto brahmarākṣasaḥ /
parivrājakarūpeṇa hitaṃ tasya cikīrṣati //

na vayaṃ brūma dharmātmanvyetu te bhayamīdṛśam /
upatiṣṭhatu kalyāṇaṃ bhavantaṃ bhrātṛbhiḥ saha //
vaiśampāyana uvāca /

tataste brāhmaṇāḥ sarve hunkāraiḥ krodhamūrcchitāḥ /
nirbhartsayantaḥ śucayo nijaghnuḥ pāparākṣasam //

sa papāta vinirdagdhastejasā brahmavādinām /
mahendrāśaninirdagdhaḥ pādapo'ṅkuravāniva //

pūjitāśca yayurviprā rājānamabhinandya tam /
rājā ca harṣamāpede pāṇḍavaḥ sasuhṛjjanaḥ //