Mahabharata · Chapter 12.367

sa vanāni vicitrāṇi tīrthāni ca sarāṃsi ca /
abhigacchankrameṇa sma kañcinmunimupasthitaḥ //

taṃ sa tena yathoddiṣṭaṃ nāgaṃ vipreṇa brāhmaṇaḥ /
paryapṛcchadyathānyāyaṃ śrutvaiva ca jagāma saḥ //

so'bhigamya yathānyāyaṃ nāgāyatanamarthavit /
proktavānahamasmīti bhoḥśabdālankṛtaṃ vacaḥ //

tattasya vacanaṃ śrutvā rūpiṇī dharmavatsalā / darśayāmāsa taṃ vipraṃ nāgapatnī pativratā /

sā tasmai vidhivatpūjāṃ cakre dharmaparāyaṇā /
svāgatenāgataṃ kṛtvā kiṃ karomīti cābravīt //
brāhmaṇa uvāca /

viśrānto'bhyarcintaścāsmi bhavatyā ślakṣṇayā girā /
draṣṭumicchāmi bhavati devaṃ nāgamanuttamam //

etaddhi paramaṃ kāryametanme paramapsitam /
anena cārthenāsmyadya samprāptaḥ pannagāśramam //
nāgabhāryovāca /

āryaḥ sūryarathaṃ voḍhuṃ gato'sau māsacārikaḥ /
saptāṣṭabhirdinairvipra darśayiṣyatyasaṃśayam //

etadviditamāryasya vivāsakaraṇaṃ tava /
bharturbhavatu kiñcānyatkriyatāṃ tadvadasva me //
brāhmaṇa uvāca /

anena niścayenāhaṃ sādhvi samprāptavāniha /
pratīkṣannāgamaṃ devi vatsyāmyasminprahāvane //

samprāptasyaiva cāvyagramāvedyo'hamihāgataḥ /
mayābhigamanaṃ prāpto vācyaśca vacanaṃ tvayā //

ahamapyatra vatsyāmi gomatyāḥ puline śubhe /
kālaṃ parimitāhāro yathoktaṃ paripālayan //

tataḥ sa viprastāṃ nāgīṃ samādhāya punaḥpunaḥ /
vedavitpulinaṃ nadyāḥ prayayau brāhmaṇarbhaṣaḥ //