મહાભારત · અધ્યાય 12.367

સ વનાનિ વિચિત્રાણિ તીર્થાનિ ચ સરાંસિ ચ ।
અભિગચ્છન્ક્રમેણ સ્મ કઞ્ચિન્મુનિમુપસ્થિતઃ ॥

તં સ તેન યથોદ્દિષ્ટં નાગં વિપ્રેણ બ્રાહ્મણઃ ।
પર્યપૃચ્છદ્યથાન્યાયં શ્રુત્વૈવ ચ જગામ સઃ ॥

સોઽભિગમ્ય યથાન્યાયં નાગાયતનમર્થવિત્ ।
પ્રોક્તવાનહમસ્મીતિ ભોઃશબ્દાલન્કૃતં વચઃ ॥

તત્તસ્ય વચનં શ્રુત્વા રૂપિણી ધર્મવત્સલા । દર્શયામાસ તં વિપ્રં નાગપત્ની પતિવ્રતા ।

સા તસ્મૈ વિધિવત્પૂજાં ચક્રે ધર્મપરાયણા ।
સ્વાગતેનાગતં કૃત્વા કિં કરોમીતિ ચાબ્રવીત્ ॥
બ્રાહ્મણ ઉવાચ ।

વિશ્રાન્તોઽભ્યર્ચિન્તશ્ચાસ્મિ ભવત્યા શ્લક્ષ્ણયા ગિરા ।
દ્રષ્ટુમિચ્છામિ ભવતિ દેવં નાગમનુત્તમમ્ ॥

એતદ્ધિ પરમં કાર્યમેતન્મે પરમપ્સિતમ્ ।
અનેન ચાર્થેનાસ્મ્યદ્ય સમ્પ્રાપ્તઃ પન્નગાશ્રમમ્ ॥
નાગભાર્યોવાચ ।

આર્યઃ સૂર્યરથં વોઢું ગતોઽસૌ માસચારિકઃ ।
સપ્તાષ્ટભિર્દિનૈર્વિપ્ર દર્શયિષ્યત્યસંશયમ્ ॥

એતદ્વિદિતમાર્યસ્ય વિવાસકરણં તવ ।
ભર્તુર્ભવતુ કિઞ્ચાન્યત્ક્રિયતાં તદ્વદસ્વ મે ॥
બ્રાહ્મણ ઉવાચ ।

અનેન નિશ્ચયેનાહં સાધ્વિ સમ્પ્રાપ્તવાનિહ ।
પ્રતીક્ષન્નાગમં દેવિ વત્સ્યામ્યસ્મિન્પ્રહાવને ॥

સમ્પ્રાપ્તસ્યૈવ ચાવ્યગ્રમાવેદ્યોઽહમિહાગતઃ ।
મયાભિગમનં પ્રાપ્તો વાચ્યશ્ચ વચનં ત્વયા ॥

અહમપ્યત્ર વત્સ્યામિ ગોમત્યાઃ પુલિને શુભે ।
કાલં પરિમિતાહારો યથોક્તં પરિપાલયન્ ॥

તતઃ સ વિપ્રસ્તાં નાગીં સમાધાય પુનઃપુનઃ ।
વેદવિત્પુલિનં નદ્યાઃ પ્રયયૌ બ્રાહ્મણર્ભષઃ ॥