Mahabharata · Chapter 12.368
atha tena naraśreṣṭha brāhmaṇena tapasvinā /
nirāhāreṇa vasatā duḥkhitāste bhujaṅgamāḥ //
sarve sambhūya sahitā hyasya nāvasya bāndhavāḥ /
bhrātarastanayā bhāryā yayustaṃ brāhmaṇaṃ prati //
te'paśyanpuline taṃ vai vivikte niyatavratam /
samāsīnaṃ nirāhāraṃ dvijaṃ japyaparāyaṇam //
te sarve samabhikramya vipramabhyarcya cāsakṛt /
ūcurvākyamasandigdhamātitheyasya bāndhavāḥ //
ṣaṣṭho hi divasaste'dya prāptasyeha tapodhana /
na cābhibhāṣase kiñcidāhāraṃ dharmavatsala //
āmānabhigataścāsi vayaṃ ca tvāmupasthitāḥ /
kāryaṃ cātithyamasmābhirīpsitaṃ tava ṛddhimat //
mūlaṃ phalaṃ vā parṇaṃ vā payo vā dvijasattama /
āhārahetorannaṃ vā bhoktumarhasi brāhmaṇa //
tyaktāhāreṇa bhavatā vane nivasatā tvayā /
bālavṛddhamidaṃ sarvaṃ pīḍyate dharmasankarāt //
na hi no bhrūṇahā kaścitpannageṣviha vidyate /
pūrvāśī vā kule hyasmindevatātithibandhuṣu //
brāhmaṇa uvāca /
upadeśena yuṣmākamāhāro'yaṃ kṛto mayā /
dvirūnaṃ daśarātraṃ vai nāgasyāgamanaṃ prati //
yadyaṣṭarātre'tikrānte nāgamiṣyati pannagaḥ /
tadāhāraṃ kariṣyāmi tannimittamida vratam //
kartavyo na ca santāpo gamyatāṃ ca yathāgatam /
tannimittamidaṃ sarvaṃ naitadbhettugihārhatha //
te tena samanujñātā brāhmaṇena bhujaṅgamāḥ /
svameva bhavanaṃ jagmurakṛtārthā nararṣabha //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0