Mahabharata · Chapter 12.364

samutpanne vidhāne'sminvāṅbhādhuryeṇa te'nagha /
mitratvamabhisampannaḥ kiñcidvakṣyāmi tacchṛṇu //

gṛhasthadharmaṃ viprendra śrutvā dharmagataṃ tvaham /
dharmaṃ paramakaṃ kuryāṃ ko hi mārgo bhaveddvija //

ahamātmānamāsthāya eka evātmani sthitam /
draṣṭumicchanna paśyāmi baddhaḥ sādhāraṇairguṇaiḥ //

yāvadetadatītaṃ me vayaḥ putraphalāśritam /
tāvadicchāmi pātheyamādātuṃ pāralaukikam //

asminhi lokasambhāre paraṃ pāramabhīpsataḥ /
utpannā me matiriyaṃ kuto dharmamayaḥ plavaḥ //

saṃyujyamānāni niśāmya loke niryātyamānāni ca sātvikāni /
dṛṣṭvā tu dharmadhvajaketumālāṃ prakīryamāṇāmupari prajānām //

na me mano rajyati bhogarāgai rdṛṣṭvā gatiṃ prārthayataḥ paratra /
tenātithe buddhibalāśrayeṇa dharmeṇa dharme viniyuṅkṣva māṃ tvam //

so'tithirvacanaṃ tasya śrutvā dharmābhibhāṣiṇaḥ /
provāca vacanaṃ ślakṣaṇaṃ prājño madhurayā girā //

ahamapyatra muhyāmi mamāpyeṣa manorathaḥ /
na ca sanniścayaṃ cāmi bahudvāre triviṣṭaye //

kecinmokṣaṃ praśaṃsanti kecidyajñaphalaṃ dvijāḥ /
vānaprasthāśrayāḥ kecidgārhasthyaṃ kecidāśritāḥ //

rājadharmāśrayāḥ kecitkecidātmaphalāśrayāḥ /
gurudharmāśrayāḥ kecitkecidvāksaṃyamāśrayāḥ //

mātaraṃ pitaraṃ kecicchuśrūṣanto divaṃ gatāḥ /
ahiṃsayā pare svargaṃ satyena ca tathā'pare //

āhave'bhimukhaḥ kecinnihatāstridivaṃ gatāḥ /
keciduñchavrataiḥ siddhāḥ svargamārgaṃ samāśritāḥ //

kecidadhyayane yuktā vedavrataparāḥ śubhāḥ /
buddhimanto gatāḥ svargaṃ tuṣṭātmāno jitendriyāḥ //

ārjavenāpare yuktā nihatānārjavairjanaiḥ /
ṛjavo nākapṛṣṭhe vai śuddhātmānaḥ pratiṣṭhitāḥ //

evaṃ bahuvidhairlokairdharmadvārairanāvṛtaiḥ /
mamāpi matirāviddhā meghalekheva vāyunā //