Mahabharata · Chapter 12.363
āsītkila naraśreṣṭha mahāpadme purottame /
gaṅgāyā dakṣiṇe tīre kaścidvipraḥ samāhitaḥ //
saumyaḥ somānvaye jāto jitātmā gotrato bhṛguḥ /
dharmanityo jitakrodho nityatapto jitendriyaḥ //
tapaḥsvādhyāyanirataḥ satyaḥ sajjanasammataḥ /
nyāyaprāptena vittena svena śīlena cānvitaḥ //
jñāti sambandhivipule putrapautrapratiṣṭhite /
kule mahati vikhyāte viśiṣṭāṃ vṛttimāsthitaḥ //
sa putrānbahulām̐llabdhvā vipule karmaṇi sthitaḥ /
kuladharmāśrito rājandhararmacaryāsthito'bhavat //
tataḥ sa dharmaṃ vedoktaṃ tathā śāstrāktameva ca /
śiṣṭācīrṇaṃ ca dharmaṃ ca trividhaṃ cintya cetasā //
kinnu me syācchubhaṃ kṛtvā kiṃ kṛtaṃ kiṃ parāyaṇam /
ityevaṃ cintayannityaṃ na ca yāti viniścayam //
tasyaivaṃ cintyamānasya dharmaṃ paramamāsthitaḥ /
kadācidatithiḥ prāpto brāhmaṇaḥ susamāhitaḥ //
sa tasmai satkriyāṃ cakre kriyāyuktena hetunā /
viśrāntaṃ susamāsīnamidaṃ vacanamabravīt //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0