મહાભારત · અધ્યાય 12.364

સમુત્પન્ને વિધાનેઽસ્મિન્વાઙ્ભાધુર્યેણ તેઽનઘ ।
મિત્રત્વમભિસમ્પન્નઃ કિઞ્ચિદ્વક્ષ્યામિ તચ્છૃણુ ॥

ગૃહસ્થધર્મં વિપ્રેન્દ્ર શ્રુત્વા ધર્મગતં ત્વહમ્ ।
ધર્મં પરમકં કુર્યાં કો હિ માર્ગો ભવેદ્દ્વિજ ॥

અહમાત્માનમાસ્થાય એક એવાત્મનિ સ્થિતમ્ ।
દ્રષ્ટુમિચ્છન્ન પશ્યામિ બદ્ધઃ સાધારણૈર્ગુણૈઃ ॥

યાવદેતદતીતં મે વયઃ પુત્રફલાશ્રિતમ્ ।
તાવદિચ્છામિ પાથેયમાદાતું પારલૌકિકમ્ ॥

અસ્મિન્હિ લોકસમ્ભારે પરં પારમભીપ્સતઃ ।
ઉત્પન્ના મે મતિરિયં કુતો ધર્મમયઃ પ્લવઃ ॥

સંયુજ્યમાનાનિ નિશામ્ય લોકે નિર્યાત્યમાનાનિ ચ સાત્વિકાનિ ।
દૃષ્ટ્વા તુ ધર્મધ્વજકેતુમાલાં પ્રકીર્યમાણામુપરિ પ્રજાનામ્ ॥

ન મે મનો રજ્યતિ ભોગરાગૈ ર્દૃષ્ટ્વા ગતિં પ્રાર્થયતઃ પરત્ર ।
તેનાતિથે બુદ્ધિબલાશ્રયેણ ધર્મેણ ધર્મે વિનિયુઙ્ક્ષ્વ માં ત્વમ્ ॥

સોઽતિથિર્વચનં તસ્ય શ્રુત્વા ધર્માભિભાષિણઃ ।
પ્રોવાચ વચનં શ્લક્ષણં પ્રાજ્ઞો મધુરયા ગિરા ॥

અહમપ્યત્ર મુહ્યામિ મમાપ્યેષ મનોરથઃ ।
ન ચ સન્નિશ્ચયં ચામિ બહુદ્વારે ત્રિવિષ્ટયે ॥

કેચિન્મોક્ષં પ્રશંસન્તિ કેચિદ્યજ્ઞફલં દ્વિજાઃ ।
વાનપ્રસ્થાશ્રયાઃ કેચિદ્ગાર્હસ્થ્યં કેચિદાશ્રિતાઃ ॥

રાજધર્માશ્રયાઃ કેચિત્કેચિદાત્મફલાશ્રયાઃ ।
ગુરુધર્માશ્રયાઃ કેચિત્કેચિદ્વાક્સંયમાશ્રયાઃ ॥

માતરં પિતરં કેચિચ્છુશ્રૂષન્તો દિવં ગતાઃ ।
અહિંસયા પરે સ્વર્ગં સત્યેન ચ તથાઽપરે ॥

આહવેઽભિમુખઃ કેચિન્નિહતાસ્ત્રિદિવં ગતાઃ ।
કેચિદુઞ્છવ્રતૈઃ સિદ્ધાઃ સ્વર્ગમાર્ગં સમાશ્રિતાઃ ॥

કેચિદધ્યયને યુક્તા વેદવ્રતપરાઃ શુભાઃ ।
બુદ્ધિમન્તો ગતાઃ સ્વર્ગં તુષ્ટાત્માનો જિતેન્દ્રિયાઃ ॥

આર્જવેનાપરે યુક્તા નિહતાનાર્જવૈર્જનૈઃ ।
ઋજવો નાકપૃષ્ઠે વૈ શુદ્ધાત્માનઃ પ્રતિષ્ઠિતાઃ ॥

એવં બહુવિધૈર્લોકૈર્ધર્મદ્વારૈરનાવૃતૈઃ ।
મમાપિ મતિરાવિદ્ધા મેઘલેખેવ વાયુના ॥