Mahabharata · Chapter 12.356

śrutvaitannārado vākyaṃ naranārāyaṇeritam /
atyantaṃ bhaktimāndeve ekāntitvamupeyivān //

uṣitvā varṣasāhasraṃ naranārāyaṇāśrame / śrutvā bhagavadākhyānaṃ dṛṣṭvā ca harimavyayam /
jagāma himavatkukṣāvāśramaṃ svaṃ surārcitam //

tāvapi khyātayaśasau naranārāyaṇāvṛṣī /
tasminnevāśrame ramye tepatustapa sattamam //

tvamapyamitavikrāntaḥ pāṇḍavānāṃ kulodvahaḥ /
pāvitātmā'dya saṃvṛttaḥ śrutvemāmāditaḥ kathām //

naiva tasyāparo loko nāyaṃ pārthivasattama /
karmaṇā manasā vācā yo dviṣyādviṣṇumavyayam //

majjanti pitarastasya narake śāśvatīḥ samāḥ /
yo dviṣyādvibudhaśreṣṭhaṃ devaṃ nārāyaṇaṃ harim //

kathaṃ nāma bhaveddveṣya ātmā lokasya kasyacit /
ātmā hi puruṣavyāghra jñeyo viṣṇuriti śrutiḥ //

ya eṣa gururasmākamṛṣirgandhavatīsutaḥ / tenaitatkathitaṃ tāta māhātmyaṃ paramātmanaḥ /
tasmācchrutaṃ mayā cedaṃ kathitaṃ ca tavānagha //

nāradena tu samprāptaḥ sarahasyaḥ sasangrahaḥ /
eṣa dharmo jagannāthātsākṣānnārāyaṇānnṛpa //

evameṣa mahāndharmaḥ sa te pūrvaṃ nṛpottama /
kathito harigītāsu samāsavidhikalpitaḥ //

kṛṣṇadvaipāyanaṃ vyāsaṃ viddhi nārāyaṇaṃ prabhum / ko hyanyaḥ puṇḍarīkākṣānmahābhāratakṛdbhavet /
dharmānnānāvidhāṃścaiva ko brūyāttamṛte prabhum //

vartatāṃ te mahāyajño yathāsankalpitastvayā /
sankalpitāśvamedhastvaṃ śrutadharmā ca tattvataḥ //
sautiruvāca /

etattu mahadākhyānaṃ śrutvā pārīkṣito nṛpaḥ /
tato yajñasamāptyarthaṃ kriyāḥ sarvāḥ samārabhat //

nārāyaṇīyamākhyānametatte kathitaṃ mayā /
pṛṣṭena śaunakādyeha naimiṣāraṇyavāsiṣu //

nāradena purā yadvai gurave tu niveditam /
ṛṣīṇāṃ pāṇḍavānāṃ ca śṛṇvatoḥ kṛṣṇabhīṣmayoḥ //

sa hi paramarṣirjanabhuvanapatiḥ pṛthudharaṇidharaḥ śrutivinayaparaḥ /
śamaniyamanidhiryamaniyamaparo dvijavara sahitastava ca bhavatu gatirhariramarahitaḥ //

asuravadhakarastapasānnidhiḥ sumahatāṃ yaśasāṃ ca bhājanam /
ekāntināṃ śaraṇado'bhayado gatido gatidostu vaḥ sukhabhāgakaraḥ / madhukaiṭabhahā kṛtadharmavidāṃ gatido bhayado makhabhāgaharostu śaraṇaṃ sa te //

triguṇo viguṇaścaturātmadharaḥ pūrteṣṭayośca phalabhāgaharaḥ /
vidadhātu nityamajito'ticalo gatirātmavatāṃ sukṛtināmṛṣīṇām //

taṃ lokasākṣiṇamajaṃ puruṣaṃ purāṇaṃ ravivarṇamīśvaraṃ gatiṃ bahuśaḥ /
praṇamadhvamekamatayo yataḥ salilodbhavopi tamṛṣiṃ praṇataḥ //

sa hi lokayonirasṛtasya padaṃ sūkṣmaṃ parāyaṇamacalaṃ hi padam /
tatsāṅkhyayogibhirudāhṛtaṃ taṃ buddhyā yatātmabhiridaṃ sanātanam //