મહાભારત · અધ્યાય 12.356

શ્રુત્વૈતન્નારદો વાક્યં નરનારાયણેરિતમ્ ।
અત્યન્તં ભક્તિમાન્દેવે એકાન્તિત્વમુપેયિવાન્ ॥

ઉષિત્વા વર્ષસાહસ્રં નરનારાયણાશ્રમે । શ્રુત્વા ભગવદાખ્યાનં દૃષ્ટ્વા ચ હરિમવ્યયમ્ ।
જગામ હિમવત્કુક્ષાવાશ્રમં સ્વં સુરાર્ચિતમ્ ॥

તાવપિ ખ્યાતયશસૌ નરનારાયણાવૃષી ।
તસ્મિન્નેવાશ્રમે રમ્યે તેપતુસ્તપ સત્તમમ્ ॥

ત્વમપ્યમિતવિક્રાન્તઃ પાણ્ડવાનાં કુલોદ્વહઃ ।
પાવિતાત્માઽદ્ય સંવૃત્તઃ શ્રુત્વેમામાદિતઃ કથામ્ ॥

નૈવ તસ્યાપરો લોકો નાયં પાર્થિવસત્તમ ।
કર્મણા મનસા વાચા યો દ્વિષ્યાદ્વિષ્ણુમવ્યયમ્ ॥

મજ્જન્તિ પિતરસ્તસ્ય નરકે શાશ્વતીઃ સમાઃ ।
યો દ્વિષ્યાદ્વિબુધશ્રેષ્ઠં દેવં નારાયણં હરિમ્ ॥

કથં નામ ભવેદ્દ્વેષ્ય આત્મા લોકસ્ય કસ્યચિત્ ।
આત્મા હિ પુરુષવ્યાઘ્ર જ્ઞેયો વિષ્ણુરિતિ શ્રુતિઃ ॥

ય એષ ગુરુરસ્માકમૃષિર્ગન્ધવતીસુતઃ । તેનૈતત્કથિતં તાત માહાત્મ્યં પરમાત્મનઃ ।
તસ્માચ્છ્રુતં મયા ચેદં કથિતં ચ તવાનઘ ॥

નારદેન તુ સમ્પ્રાપ્તઃ સરહસ્યઃ સસન્ગ્રહઃ ।
એષ ધર્મો જગન્નાથાત્સાક્ષાન્નારાયણાન્નૃપ ॥

એવમેષ મહાન્ધર્મઃ સ તે પૂર્વં નૃપોત્તમ ।
કથિતો હરિગીતાસુ સમાસવિધિકલ્પિતઃ ॥

કૃષ્ણદ્વૈપાયનં વ્યાસં વિદ્ધિ નારાયણં પ્રભુમ્ । કો હ્યન્યઃ પુણ્ડરીકાક્ષાન્મહાભારતકૃદ્ભવેત્ ।
ધર્માન્નાનાવિધાંશ્ચૈવ કો બ્રૂયાત્તમૃતે પ્રભુમ્ ॥

વર્તતાં તે મહાયજ્ઞો યથાસન્કલ્પિતસ્ત્વયા ।
સન્કલ્પિતાશ્વમેધસ્ત્વં શ્રુતધર્મા ચ તત્ત્વતઃ ॥
સૌતિરુવાચ ।

એતત્તુ મહદાખ્યાનં શ્રુત્વા પારીક્ષિતો નૃપઃ ।
તતો યજ્ઞસમાપ્ત્યર્થં ક્રિયાઃ સર્વાઃ સમારભત્ ॥

નારાયણીયમાખ્યાનમેતત્તે કથિતં મયા ।
પૃષ્ટેન શૌનકાદ્યેહ નૈમિષારણ્યવાસિષુ ॥

નારદેન પુરા યદ્વૈ ગુરવે તુ નિવેદિતમ્ ।
ઋષીણાં પાણ્ડવાનાં ચ શૃણ્વતોઃ કૃષ્ણભીષ્મયોઃ ॥

સ હિ પરમર્ષિર્જનભુવનપતિઃ પૃથુધરણિધરઃ શ્રુતિવિનયપરઃ ।
શમનિયમનિધિર્યમનિયમપરો દ્વિજવર સહિતસ્તવ ચ ભવતુ ગતિર્હરિરમરહિતઃ ॥

અસુરવધકરસ્તપસાન્નિધિઃ સુમહતાં યશસાં ચ ભાજનમ્ ।
એકાન્તિનાં શરણદોઽભયદો ગતિદો ગતિદોસ્તુ વઃ સુખભાગકરઃ । મધુકૈટભહા કૃતધર્મવિદાં ગતિદો ભયદો મખભાગહરોસ્તુ શરણં સ તે ॥

ત્રિગુણો વિગુણશ્ચતુરાત્મધરઃ પૂર્તેષ્ટયોશ્ચ ફલભાગહરઃ ।
વિદધાતુ નિત્યમજિતોઽતિચલો ગતિરાત્મવતાં સુકૃતિનામૃષીણામ્ ॥

તં લોકસાક્ષિણમજં પુરુષં પુરાણં રવિવર્ણમીશ્વરં ગતિં બહુશઃ ।
પ્રણમધ્વમેકમતયો યતઃ સલિલોદ્ભવોપિ તમૃષિં પ્રણતઃ ॥

સ હિ લોકયોનિરસૃતસ્ય પદં સૂક્ષ્મં પરાયણમચલં હિ પદમ્ ।
તત્સાઙ્ખ્યયોગિભિરુદાહૃતં તં બુદ્ધ્યા યતાત્મભિરિદં સનાતનમ્ ॥