Mahabharata · Chapter 12.355

kasyacittvatha kālasya nāradaḥ parameṣṭhijaḥ /
daivaṃ kṛtvā yathānyāyaṃ pitryaṃ cakre tataḥ param //

tatastaṃ vacanaṃ prāha jyeṣṭho dharmātmajaḥ prabhuḥ /
ka ijyate dvijaśreṣṭha daive pitrye ca kalpite //

tvayā matimatāṃ śreṣṭha tanme śaṃsa yathātatham /
kimetatkriyate karma phalaṃ vā'sya kimiṣyate //
nārada uvāca /

tvayaitatkathitaṃ pūrvaṃ daivaṃ kartavyamityapi /
daivataṃ ca paro jñeyaḥ paramātmā sanātanaḥ //

tatastadbhāvito nityaṃ yaje vaikuṇṭhamavyayam /
tasmācca prasṛtaḥ pūrvaṃ brahmā lokapitāmahaḥ //

mama vai pitaraṃ prītaḥ parameṣṭhyapyajījanat /
ahaṃ sankalpajastasya putraḥ prathamakalpitaḥ //

yajāmi vai pitṝnsādho nārāyaṇavidhau kṛte /
evaṃ sa eva bhagavānpitā mātā pitāmahaḥ //

ijyate pitṛyajñeṣu mayā nityaṃ jagatpatiḥ /
śrutiścāpyaparā devāḥ putrānhi pitaro'yajan //

vedaśrutiḥ pranaṣṭā ca punaradhyāpitā sutaiḥ /
tataste mantradāḥ putrāḥ pitṝṇāmiti vaidikam //

nūnaṃ suraistadviditaṃ yuvayorbhāvitātmanoḥ /
putrāśca pitaraścaiva parasparamapūjayan //

trīnpiṇḍānnyasya vai pitryānpūrvaṃ dattvā kuśāniti /
kathaṃ tu piṇḍasañjñāṃ te pitaro lebhire purā //
naranārāyaṇāvūcatuḥ /

imāṃ hi dharaṇīṃ pūrvaṃ naṣṭāṃ sāgaramekhalām /
govinda ujjahārāśu vārāhaṃ rūpamāsthitaḥ //

sthāpayitvā tu dharaṇīṃ sve sthāne puruṣottamaḥ /
jalakardamaliptāṅgo lokakāryārthamudyataḥ //

prāpte cāhnikakāle tu madhyadeśagate ravau /
daṃṣṭrāvilagnāṃstrīnpiṇḍānvidhūya sahasā prabhuḥ //

sthāpayāmāsa vai pṛthvyāṃ kuśānāstīrya nārada /
sa teṣvātmānamuddiśya pitryaṃ cakre yathāvidhi //

sankalpayitvā trīnpiṇḍānsvenaiva vidhinā prabhuḥ /
ātmagātroṣmasambhūtaiḥ snehagarbhaistilairapi //

prokṣyāpasavyaṃ deveśaḥ prāṅbhukhaḥ kṛtavānsvayam /
maryādāsthāpanārthaṃ ca tato vacanamuktavān //
vṛṣākapiruvāca /

ahaṃ hi pitaraḥ sraṣṭumudyato lokakṛtsvayam /
tasya cintayataḥ sadyaḥ pitṛkāryavidhīnparān //

daṃṣṭrābhyāṃ pravinirdhūtā mamaite dakṣiṇāṃ diśam /
āśritā dharaṇīṃ pīḍya tasmātpitara eva te //

trayo mūrtivihīnā vai piṇḍamūrtidharāstvime /
bhavantu pitaro loke mayā sṛṣṭāḥ sanātanāḥ //

pitā pitāmahaścaiva tathaiva prapitāmahaḥ / ahamevātra vijñeyastriṣu piṇḍeṣu saṃsthitaḥ /
nāsti matto'dhikaḥ kaścitko vānyorcyo mayā svayaṃ

ahameva pitā loke ahameva pitāmahaḥ /
pitāmahapitā caiva ahamevātra kāraṇam //

ityetaduktvā vacanaṃ devadevo vṛṣākapiḥ / varāhaparvate vipra dattvā piṇḍānsavistarān /
ātmānaṃ pūjayitvaiva tatraivādarśanaṃ gataḥ //

etadarthaṃ subhamate pitaraḥ piṇḍasañjñitāḥ /
labhante satataṃ pūjāṃ vṛṣākapivaco yathā //

ye yajanti pitṝndevāngurūṃścaivātirthīstathā /
gāścaiva dvijamukhyāṃśca pitaraṃ mātaraṃ tathā //

karmaṇā manasā vācā viṣṇumeva yajanti te /
antargataḥ sa bhagavānsarvasatvaśarīragaḥ //

samaḥ sarveṣu bhūteṣu īśvaraḥ sukhaduḥkhayoḥ /
mahānmahātmā sarvātmā nārāyaṇa iti śrutiḥ //