Mahabharata · Chapter 12.340

giriśṛṅgaṃ samāruhya suto vyāsasya bhārata /
same deśe vivikte sa niḥśalāka upāviśat //

dhārayāmāsa cātmānaṃ yathāśāstraṃ yathāvidhi /
pādaprabhṛtigātreṣu krameṇa kramayogavit //

tataḥ sa prāṅbhukho vidvānāditye nācirodite /
pāṇipādaṃ samādhāya vinītavadupāviśat //

na tatra pakṣisampāto na śabdo nāpi darśanam /
yatra vaiyāsakirdhīmānyoktuṃ samupacakrame //

sa dadarśa tadā'tmānaṃ sarvasaṅgaviniḥsṛtam /
prajahāsa tato hāsaṃ śukaḥ samprekṣya tatparam //

sa punaryogamāsthāya mokṣamārgopalabdhaye /
mahāyogeśvaro bhūtvā so'tyakrāmadvihāyasam //

tataḥ pradakṣiṇaṃ kṛtvā devarṣi nāradaṃ tataḥ /
nivedayāmāsa ca taṃ svaṃ yogaṃ paramarṣaye //
śuka uvāca /

dṛṣṭo mārgaḥ pravṛttosmi svasti te'stu tapodhana /
tvatprasādādgamiṣyāmi gatimiṣṭāṃ mahādyute //

nāradenābhyanujñātaḥ śuko dvaipāyanātmajaḥ /
abhivādya punaryogamāsthāyākāśamāviśat //

kailāsapṛṣṭhādutpatya sa papāta divaṃ tadā /
antarikṣacaraḥ śrīmānvyāsaputraḥ suniścitaḥ //

tamudyantaṃ dvijaśreṣṭhaṃ vainateyasamadyutim /
dadṛśuḥ sarvabhūtāni mano'mārutaraṃhasam //

vyavasāyena lokāṃstrīnsarvānso'tha vicintayan /
āsthito divyamadhvānaṃ pāvakārkasamaprabhaḥ //

tamekamanasaṃ yāntamavyagramakutobhayam /
dadṛśuḥ sarvabhūtāni jaṅgamānītarāṇi ca //

yathāśakti yathānyāyaṃ pūjayāñcakrire tadā /
puṣpavarṣeśca divyaistamalañcakrurdivaukasaḥ //

taṃ dṛṣṭvā vismitāḥ sarve gandharvāpsarasāṃ gaṇāḥ /
ṛṣayaścaiva saṃsiddhāḥ paraṃ vismayamāgatāḥ //

antarikṣagataḥ ko'yaṃ tapasā siddhimāgataḥ /
adhaḥ kāyordhvavakraśca netraiḥ samativāhyate //

tataḥ paramadharmātmā triṣu lokeṣu viśrutaḥ / bhāskaraṃ samudīkṣansa prāṅbhukho vāgyato'gamat /
śabdenākāśamakhilaṃ pūrayanniva sarvaśaḥ //

tamāpatantaṃ sahasā dṛṣṭvā sarvāpsarogaṇāḥ / sambhrāntamanaso rājannāsanparamavismitāḥ /
pañcacūḍāprabhṛtayo bhṛśamutphullalocanāḥ //

daivataṃ katamaṃ hyetaduttamāṃ gatimāsthitam /
suniścitamihāyāti vimuktamiva niḥspṛham //

tataḥ samabhicakrāma malayaṃ nāma parvatam /
urvaśī pūrvacittiśca yaṃ nityamupasevataḥ //

tasya brahmarṣiputrasya vismayaṃ yayatuḥ param /
aho buddhisamādhānaṃ vedābhyāsarate dvije //

acireṇaiva kālena nabhaścarati candravat /
pitṛśuśrūṣayā buddhiṃ samprāpto'yamanuttamām //

pitṛbhakto dṛḍhatapāḥ pituḥ sudayitaḥ sutaḥ /
ananyamanasā tena kathaṃ pitrā visarjitaḥ //

urvaśyā vacanaṃ śrutvā śukaḥ paramadharmavit /
udaikṣata diśaḥ sarvā vacane gatamānasaḥ //

so'ntarikṣaṃ mahīṃ caiva saśailavanakānanām /
vilokayāmāsa tadā sarāṃsi saritastathā //

tato dvaipāyanasutaṃ bahumānātsamantataḥ /
kṛtāñjalipuṭāḥ sarvā nirīkṣante sma devatāḥ //

abravīttāstadā vākyaṃ śukaḥ paramadharmavit /
pitā yadyanugacchenmāṃ krośamāna śuketi vai //

tasya prativaco deyaṃ sarvaireva samāhitaiḥ /
etanme snehanaḥ sarve vacanaṃ kartumarhatha //

śukasya vacana śrutvā diśaḥ sajalakānanāḥ /
samudrāḥ saritaḥ śailāḥ pratyūcustaṃ samantataḥ //

yathā jñāpayase vipra bāḍhamevaṃ bhaviṣyati /
ṛṣervyāharato vākyaṃ prativakṣyāmahe vayam //