Mahabharata · Chapter 12.34

tapasā karmaṇā caiva pradānena ca bhārata /
punāti pāpaṃ puruṣaḥ pūtaścenna pravartate //

ekakālaṃ tu bhuñjānaścaranbhaikṣaṃ svakarmakṛt /
kapālapāṇiḥ khaṭvāṅgī brahmacārī sadotthitaḥ //

anasūyuradhaḥ śāyī karma loke prakāśayan /
pūrṇairdvādaśabhirvarṣairbrahmahā vipramucyate //

lakṣyaḥ śastrabhṛtāṃ vā syādviduṣāmicchayā'tmanaḥ /
prāsyedātmānamagnau vā samiddhe triravāk्śirāḥ //

japanvā'nyatamaṃ vedaṃ yojanānāṃ śataṃ vrajet /
sarvasvaṃ vā vedavide brāhmaṇāyopapādayet //

dhanaṃ vā jīvanāyālaṃ gṛhaṃ vā saparicchadam /
mucyate brahmahatyāyā goptā gobrāhmaṇasya ca //

ṣaṅgirvarṣaiḥ kṛcchrabhojī brahmahā pūyate naraḥ /
māsemāse samaśnaṃstu tribhirvarṣaiḥ pramucyate //

saṃvatsareṇa māsāśī pūyate nātra saṃśayaḥ /
tathaivopavasanrājansvalpenāpi prapūyate //

kratunā cāśvamedhena pūyate nātra saṃśayaḥ / ye cāpyavabhṛthasnātāḥ kecidevaṃvidhā narāḥ /
te sarve dhūtapāpmāno bhavantīti parā śrutiḥ //

brāhmaṇārthe hato yuddhe mucyate brahmahatyayā //

gavāṃ śatasahasraṃ tu pātrebhyaḥ pratipādayet /
brahmahā vipramucyeta sarvapāpebhya eva ca //

kapilānāṃ sahasrāṇi yo dadyātpañcaviṃśatim /
dogdhrīṇāṃ sa ca pāpebhyaḥ sarvebhyo vipramucyate //

gosahasraṃ savatsānāṃ dogdhrīṇāṃ prāṇasaṃśaye /
sādhubhyo vai daridrebhyo dattvā mucyeta kilviṣāt //

śataṃ vai yastu kāmbhojānbrāhmaṇebhyaḥ prayacchati /
niyatebhyo mahīpāla sa ca pāpātpramucyate //

manorathaṃ tu yo dadyādekasmā api bhārata /
na kīrtayeta dattvā yaḥ sa ca pāpātpramucyate //

surāpānaṃ sakṛtkṛtvā yo'gnivarṇāṃ surāṃ pibet /
sa pāvayatyathātmānamiha loke paratra ca //

maruprapātaṃ prapatañjvalanaṃ vā samāviśan /
mahāprasthānamātiṣṭhanmucyate sarvakilbiṣaiḥ //

bṛhaspatisaveneṣṭvā surāpo brāhmaṇaḥ punaḥ /
samitiṃ brāhmaṇo gacchediti vai brahmaṇaḥ śrutiḥ //

bhūmipradānaṃ kuryādyaḥ surāṃ pītvā vimatsaraḥ /
punarna ca pibedrājansaṃskṛtaḥ sa ca śudhyati //

gurutalpī śilāṃ taptāmāyasīmabhisaṃviśet /
avakṛtyātmanaḥ śephaṃ pravrajedūrdhvadarśanaḥ //

śarīrasya vimokṣeṇa mucyate karmaṇo'śubhāt /
karmabhyo vipramucyante yatāḥ saṃvatsaraṃ striyaḥ //

mahāvrataṃ caredyastu dadyātsarvasvameva tu /
gurvarthe vā hato yuddhe sa mucyetkarmaṇo'śubhāt //

anṛtenopavartī cetpratiroddhā gurostathā /
upāhṛtya priyaṃ tasmai tasmātpāpātpramucyate //

avakīrṇanimittaṃ tu brahmahatyāvrataṃ caret /
gocarmavāsāḥ ṣaṇmāsāṃstathā mucyeta kilbiṣāt //

paradāropasevī tu parasyāpaharanvasu /
saṃvatsaraṃ vratī bhūtvā tathā mucyeta kilbiṣāt //

dhanaṃ tu yasyāpaharettasmai dadyātsamaṃ vasu /
vividhenābhyupāyena tadā mucyeta kilbiṣāt //

kṛcchrāddvādaśarātreṇa saṃyatātmā vrate sthitaḥ /
parivettā bhavetpūtaḥ parivittistathaiva ca //

niveśyaṃ tu punastena bhavettārayatā pitṝn /
na tu striyā bhaveddoṣo na tu sā tena lipyate //

bhojanaṃ hyantarāśuddhaṃ cāturmāsye vidhīyate /
striyastena praśudhyanti iti dharmavido viduḥ //

striyastvāśaṅkitāḥ pāpe nopagamyā vijānatā /
rajasā tā viśudhyante bhasmanā bhājanaṃ yathā //

pādajocchiṣṭakāṃsyaṃ yadgavā ghrātamathāpi vā /
gaṇḍūṣocchiṣṭamapi vā viśudhyeddaśabhistu tat //

catuṣpātsakalo dharmo brāhmaṇasya vidhīyate /
pādona iṣṭo rājanye tathā dharmo vidhīyate //

tathā vaiśye ca śūdre ca pādaḥ pādo vidhīyate /
vidyādevaṃvidhanaiṣāṃ gurulāghavaniścayam //

tiryagyonivadhaṃ kṛtvā drumāṃśchitvottarānbahūn /
trirātraṃ vāyubhakṣaḥ syātkarma ca prathayannaraḥ //

agamyāgamane rājanprāyaścittaṃ vidhīyate /
ārdravastreṇa ṣaṇmāsānvibhāvyaṃ bhasmaśāyinā //

evameva tu sarveṣāmakāryāṇāṃ vidhirbhavet /
brahmaṇoktena vidhinā dṛṣṭāntāgamahetubhiḥ //

sāvitrīmapyadhīyānaḥ śucau deśe mitāśanaḥ /
ahiṃso mandakaṃ jalpānmucyate sarvakilbiṣāt //

ahaḥ su satataṃ tiṣṭhedabhyākāśaṃ niśāḥ svapan /
trirahni trirniśāyāṃ ca savāsā jalamāviśet //

strīśūdrapatitāṃścāpi nābhibhāṣedbratānvitaḥ /
pāpānyajñānataḥ kṛtvā mucyedevaṃvrato dvijaḥ //

śubhāśubhaphalaṃ pretya labhate bhūtasākṣikam /
atiricyettayoryastu tatkartā labhate phalam //

tasmāddānena tapasā karmaṇā ca phalaṃ śubham /
vardhayedaśubhaṃ kṛtvā yathā syādatirekavān //

kuryācchubhāni karmāṇi nimitte pāpakarmaṇām /
dadyānnityaṃ ca vittāni tathā mucyeta kilbiṣāt //

anurūpaṃ hi pāpasya prāyaścittamudāhṛtam /
mahāpātakavarjaṃ tu prāyaścittaṃ vidhīyate //

bhakṣyābhakṣyeṣu cānyeṣu vācyāvācye tathaiva ca /
ajñānajñānayo rājanvihitānyanujānataḥ //

jānatā tu kṛtaṃ pāpaṃ guru sarvaṃ bhavatyuta /
ajñānātskhalite doṣe prāyaścittaṃ vidhīyate //

śakyate vidhinā pāpaṃ yathoktena vyapohitum /
āstike śraddadhāne ca vidhireṣa vidhīyate //

nāstikāśraddadhāneṣu puruṣeṣu kadācana /
dambhadveṣapradhāneṣu vidhireṣa na śiṣyate //

śiṣṭācāraśca diṣṭaśca dharmo dharmabhūtāṃ vara /
sevitavyo naravyāghra pretyeha ca hitepsunā //

sa rājanmokṣyate pāpāttena pūrṇena hetunā /
trāṇārthaṃ vā vadhe teṣāmathavā nṛpakarmaṇā //

athavā te ghṛṇā kācitprāyaścittaṃ cariṣyasi /
mā caivānāryajuṣṭena mṛtyunā nidhanaṃ gamaḥ //
vaiśampāyana uvāca /

evamukto bhagavatā dharmarājo yudhiṣṭhiraḥ /
cintayitvā muhūrtena pratyuvāca tapodhanam //