Mahabharata · Chapter 12.324

aiśvaryaṃ vā mahatprāpya dhanaṃ vā bharatarṣabha /
dīrghamāyuravāpyātha kathaṃ mṛtyumatikramet //

tapasā vā sumahatā karmaṇā vā śrutena vā /
rasāyanaprayogairvā kairnāpnoti jarāntakau //
bhīṣma uvāca /

atrāpyudāharantīmamitihāsaṃ purātanam /
bhikṣoḥ pañcaśikhasyeha saṃvādaṃ janakasya ca //

vaideho janako rājā maharṣi vedavittamam /
yaryapṛcchatpañcaśikhaṃ chinnadharmārthasaṃśayam //

kena vṛttena bhagavannatikrāmejjarāntakau /
tapasā vā'thavā buddhyā karmaṇā vā śrutena vā //

evamuktaḥ sa vaidehaṃ pratyuvācāparekṣavit /
nivṛttirnaitayorasti nātivṛttiḥ kathañcana //

na hyahāni nivartante na māsā na punaḥ kṣapāḥ /
soyaṃ prapadyate'dhvānaṃ cirāya dhruvamadhruvaḥ //

sarvabhūtasamucchedaḥ srotasevohyate sadā /
ūhyamānaṃ nimajjantamaplave kālasāgare //

jarāmṛtyumahāgrāhe na kaścidativartate /
naivāsya kaścidbhavati nāsau bhavati kasyacit //

pathi sangatamevedaṃ dārairanyaiśca bandhubhiḥ /
nāyamatyantasaṃvāso labdhapūrvo hi kenacit //

kṣipyante tenatenaiva niṣṭanantaḥ punaḥ punaḥ /
kālena jātā yātā hi vāyunevābhrasañcayāḥ //

jarāmṛtyū hi bhūtānāṃ khāditārau vṛkāviva /
balināṃ durbalānāṃ ca hrasvānāṃ mahatāmapi //

evambhūteṣu bhūteṣu nityabhūtādhraveṣu ca /
kathaṃ hi hṛṣyejjāteṣu mṛteṣu ca na sañjvaret //

kuto'hamāgataḥ ko'smi kva gamiṣyāmi kasya vā /
kasminsthitaḥ kva bhavitā kasmātkimanuśocasi //

draṣṭā svargasya na hyasti tathaiva narakasya ca /
āgamāstvanatikramya dadyāccaiva yajeta ca //