Mahabharata · Chapter 12.323

avyaktasthaṃ paraṃ yattatpṛṣṭaste'haṃ narādhipa /
paraṃ guhyamimaṃ praśnaṃ śṛṇuṣvāvahito nṛpa //

yathārṣeṇeha vidhinā caratā'vamatena ha /
mayā'dityādavāptāni yajūṃṣi mithilādhipa //

mahatā tapasā devastapiṣṇuḥ sevito mayā /
prītena cāhaṃ vibhunā sūryeṇoktastadā'nagha //

varaṃ vṛṇīṣva viprarṣe yadiṣṭaṃ te sudurlabham /
taṃ te dāsyāmi prītātmā matprasādo hi durlabhaḥ //

tataḥ praṇamya śirasā mayoktastapatāṃvaraḥ /
yajūṃṣi nopayuktāni kṣipramicchāmi veditum //

tato māṃ bhagavānāha vitariṣyāmi te dvija /
sarasvatīha vāgbhūtā śarīraṃ te pravekṣyati //

tato māmāha bhagavānāsyaṃ svaṃ vivṛtaṃ kuru /
vivṛtaṃ ca tato me'syaṃ praviṣṭā ca sarasvatī //

tato vidahyamāno'haṃ praviṣṭo'mbhastadā'nagha /
avijñānādamarṣācca bhāskarasya mahātmanaḥ //

tato vidahyamānaṃ māmuvāca bhagavānraviḥ /
muhūrtaṃ sahyatāṃ dāhastataḥ śītībhaviṣyati //

śītībhūtaṃ ca māṃ dṛṣṭvā bhagavānāha bhāskaraḥ /
pratibhāsyati te vedaḥ sakhilaḥ sottaro dvija //

kṛtsnaṃ śatapathaṃ caiva praṇeṣyasi dvijarṣabha /
tasyānte cāṣunarbhāve buddhistava bhaviṣyati //

prāpsyase ca yadiṣṭaṃ tatsāṅkhyayogepsitaṃ padam /
etāvaduktvā bhagavānastamevābhyavartata //

tato'nuvyāhṛtaṃ śrutvā gate deve vibhāvasau /
gṛhamāgatya saṃhṛṣṭo'cintayaṃ vai sarasvatīm //

tataḥ pravṛttā'tiśubhā svaravyañjanabhūṣitā /
onkāramāditaḥ kṛtvā mama devī sarasvatī //

tato'hamardhyaṃ vidhivatsarasvatyai nyavedayam /
paraṃ yatnamavāpyaiva niṣaṇṇastatparāyaṇaḥ //

tataḥ śatapathaṃ kṛtsnaṃ sarahasyaṃ sasangraham /
cakre sapariśeṣaṃ ca harṣeṇa parameṇa ha //

kṛtvā cādhyayanaṃ teṣāṃ śiṣyāṇāṃ śatamuttamam /
vipriyārthaṃ saśiṣyasya mātulasya mahātmanaḥ //

tataḥ saśiṣyeṇa mayā sūryeṇeva gabhastibhiḥ /
vyasto yajño mahārāja pitustava mahātmanaḥ //

miṣato devalasyāpi tato'rdhaṃ hṛtavānvasu /
svavedadakṣiṇāyārthe vimarde mātulena ha //

sumantunā'tha pailena tathā jaimininā ca vai /
pitrā te munibhiścaiva tato'hamanumānitaḥ //

daśa pañca ca prāptāni yajūṃṣyarkānmayā'nagha /
tathaiva romaharṣeṇa purāṇamavadhāritam //

bījametatpuraskṛtya devīṃ caiva sarasvatīm /
sūryasya cānubhāvena pravṛtto'haṃ narādhipa //

kartuṃ śatapathaṃ cedamapūrvaṃ ca kṛtaṃ mayā /
yathābhilapitaṃ mārgaṃ tathā taccopapāditam //

śiṣyāṇāmakhilaṃ kṛtsnamanujñātaṃ sasangraham /
sarve ca śiṣyāḥ śucayo gatāḥ paramaharṣitāḥ //

śākhāḥ pañcadaśemāstu vidyā bhāskaradarśitā /
pratiṣṭhāpya yathākāmaṃ vedyaṃ tadanucitayam //

kimatra brahmaṇyamṛtaṃ kiñca vedyamanuttamam /
cintayaṃstatra cāgatya gandharvo māmapṛcchata //

viśvāvasustato rājanvedāntajñānakovidaḥ /
caturviśāṃstato'pṛcchatpraśnānvedasya pārthiva //

pañcaviṃśatimaṃ praśnaṃ papracchānvīkṣikīṃ tadā / tathaiva puruṣavyāghra mitraṃ varuṇameva ca //

jñānaṃ jñeyaṃ tathā jño'jñaḥ kastapā atapāstathā /
sūryātisūrya iti ca vidyāvidye tathaiva ca //

vedyāvedyaṃ tathā rājannacalaṃ calameva ca /
avyayaṃ cākṣaraṃ kṣemyametatpraśnamanuttamam //

athoktaśca mahārāja rājā gandharvasattamaḥ /
pṛṣṭavānānupūrvyeṇa praśnamarthavaduttamam //

muhūrtamuṣyatāṃ tāvadyāvadenaṃ vicintaye /
bāḍhamityeva kṛtvā sa tūrṣṇīṃ gandharva āsthitaḥ //

tato'nucintayamahaṃ bhūyo devīṃ sarasvatīm /
manasā sa ca me praśno dadhno dhṛtamivoddhṛtaḥ //

tatropaniṣadaṃ caiva pariśeṣaṃ ca pārthiva /
mathnāmi manasā tāta dṛṣṭvā cānvīkṣikīṃ parām //

caturthī rājaśārdūla vidyaiṣā sāmparāyikī /
udīritā mayā tubhyaṃ pañcaviṃśā'dhitiṣṭhatā //

athoktastu mayā rājanrājā viśvāvasustadā /
śrūyatāṃ yadbhavānasmānpraśnaṃ sampṛṣṭavāniha //

viśvāviśveti yadidaṃ gandharvendrānupṛcchasi /
viśvāvyaktaṃ paraṃ vidyādbhūtabhavyabhayankaram //

triguṇaṃ guṇakartṛtvādviśvānyo niṣkalastathā /
viśvāviśveti mithunamevamevānudṛśyate //

avyaktaṃ prakṛtiḥ prāhuḥ puruṣeti ca nirguṇam /
tathaiva mitraṃ puruṣaṃ varuṇaṃ prakṛtiṃ tathā //

jñānaṃ tu prakṛtiṃ prāhurjñeyaṃ puruṣameva ca /
ajñamavyaktamityuktaṃ jñastu niṣkala ucyate //

kastapā atapāḥ proktaḥ kosau puruṣa ucyate /
tapāstu prakṛtiṃ prāhuratapā niṣkalaḥ smṛtaḥ //

sūryamavyaktamityuktamatisūryastu niṣkalaḥ / avidyā proktamavyaktaṃ vidyā puruṣa ucyate //

tathaivāvedyamavyaktaṃ vedyaḥ puruṣa ucyate /
calācalamiti proktaṃ tvayā tadapi me śṛṇu //

calāṃ tu prakṛtiṃ prāhuḥ kāraṇaṃ kṣepasargayoḥ /
akṣepasargayoḥ kartā niścalaḥ puruṣaḥ smṛtaḥ //

ajñāvubhau dhruvau caiva akṣayau cāpyubhāvapi //

ajau nityāvubhau prāhuradhyātmagatiniścayāḥ / akṣayatvātprajanane ajamatrāhuravyayam /
akṣayaṃ puruṣaṃ prāhuḥ kṣayo hyasya na vidyate //

guṇakṣayatvātprakṛtiḥ kartṛtvādakṣayaṃ budhāḥ /
eṣā te'nvīkṣikī vidyā caturthī sāmparāyikī //

vidyopetaṃ dhanaṃ kṛtvā karmaṇā nityakarmaṇi /
ekāntadarśanā vedāḥ sarve viśvāvaso smṛtāḥ //

jāyante ca mriyante ca yasminnete yataścyutāḥ /
vedārthaṃ ye na jānīte vedyaṃ gandharvasattama //

sāṅgopāṅgānapi yadi pañca vedānadhīyate /
vedavedyaṃ na jānīte vedabhāravaho hi saḥ //

yo ghṛtārthī kharākṣīraṃ mathedgandharvasattama /
viṣṭhāṃ tatrānupaśyeta na maṇ़ḍaṃ na ca vai ghṛtam //

tathā vedyamavedyaṃ ca vedavidyo na vindati /
sa kevalaṃ mūḍhamatirvedabhāravahaḥ smṛtaḥ //

draṣṭavyau nityamevaitau tatpareṇāntarātmanā /
yathā'sya janmanidhane na bhavetāṃ punaḥ punaḥ //

ajasraṃ janmanidhanaṃ cintayitvā trayīmimām /
parityajya kṣayamiha akṣayaṃ dharmamāsthitaḥ //

yadā'nupaśyate'tyantamahanyahani kāśyapa /
tadā sa kevalībhūtaḥ ṣaṅviṃśamanupaśyati //

anyaśca śāśvato vyaktastathā'nyaḥ pañcaviṃśakaḥ /
tatsthaṃ samanupaśyanti tamekamiti sādhavaḥ //

tenaitaṃ nābhinandanti pañcaviṃsakamacyutam /
janmamṛtyubhayādyogāḥ sākhyāśca paramaiṣiṇaḥ //
viśvāvasuruvāca /

pañcaviṃśaṃ yadetatte proktaṃ brāhmaṇasattama /
tadahaṃ na tathā vedmi tadbhavānvaktumarhati //

jaigīṣavyasyāsitasya devalasya mayā śrutam /
parāśarasya viprarṣervārṣagaṇyasya dhīmataḥ //

bhikṣoḥ pañcaśikhasyāsya kapilasya śukasya ca /
gautamasyāṣṭiṃṣeṇasya gargasya ca mahātmanaḥ //

nāradasyāsureścaiva pulastyasya ca dhīmataḥ /
sanatkumārasya tataḥ śukrasya ca mahātmanaḥ //

kaśyapasya pituścaiva pūrvameva mayā śrutam /
tadanantaraṃ ca rudrasya viśvarūpasya dhīmataḥ //

daivatebhyaḥ pitṛbhyaśca daiteyebhyastatastataḥ /
prāptametanmayā kṛtsnaṃ vedyaṃ nityaṃ vadantyuta //

tasmāttadvai bhavadbuddhyā śrotumicchāmi brāhmaṇa /
bhavānprabarhaḥ śāstrāṇāṃ pragalbhaścātibuddhimān //

na tavāviditaṃ kiñcidbhavāñśrutinidhiḥ smṛtaḥ /
kathyase devaloke ca pitṛloke ca brāhmaṇa //

brahmalokagatāścaiva kathayanti maharṣayaḥ /
patiśca tapatāṃ śaśvadādityastava bhāṣitā //

sāṅkhyajñānaṃ tvayā brahmannavāptaṃ kṛtsnameva ca /
tathaiva yogaśāstraṃ ca yājñavalkya viśeṣataḥ //

niḥsandigdhaṃ prabuddhastvaṃ budhyamānaścarācaram /
śrotumicchāmi tajjñānaṃ ghṛtaṃ maṇḍamayaṃ yathā //
yājñavalkya uvāca /

kṛtsnadhāriṇameva tvāṃ manye gandharvasattama /
jijñāsame ca māṃ rājaṃstannibodha yathāśrutam //

budhyamāno hi prakṛtiṃ budhyate pañcaviṃśakaḥ /
na tu budhyati gandharvaprakṛtiḥ pañcaviṃśakam //

anena pratibodhena pradhānaṃ pravadanti tat /
sāṅkhyayogārthatattvajñā yathnāśrutinidarśanāt //

paśyaṃstathaiva cāpaśyanpaśyatyanyaḥ sadā'nagha /
ṣaṅviṃśaṃ pañcaviṃśaṃ ca caturviśaṃ ca paśyati //

na tu paśyati paśyaṃstu yaścainamanupaśyati /
pañcaviṃśo'bhimanyeta nānyo'sti parato mama //

na caturviśako grāhyo manujairjñānadarśibhiḥ /
matsyo vodakamanveti pravarteta pravartanāt //

yathaiva budhyate matsyastathaiṣo'pyanubudhyate /
sa snehātsahavāsācca sābhimānācca nityaśaḥ //

sa nimajjati kālasya yadaikatvaṃ na budhyate /
unmajjati hi kālasya samatvenābhisaṃvṛtaḥ //

yadā tu manyate'nyo'hamanya eṣa iti dvajiḥ /
tadā sa kevalībhūtaḥ ṣaṅviṃśamanupaśyati //

anyaśca rājanparamastathā'nyaḥ pañcaviṃśakaḥ /
tatsthatvādanupaśyanti eka eveti sādhavaḥ //

tenaitannābhinandanti pañcaviṃśakamacyutam / janmamṛtyubhayādbhītā yogāḥ sāṅkhyāśca kāśyapa /
ṣaṅviṃśamanupaśyantaḥ śucayastatparāyaṇāḥ //

yadā sa kevalībhūtaḥ ṣaṅviṃśamanupaśyati /
tadā sa sarvavidvidvānna punarjanma vindati //

evamapratibuddhaśca budhyamānaśca te'nagha /
buddhiścoktā yathātattvaṃ mayā śrutinidarśanāt //

paśyāpaśyaṃ yo na paśyetkṣemyaṃ tatvaṃ ca kāśyapa /
kevalākevalaṃ cānyatpañcaviṃśaṃ paraṃ ca yat //
viśvāvasuruvāca /

tathyaṃ śubhaṃ caitaduktaṃ tvayā vibho / samyakkṣemyaṃ daivatādyaṃ yathāvat /
svastyakṣayaṃ bhavataścāstu nityaṃ buddhyā sadā buddhiyuktaṃ namasye //
yājñavalkya uvāca /

evamuktvā samprayāto divaṃ sa vibhrājanvai śrīmatā darśanena /
dṛṣṭaśca tuṣṭyā parayā'bhinandya pradakṣiṇaṃ mama kṛtvā mahātmā //

brahmādīnāṃ khecarāṇāṃ kṣitau ca ye cādhastātsaṃvasante narendra /
tatraiva taddarśanaṃ darśayanvai samyakkṣemyaṃ ye pathaṃ saṃśritā vai //

sāṅkhyāḥ sarve sāṅkhyadharme ratāśca tadvadyogā yogadharme ratāśca /
ye cāpyanye mokṣakāmā manuṣyā steṣāmetaddarśanaṃ jñānadṛṣṭam //

jñānānmokṣo jāyate rājasiṃha nāstyajñānādevamāhurnarendra /
tasmājjñānaṃ tattvato'nteṣitavyaṃ yenātmānaṃ mokṣayejjanmamṛtyoḥ //

prāpya jñānaṃ brāhmaṇātkṣatriyādvā vaiśyācchradrādapi nīcādabhīkṣṇam /
śraddhātavyaṃ śraddadhānena nityaṃ na śraddhinaṃ janmamṛtyū viśetām //

sarve varṇā brāhmaṇā brahmajāśca sarve nityaṃ vyāharante ca brahma /
yenātmānaṃ mokṣayejjanmamṛtyo stattvaṃ śāstraṃ brahmabuddhyā bravīmi / tattvaṃ śāstraṃ brahmabuddhyā bravīmi sarvaṃ viśvaṃ brahma caitatsamastam //

brahmāsyato brāhmaṇāḥ samprasūtā bāhubhyāṃ vai kṣatriyāḥ samprasūtāḥ /
nābhyāṃ vaiśyāḥ pādataścāpi śūdrāḥ sarve varṇā nānyathā veditavyāḥ //

ajñānataḥ karmayoniṃ bhajante tāntāṃ rājaṃste yathā yāntyabhāvam /
tathā varṇā jñānahīnāḥ patante ghorādajñānātprākṛtaṃ yonijālam //

tasmājjñānaṃ sarvato mārgitavyaṃ sarvatrasthaṃ caitaduktaṃ mayā te /
tatstho brahmā tasthivāṃścāparo ya stasmai nityaṃ mokṣamāhurnarendra //

yatte pṛṣṭaṃ tanmayā copadiṣṭaṃ yāthātathyaṃ tadviśoko bhajasva /
rājangacchasvaitadarthasya pāraṃ samyakproktaṃ svasti te tvastu nityam //
bhīṣma uvāca /

sa evamanuśiṣṭastu yājñavalkyena dhīmatā /
prītimānabhavadrājā mithilādhipatistadā //

gate munivare tasminkṛte cāpi pradakṣiṇam /
daivarātirnarapatirāsīnastatra mokṣavit //

gokoṭiṃ sparśayāmāsa hiraṇyasya tathaiva ca /
ratnāñjalimathaikaikaṃ brāhmaṇebhyo dadau tadā //

vedaharājyaṃ ca tadā pratiṣṭhāpya sutasya vai /
yatidharmamupāsyaṃścāpyavasanmithilādhipaḥ //

sāṅkhyajñānamadhīyāno yogaśāstraṃ ca kṛtsnaśaḥ /
dharmādharmaṃ ca rājendra prākṛtaṃ parigarhayan //

ananta iti kṛtvā sa nityaṃ kevalameva ca /
dharmādharmau puṇyapāpe satyāsatye tathaiva ca //

janmamṛtyū ca rājendra prākṛtaṃ tadacintayat /
brahmāvyaktasya karmedamiti nityaṃ narādhipa //

paśyanti yogāḥ sāṅkhyāśca svaśāstrakṛtalakṣaṇāḥ /
iṣṭāniṣṭavimuktaṃ hi tasthau brahma parātparam //

nityaṃ tadāhurvidvāṃsaḥ śuci tasmācchucirbhava /
dīyate yacca labhate dattaṃ yaccānumanyate //

avyakteneti taccintyamanyathā mā vicantaya / dadāti ca naraśreṣṭha pratigṛhṇāti yacca ha /
dadātyavyakta ityetatpratigṛhṇāti yacca vai //

ātmā hyevātmano hyekaḥ ko'nyastasmātparo bhavet /
evaṃ manyasva satatamanyathā mā vicintaya //

yasyāvyaktaṃ na viditaṃ saguṇaṃ nirguṇaṃ punaḥ /
tena tīrthāni yajñāśca sevitavyā vipaścitā //

na svādhyāyaistapobhirvā yajñairvā kurunandana /
labhate'vyaktikaṃ sthānaṃ jñātvā'vyaktaṃ mahīyate //

tathaiva mahataḥ sthānamāhankārikameva ca /
ahankārātparaṃ cāpi sthānāni samavāpnuyāt //

ye tvavyaktātparaṃ nityaṃ jānate śāstratatparāḥ /
janmamṛtyuvimuktaṃ ca vimuktaṃ sadasacca yat //

etanmayā'ptaṃ janakātpurastā ttenāpi cāptaṃ nṛpa yājñavalkyāt /
jñātaṃ viśiṣṭaṃ na tathā hi yajñā jñānena durgaṃ tarate na yajñaiḥ //

durgaṃ janma nidhanaṃ cāpi rāja nna bhautikaṃ jñānavido vadanti /
yajñaistapobhirniyamairvrataiśca divaṃ samāsādya patanti bhūmau //

tasmādupāsasva paraṃ mahacchuci śivaṃ vimokṣaṃ vimalaṃ pavitram /
kṣetraṃ jñātvā pārthiva jñānayajña mupāsya vai tattvamṛṣirbhaviṣyasi //

yudupaniṣadamupākarottathā'sau janakanṛpasya purā hi yājñavalkyaḥ /
yadupagaṇitaśāśvatāvyayaṃ ta cchubhamamṛtatvamaśokamarcchati //