Mahabharata · Chapter 12.322
tathaivotkramatāṃ sthānaṃ śṛṇuṣvāvahito nṛpa /
padbhyāmutkramamāṇasya vaiṣṇavaṃ sthānamucyate //
jaṅghābhyāṃ tu vasūndevānāpnuyāditi naḥ śrutam /
jānubhyāṃ ca mahābhāgānsādhyāndevānavāpnuyāt //
pāyunotkramamāṇastu maitraṃ sthānamavāpnuyāt /
pṛthivīṃ jaghanenātha ūrubhyāṃ ca prajāpatim //
pārśvābhyāṃ maruto devānnāsābhyāmindumeva ca /
bāhubhyāmindramityāhururasā rudrameva ca //
grīvayā tu muniśreṣṭhaṃ naramāpnotyanuttamam /
viśvedevānmukhenātha diśaḥ śrotreṇa cāpnuyāt //
ghrāṇena gandhavahanaṃ netrābhyāṃ sūryameva ca /
bhrūbhyāṃ caivāśvinau devau lalāṭena pitṛnatha //
brahmāṇamāpnoti vibhuṃ mūrdhnā devāgrajaṃ tathā /
etānyutkramaṇasthānānyuktāni mithileśvara //
arigani pravakṣyāmi vihitāni manīṣibhiḥ /
saṃvatsarāddhimokṣastu sambhaveta śarīriṇaḥ //
yo'rundhatīṃ na paśyeta dṛṣṭapūrvā kadācana /
tathaiva dhruvamatityāhuḥ pūrṇenduṃ dīpameva ca //
khaṇḍābhāsaṃ dakṣiṇataste'pi saṃvatsarāyuṣaḥ /
paracakṣuṣi cātmānaṃ ye na paśyanti pārthivaḥ //
ātmacchāyākṛtībhūtaṃ te'pi saṃvatsarāyuṣaḥ /
atidyutiratiprajñā aprajñā cādyutistathā //
prakṛtervikriyāpattiḥ ṣaṇmāsānmṛtyulakṣaṇam /
daivatānyavajānāti brāhmaṇaiśca virudhyate //
kṛṣṇaśyāvacchavicchāyaḥ ṣaṇmāsānmṛtyulakṣaṇam /
śīrṇanābhiṃ yathā cakraṃ chidraṃ somaṃ prapaśyati //
tathaiva ca sahasrāṃśuṃ saptarātreṇa mṛtyubhāk / śavagandhamupāghrāti saptarātreṇa mṛtyubhāk /
karṇanāsāvanamanaṃ dantadṛṣṭivirāgitāṃ //
karṇanāsāvanamanaṃ dantadṛṣṭivirāgitā //
sañjñālopo nirūṣmatvaṃ sadyomṛtyunidarśanam /
akasmācca sravedyasya vāmamakṣi narādhipa //
mūrdhrataścotpateddhūmaḥ sadyomṛtyunidarśanam /
etāvanti tvariṣṭāni viditvā mānavo'tmavān //
niśi cāhani cātmānaṃ yojayetparamātmani /
pratīkṣamāṇastatkālaṃ yaḥ kālaḥ prakṛto bhavet //
athāsya neṣṭaṃ maraṇaṃ sthātumicchedimāṃ kriyām /
sarvagandhānrasāṃścaiva dhārayīta samāhitaḥ //
tathā mṛtyumupādāya tatpareṇāndarātmanā / sa sāṅkhyadhāraṇaṃ caiva viditvā manujarṣabha /
jayecca mṛtyuṃ yogena tatpareṇāntarātmanā //
gacchetprāpyākṣayaṃ kṛtsnamajanma śivamavyayam /
śāśvataṃ sthānamacalaṃ duṣprāpamakṛtātmabhiḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0