Mahabharata · Chapter 12.317

tattvānāṃ sargasaṅkhyā ca kālasaṅkhyā tathaiva ca /
mayā proktā'nupūrveṇa saṃhāramapi me śṛṇu //

yatā saṃharate jantūnsasarja ca punaḥ punaḥ / anādinidhano brahmā nityaścākṣara eva ca /

ahaḥkṣayamatho buddhvā niśi svapnamanāstathā /
codayāmāsa bhagavānavyakto'hankṛtaṃ naram //

tataḥ śatasahasrāṃśuravyaktenābhicoditaḥ /
kṛtvā dvādaśadhā'tmānamādityo jvaladagnivat //

caturvidhaṃ prajājātaṃ nirdahatyāśu tejasā /
jarāyvaṇḍasvedajātamudbhijjaṃ sa narādhipa //

etadunmeṣamātreṇa vinaṣṭaṃ sthāṇujaṅgamam /
kūrmapṛṣṭhasamā bhūmirbhavatyatha samantataḥ //

jagaddagdhvā'mitabalaḥ kevalāṃ jagartī tataḥ /
ambhasā balinā kṣipramāpūrayati sarvaśaḥ //

tataḥ kālāgnimāsādya tadambho yāti sankṣayam /
vinaṣṭe'mbhasi rājendra jājvalatyanalo mahān //

tamaprameyātibalaṃ jvalamānaṃ vibhāvasum /
ūṣmāṇaṃ sarvabhūtānāṃ saptācimpamathāñjasā //

bhakṣayāmāsa bhagavānvāyuraṣṭātmako balī /
vicarannamitaprāṇastiryagūrdhvamadhastathā //

tamapratibalaṃ bhīmamākāśaṃ grasate punaḥ /
ākāśamapyabhinadanmano grasati cārikam //

mano grasati sarvātmā sohankāraḥ prajāpatiḥ /
ahankāro mahānātmā bhūtabhavyabhaviṣyavit //

tamapyanupamātmānaṃ viśvaṃ śambhuḥ prajāpatiḥ /
aṇimā laghimā prāptirīśāno jyotiravyayaḥ //

sarvataḥ pāṇipādaṃ tatsarvatokṣiśiromukham /
sarvataḥ śrutimalloke sarvamāvṛtya tiṣṭhati //

hṛdayaṃ sarvabhūtānāṃ parvaṇā'ṅguṣṭhamātrakaḥ /
aṇugrasatyananto hi mahātmā viśvamīśvaraḥ //

tataḥ samabhavatsarvamakṣayāvyayamavraṇam /
bhūtabhavyabhaviṣyāṇāṃ sraṣṭāramanaghaṃ tathā //

eṣopyayaste rājendra yathāvatsamudāhṛtaḥ /
adhyātmamadhibhūtaṃ ca śrūyatāṃ cādhidaivatam //