મહાભારત · અધ્યાય 12.317

તત્ત્વાનાં સર્ગસઙ્ખ્યા ચ કાલસઙ્ખ્યા તથૈવ ચ ।
મયા પ્રોક્તાઽનુપૂર્વેણ સંહારમપિ મે શૃણુ ॥

યતા સંહરતે જન્તૂન્સસર્જ ચ પુનઃ પુનઃ । અનાદિનિધનો બ્રહ્મા નિત્યશ્ચાક્ષર એવ ચ ।

અહઃક્ષયમથો બુદ્ધ્વા નિશિ સ્વપ્નમનાસ્તથા ।
ચોદયામાસ ભગવાનવ્યક્તોઽહન્કૃતં નરમ્ ॥

તતઃ શતસહસ્રાંશુરવ્યક્તેનાભિચોદિતઃ ।
કૃત્વા દ્વાદશધાઽત્માનમાદિત્યો જ્વલદગ્નિવત્ ॥

ચતુર્વિધં પ્રજાજાતં નિર્દહત્યાશુ તેજસા ।
જરાય્વણ્ડસ્વેદજાતમુદ્ભિજ્જં સ નરાધિપ ॥

એતદુન્મેષમાત્રેણ વિનષ્ટં સ્થાણુજઙ્ગમમ્ ।
કૂર્મપૃષ્ઠસમા ભૂમિર્ભવત્યથ સમન્તતઃ ॥

જગદ્દગ્ધ્વાઽમિતબલઃ કેવલાં જગર્તી તતઃ ।
અમ્ભસા બલિના ક્ષિપ્રમાપૂરયતિ સર્વશઃ ॥

તતઃ કાલાગ્નિમાસાદ્ય તદમ્ભો યાતિ સન્ક્ષયમ્ ।
વિનષ્ટેઽમ્ભસિ રાજેન્દ્ર જાજ્વલત્યનલો મહાન્ ॥

તમપ્રમેયાતિબલં જ્વલમાનં વિભાવસુમ્ ।
ઊષ્માણં સર્વભૂતાનાં સપ્તાચિમ્પમથાઞ્જસા ॥

ભક્ષયામાસ ભગવાન્વાયુરષ્ટાત્મકો બલી ।
વિચરન્નમિતપ્રાણસ્તિર્યગૂર્ધ્વમધસ્તથા ॥

તમપ્રતિબલં ભીમમાકાશં ગ્રસતે પુનઃ ।
આકાશમપ્યભિનદન્મનો ગ્રસતિ ચારિકમ્ ॥

મનો ગ્રસતિ સર્વાત્મા સોહન્કારઃ પ્રજાપતિઃ ।
અહન્કારો મહાનાત્મા ભૂતભવ્યભવિષ્યવિત્ ॥

તમપ્યનુપમાત્માનં વિશ્વં શમ્ભુઃ પ્રજાપતિઃ ।
અણિમા લઘિમા પ્રાપ્તિરીશાનો જ્યોતિરવ્યયઃ ॥

સર્વતઃ પાણિપાદં તત્સર્વતોક્ષિશિરોમુખમ્ ।
સર્વતઃ શ્રુતિમલ્લોકે સર્વમાવૃત્ય તિષ્ઠતિ ॥

હૃદયં સર્વભૂતાનાં પર્વણાઽઙ્ગુષ્ઠમાત્રકઃ ।
અણુગ્રસત્યનન્તો હિ મહાત્મા વિશ્વમીશ્વરઃ ॥

તતઃ સમભવત્સર્વમક્ષયાવ્યયમવ્રણમ્ ।
ભૂતભવ્યભવિષ્યાણાં સ્રષ્ટારમનઘં તથા ॥

એષોપ્યયસ્તે રાજેન્દ્ર યથાવત્સમુદાહૃતઃ ।
અધ્યાત્મમધિભૂતં ચ શ્રૂયતાં ચાધિદૈવતમ્ ॥