Mahabharata · Chapter 12.312

sāṅkhyadarśanametāvaduktaṃ te nṛpasattam /
vidyāvidye tvidānīṃ me tvaṃ nibodhānupūrvaśaḥ //

avidyāmāhuravyaktaṃ sargapralayadharmiṇīm /
sargapralayanirmukto vidyo vai pañcaviṃśakaḥ //

ekatvaṃ ca bahutvaṃ ca prakṛteranu tattvavit / parasparaṃ tu vidyāṃ vai tvaṃ nibodhānupūrvaśaḥ /
yathoktamṛṣibhistāta sāṅkhyasyāsya nidarśanam //

karmendriyāṇāṃ sarveṣāṃ vidyā buddhīndriyaṃ smṛtam /
buddhīndriyāṇāṃ ca tathā viśeṣā iti naḥ śrutam //

viśeṣāṇāṃ manasteṣāṃ vidyāmāhurmanīṣiṇaḥ /
manasaḥ pañcabhūtāni vidyā ityabhicakṣate //

ahankārastu bhūtānāṃ pañcānāṃ nātra saṃśayaḥ /
ahankārasya ca tathā buddhirvidyā nareśvara //

buddheḥ prakṛtiravyaktaṃ tattvānāṃ parameśvaram /
vidyā jñeyā naraśreṣṭha vidhiśca paramaḥ smṛtaḥ //

avyaktasya paraṃ prāhurvidyāṃ vai pañcaviṃśakam /
sarvasya sarvamityuktaṃ jñeyaṃ jñānasya pārthiva //

jñānamavyaktamityuktaṃ jñeyo vai pañcaviṃśakaḥ /
tathaiva jñānamavyaktaṃ vijñātā pañcaviṃśaka //

vidyāvidyārthitattvena mayoktā te viśeṣataḥ /
akṣaraṃ ca kṣaraṃ caiva yaduktaṃ tannibodha me //

ubhāvetau kṣarāvuktāvubhāvetau kṣarākṣarau /
kāraṇaṃ tu pravakṣyāmi yathākhyāto na jānataḥ //

anādinidhanāvetāvubhāveveśvarau matau /
tattvasañjñāvubhāvetau procyate jñānacintakaiḥ //

sargapralayadharmatvādavyaktaṃ prāhurakṣaram /
tadetadguṇasargāya vikurvāṇaṃ punaḥpunaḥ //

guṇānāṃ mahadādīnāmutpadyante paramparāḥ /
adhiṣṭhānaṃ kṣetramāhuretattatpañcaviṃśakam //

yadā tu guṇajālaṃ tadavyaktātmani sankṣipet /
tadā saha guṇaistaistu pañcaviṃśo vilīyate //

guṇā guṇeṣu līyante tadaikā prakṛtirbhavet /
kṣetrajño'pi yadā tāta tatkṣetre sampralīyate //

tadā'kṣaratvaṃ prakṛtirgacchate guṇasañjñitā /
nirguṇatvaṃ ca vaideha guṇeṣvaprativartanāt //

evameva ca kṣetrajñaḥ kṣetrajñānaparikṣayāt /
prakṛtyā nirguṇastveṣa ityevamanuśuśruma //

kṣaro bhavatyeṣa yadā tadā guṇavatī mithaḥ /
prakṛtiṃ tvibhajānāti nirguṇatvaṃ tathā'tmanaḥ //

tadā viśuddho bhavati prakṛteḥ parivarjanāt /
anyo'hamanyeyamiti yadā budhyati buddhimān //

tadaiṣā tvanyatāmeti na ca miśratvatāṃ vrajet /
prakṛtyā caiva rājendra miśro'nanyaśca dṛśyate //

yadā tu guṇajālaṃ tatprākṛtaṃ vijugupsate /
paśyate cāparaṃ paśyaṃ tadā paśyanna saṃsvajet //

kimahaṃ kṛtavānevaṃ yohaṃ kālamimaṃ janam / yadā matsyodakaṃ jñānamanuvartitavāṃstadā /
matsyo jālaṃ hyavijñānādanuvartitavāniha //

ahameva hi sammohādanyamanyaṃ janājjanam /
matsyo yathodakajñānādanuvartitavānaham //

matsyo'nyatvaṃ yathā jñānādudakānnābhimanyate /
ātmānaṃ tadvadajñānādanyatvaṃ caiva vedayaham //

mamāstu dhigabuddhasya yo'hamajña imaṃ punaḥ /
anuvartitavānmohādanyamanyaṃ janājjanam //

ayamatra bhevadbandhuranena saha me kṣamam /
sāmyamekatvatāṃ yāsye yādṛśastādṛśastvaham //

tulyatāmiha paśyāmi sadṛśo'hamanena vai /
ayaṃ hi vimalo'vyaktamahamīdṛśakastathā //

yo'hamajñānasammohādajñayā sampravṛttavān /
sasaṅgayā'haṃ niḥsaṅgaḥ sthitaḥ kālamimaṃ tvaham //

anayā'haṃ vaśībhūtaḥ kālametaṃ na buddhavān /
uccamadhyamanīcānāṃ tāmahaṃ kathamāvase //

samānayā na yāceha sahavāsamahaṃ katham /
gacchāmyabuddhabhāvatvādeṣedānīṃ sthiro bhave //

sahavāsaṃ na yāsyāmi kālametaddhi vañcanāt /
vañcitosmyanayā yaddhi nirvikāro vikārayā //

na cāyamaparādho'syā hyaparādho hyayaṃ mama /
yo'hamatrābhavaṃ saktaḥ parāṅbhukhamupasthitaḥ //

tatosmi bahurūpāsu sthito mūrtiṣvamūrtimān /
amūrtaścāpi mūrtātmā mamatvena pradharṣitaḥ //

prakṛteranayatvena tāsu tāsviha yoniṣu /
nirmamasya mamatvena kiṃ kṛtaṃ tāsu tāsu ca //

yonīṣu vartamānena naṣṭasañjñena cetasā /
na mamātrānayā kāryamahankārakṛtātmanā //

ātmānaṃ bahudhā kṛtvā yeyaṃ bhūyo yunakti mām /
idānīmeṣa buddhosmi nirmamo nirahankṛtaḥ //

mamatvamanayā nityamahankārakṛtātmakam /
apetyāhamimāṃ hitvā saṃśrayiṣye nirāmayam //

anena sāmyaṃ yāsyāmi nānayā'hamacetasā /
kṣaṇaṃ mama sahānena naikatvamanayā saha //

evaṃ paramasambodhātpañcaviṃśo'nubuddhavān /
akṣaratvaṃ niyaccheta tyaktvā kṣaramanāmayam //

avyaktaṃ vyaktakarmāṇaṃ saguṇaṃ nirguṇaṃ tathā /
nirguṇaṃ paramaṃ dṛṣṭvā tādṛgbhavati maithila //

akṣarakṣarayoretaduktaṃ tatvanidarśanam /
mayeha jñānasampannaṃ yathāśrūtinidarśanāt //

niḥsandigdhaṃ ca sūkṣmaṃ ca vibuddhaṃ vimalaṃ yathā /
pravakṣyāmi tute bhūyastannibodha yathāśrutam //

sāṅkhyayogau mayā proktau śāstradvayanidarśanāt /
yadeva śāstraṃ sāṅkhyoktaṃ yogadarśanameva tat //

prabodhanakaraṃ jñānaṃ sāṅkhyānāmavanīpate /
vispaṣṭaṃ procyate tatra śiṣyāṇāṃ hitakāmyayā //

pṛthakcaivamidaṃ śāstramityāhuḥ kuśalā janāḥ /
asmiṃśca śāstre yogānāṃ punardadhi punaḥ śaraḥ //

pañcaviṃśātparaṃ tattvaṃ na paśyati narādhipa /
sāṅkhyānāṃ tu paraṃ tattvaṃ yathāvadanuvarṇitam //

buddhamapratibuddhaṃ ca budhyamānaṃ ca tattvataḥ /
budhyamānaṃ ca buddhaṃ ca prāhuryoganidarśanam //