Mahabharata · Chapter 12.311

mānātvaikatvamityuktaṃ tvayaitadṛṣisattama /
paśyāmi vābhisandigdhametayorvai nidarśanam //

tathā'buddhaprabuddhābhyāṃ budhyamānasya cānagha /
sthūlabuddhyā na paśyāmi tattvametanna saṃśayaḥ //

akṣarakṣarayoryuktaṃ tvayā yadapi kāraṇam /
tadapyasthirabuddhitvātpranaṣṭamiva me'nagha //

tadettacchrotumicchāmi nānātvaikatvadarśanam /
prabuddhamaprabuddhaṃ ca budhyamānaṃ ca tattvataḥ //

vidyāvidye ca bhagavannakṣaraṃ kṣarameva ca /
sāṅkhyaṃ yogaṃ ca kārtsnyena pṛthakcaivāpṛthakca ha //
vasiṣṭha uvāca /

hanta te sampravakṣyāmi yadetadanupṛcchasi /
yogakṛtyaṃ mahārāja pṛthageva śṛṇuṣva me //

yogakṛtyaṃ tu yogānāṃ dhyānameva paraṃ balam /
taccāpi dvividhaṃ dhyānamāhurvedavido janāḥ //

ekāgratā ca manasaḥ prāṇāyāmastathaiva ca /
prāṇāyāmastu saguṇo nirguṇo manasastathā //

mūtrotsargapurīṣe ca bhojane ca narādhipa /
dvikālaṃ nābhiyujjīta śeṣaṃ yuñjīta tatparaḥ //

indriyāṇīndriyārthebhyo nivartya manasā muniḥ /
daśadvādaśabhirvāpi caturviśātparaṃ tataḥ //

taṃ codanābhirmatimānātmānaṃ codayedatha /
tiṣṭhantamajaraṃ yaṃ tu yattaduktaṃ manīṣibhiḥ //

taiścātmā satataṃ yojya ityevamanuśuśrum /
drutaṃ hyahīnamanaso nānyatheti viniścayaḥ //

vimuktaḥ sarvasaṅgebhyo ladhvāhāro jitendriyaḥ //
pūrvarātre'pararātre ca dhārayeta mano'tmani //

sthirīkṛtyendriyagrāmaṃ manasā mithileśvara /
mano buddhyā sthiraṃ kṛtvā pāṣāṇa iva niścalaḥ //

sthāṇuvaccāpyakampaḥ syāddāruvaccāpi niścalaḥ /
budhā vidhividhānajñāstadā yuktaṃ pracakṣate //

na śṛṇoti na cāghrāti na rasyati na paśyati /
na ca sparśaṃ vijānāti na sankalpayate manaḥ //

na cābhimanyate kiñcinna ca budhyati kāṣṭhavat /
tadā prakṛtimāpannaṃ yuktamāhurmanīṣiṇaḥ //

nirvāte hi yathā dīpyandīpastadvatprakāśate /
nirliṅgo vicalaścordhvaṃ na tiryaggatimāpnuyāt //

tadā tamanupaśyeta yasmindṛṣṭe tu kathyate /
hṛdayastho'ntarātmeti jñeyo jñastāta madvidhaiḥ //

vidhūma iva saptārcirāditya iva raśmimān /
vaidyuto'gnirivākāśe dṛśyate'tmā tathā'tmani //

sampaśyanti mahātmāno dhṛtimanto manīṣiṇaḥ /
brāhmaṇā brahmayonisthā hyayonimamṛtātmakam //

tadevāhuraṇubhyo'ṇu tanmahadbhyo mahattaram /
tattatra sarvabhūteṣu dhruvaṃ tiṣṭhanna dṛśyate //

buddhidravyeṇa dṛśyeta manodīpena lokakṛt /
mahatastamasastāta pāre tiṣṭhanna tāmasaḥ //

sa ca mānasa ityuktastatvajñairvedapāragaiḥ /
vimalo vitamaskaśca nirliṅgo'liṅgasañjñakaḥ //

yogametattu yogānāṃ manye yogasya lakṣaṇam /
evaṃ paśyaṃ prapaśyanti ātmasthamajaraṃ param //

yogadarśanametāvaduktaṃ te tatvato mayā /
sāṅkhyājñānaṃ pravakṣyāmi parisaṃkhyānadarśanam //

avyaktamāhuḥ prakṛtiṃ parāṃ prakṛtivādinaḥ /
tasmānmahatsamutpannaṃ dvitīyaṃ rājasattama //

ahankārastu mahatastṛtīya iti naḥ śrutam /
pañcabhūtānyahankārādāhuḥ sāṅkhyanidarśinaḥ //

etāḥ prakṛtayaścāṣṭau vikārāścāpi ṣoḍaśa /
pañca caiva viśeṣā vai tathā pañcendriyāṇi ca //

etāvadeva tattvānāṃ sāṅkhyā āhurmanīṣiṇaḥ /
sāṅkhye vidhividhānajñā nityaṃ sāṅkhyapathe ratāḥ //

yasmādyadabhijāyeta tattatraiva pralīyate /
līyante pratilomāni sṛjyante cāntarātmanā //

anulomena jāyante līyante pratilomataḥ /
guṇā guṇeṣu satataṃ sāgarasyormayo yathā //

sarvapralaya etāvānprakṛternṛpasattama /
ekatvaṃ pralaye cāsya bahutvaṃ ca yadā'sṛjat //

evameva ca rājendra vijñeyaṃ jñeyacintakaiḥ /
adhiṣṭhātā ya ityuktastasyāpyetannidarśanam //

ekatvaṃ ca bahutvaṃ ca prakṛteranutattvavān /
ekatvaṃ pralaye cāsya bahutvaṃ ca pravartanāt //

bahudhā'tmānamakarotprakṛtiḥ prasāvatmikā /
tacca kṣetraṃ mahānātmā pañcaviṃśo'dhitiṣṭhati //

adhiṣṭhāteti rājendra procyate yatisattamaiḥ /
adhiṣṭhānādadhiṣṭhātā kṣetrāṇāmiti naḥ śrutam //

kṣetraṃ jānāti cāvyaktaṃ kṣetrajña iti cocyate /
avyaktake pure śete puruṣaśceti kathyate //

anyadeva ca kṣetraṃ syādanyaḥ kṣetrajña ucyate /
kṣetramavyaktamityuktaṃ jñātā vai pañcaviṃśakaḥ //

anyadeva vaco jñānaṃ syādanyajjñeyamucyate /
jñānamavyaktamityuktaṃ jñeyo vai pañcaviṃśakaḥ //

avyaktaṃ kṣetramityuktaṃ yathāsatvaṃ tatheśvaram /
anīśvaramatattvaṃ ca tattvaṃ tatpañcaviṃśakam //

sāṅkhyadarśanametāvatparisaṅkhyānadarśanam /
sāṅkhyāḥ prakurvate caiva prakṛtiṃ ca pracakṣate //

tattvāni ca caturviśatparisaṃkhyāya tattvataḥ /
sāṅkhyāḥ saha prakṛtyā tu nistattvaḥ pañcaviṃśakaḥ //

pañcaviṃśo prabuddhātmā budhyamāna iti smṛtaḥ /
yadā tu budhyate'tmānaṃ tadā bhavati kevalaḥ //

samyagdarśanametāvadbhāṣitaṃ tava tattvataḥ /
evametadvijānantaḥ sāmyatāṃ pratiyāntyuta //

samyaṅgidarśanaṃ nāma pratyakṣaṃ prakṛtestathā /
guṇatattvādyathaitāni nirguṇo'nyastathā bhavet //

na tvevaṃ vartamānānāmavṛttirvidyate punaḥ /
vidyate'kṣarabhāvatve sa parātparamavyayam //

paśyerannekamatayo na sampakteṣu darśanam /
te'vyaktaṃ pratipadyante punaḥ punararindam //

sarvametadvijānanto nāsarvasya prabodhanāt /
vyaktībhūtā bhaviṣyanti vyaktasya vaśavartinaḥ //

sarvamavaryaktamityuktamasarvaḥ pañcaviṃśakaḥ /
ya enamabhijānanti na bhayaṃ teṣu vidyate //