Mahabharata · Chapter 12.310

evamapratibuddhatvādabuddhajanasevanāt /
sargakoṭisahasrāṇi maraṇāntāni gacchati //

dhāmnā dhāmasahasrāṇi patanāntāni gacchati /
tiryagyonau manuṣyatve devaloke tathaiva ca //

candramā iva bhūtānāṃ punastatra sahasraśaḥ /
līyate'pratibuddhatvādevameṣa hyabuddhimān //

kalā pañcadaśī yonistaddhāma iti manyate /
nityametaṃ vijānīhi somaṃ vai ṣauḍaśīṃ kalām //

kalayā jāyate jantuḥ punaḥ punarabuddhimān /
dhāma tasyopayuñjanti bhūya evopajāyate //

ṣoḍaśī tu kalā sūkṣmā sa soma upadhāryatām /
na tūpayujyate devairdevānupayunakti sā //

etāmakṣapayitvā hi jāyate nṛpasattama /
sā hyasya prakṛtirdṛṣṭā tatkṣayānmokṣa ucyate //

tadevaṃ ṣoḍaśakalaṃ dehamavyaktasañjñikam /
mamāyamiti manvānastatraiva parivartate //

pañcaviṃśastathaivātmā tasyaivāpratibodhanāt /
vimalaśca viśuddhaśca śuddhāmalaniṣevaṇāt //

aśuddha eva śuddhātmā tādṛgbhavati pārthiva /
abuddhasevanāccāpi buddho'pyabuddhatāṃ vrajet //

tathaivāpratibuddho'pi vijñeyo nṛpasattama /
prakṛtestriguṇāyāstu sevanātprākṛto bhavet //
karālajanaka uvāca /

akṣarakṣarayoreṣu dvayoḥ sambandha ucyate /
strīpuṃsoścāpi bhagavansambandhastadvaducyate //

ṛte tu puruṣaṃ neha strī garbhaṃ dhārayatyuta /
ṛte striyaṃ na puruṣo rūpaṃ nirvartayettathā //

anyonyasyābhisambandhādanyonyaguṇasaṃśrayāt /
rūpaṃ nirvartayatyetadevaṃ sarvāsu yoniṣu //

strīpuṃsorabhisambandhādanyonyaguṇasaṃśrayāt /
ṛtau nirvartyate rūpaṃ tadvakṣyāmi nidarśanam //

ye guṇāḥ puruṣasyeha ye ca mātṛguṇāstathā /
asthi snāyu ca majjānaṃ jānīmaḥ paitṛkāndvija //

tvaṅbhāṃsaṃ śoṇitaṃ ceti mātṛjānyapi śuśruma /
evametāddvijaśreṣṭha vede śāstre ca paṭhyate //

pramāṇaṃ yacca vedoktaṃ śāstroktaṃ yacca paṭhyate /
vedaśāstrapramāṇānāṃ pramāṇaṃ tatsanātanam //

[anyonyaguṇasaṃrodhādanyonyaguṇasaṃśrayāt.] evamevābhisambaddhau nityaṃ prakṛtipūruṣau //

paśyāmi bhagavaṃstasmānmokṣadharmo na vidyate / athavā'nantarakṛtaṃ kiñcideva nidarśanam /
tanmamācakṣva tattvena pratyakṣo hyasi sarvathā //

mokṣakāmā vayaṃ cāpi kāṅkṣāmo yadanāmayam /
adehamajaraṃ nityamatīndriyamanīśvaram //
vasiṣṭha uvāca /

yadetaduktaṃ bhavatā devaśāstranidarśanam /
evametadyathā caitanna gṛhṇāti tathā bhavān //

dhāryate hi tvayā grantha ubhayorvedaśāstrayoḥ /
na ca granthasya tattvajño yathāvattvaṃ nareśvaraḥ //

yo hi vede ca śāstre ca granthadhāraṇatatparaḥ /
na ca granthārthatattvajñastasya tadvāraṇaṃ vṛthā //

māraṃ sa vahate tasya granthasyārthaṃ na vetti yaḥ /
yastu granthārthatattvajño nāsya granthaguṇo vṛthā //

granthasyārthasya pṛṣṭaḥ saṃstādṛśo vaktumarhati /
yathātattvābhigamanādarthaṃ tasya sa vindati //

vastu saṃsatsu kathayedgranthārthasthūlabuddhimān /
sa kathaṃ mandavijñāno granthaṃ vakṣyati nirṇayāt //

nirṇayaṃ cāpi chidrātmā na taṃ vakṣyati tattvataḥ /
sopahāsyātmatāmeti yasmāccāvāptavānapi //

tasmāttvaṃ śṛṇu rājendra yathaitadanudṛśyate /
yāthātathyena sāṅkhyeṣu yogeṣau ca mahātmasu //

yadeva yogāḥ paśyanti sāṅkhyaistadavagamyate /
ekaṃ sāṅkhyaṃ ca yogaṃ ca yaḥ paśyati sa buddhimān //

tvaṅbhāṃsaṃ rughiraṃ medaḥ pittaṃ majjā ca snāyu ca /
etadaindriyakaṃ tāta tadbhavānidamāha mām //

dravyāddravyasya nirvṛttirindriyādindriyaṃ tathā /
dehāddehamavāpnoti bījādvījaṃ tathaiva ca //

nirindriyasyābījasya nirdravyasyāpyadehinaḥ /
kathaṃ guṇā bhaviṣyanti nirguṇatvānmahātmanaḥ //

guṇā guṇeṣu jāyante tatraiva niviśanti ca /
evaṃ guṇāḥ prakṛtito jāyante niviśanti ca //

tvaṅbhāṃsaṃ rudhiraṃ medaḥ pittaṃ majjā'sthi snāyu ca /
aṣṭau tānyatha śukreṇa jānīhi prākṛtāni vai //

pumāṃścaivāpumāṃścaiva trailiṅgyaṃ prākṛtaṃ smṛtam /
na vā pumānpumāṃścaiva sa liṅgītyabhidhīyate //

aliṅgātprakṛtirliṅgairupālabhyati sātmajaiḥ /
yathā puṣpaphalairnityamṛtavo mūrtayastathā //

evamapyanumānena hyaliṅgamupalabhyate /
pañcaviṃśatimastāta liṅgeṣu niyatātmakaḥ //

anādinidhano'nantaḥ sarvadarśī nirāmayaḥ /
kevalaṃ tvabhimānitvādaguṇeṣvaguṇā ucyate //

guṇā guṇavataḥ santi nirguṇasya kuto guṇāḥ /
tasmādevaṃ vijānanti ye janā guṇadarśinaḥ //

yadā tveṣa guṇaniva prakṛtāvanumanyate /
tadā sa guṇavāneva paramaṃ nānupaśyati //

yattaṃ buddheḥ paraṃ prāhuḥ sāṅkhyayogāśca sarvaśaḥ /
budhyamānaṃ mahāprājñamabuddhaparivarjanāt //

aprabuddhamathāvyaktaṃ guṇaṃ prāhuranīśvaram /
nirguṇaṃ ceśvaraṃ nityamadhiṣṭhātārameva ca //

prakṛteśca guṇānāṃ ca pañcaviṃśatikaṃ budhāḥ /
sāṅkhyayoge ca kuśalā budhyante paramaiṣiṇaḥ //

yadā prabuddhāstvavyaktamavasthājanmabhīravaḥ /
budhyamānaṃ prabuddhena gamayanti samantataḥ //

etannidarśanaṃ samyagasamyakcārthadarśanam /
budhyamānāprabuddhānā pṛthagpṛthagarindam //

paraspareṇaitaduktaṃ kṣarākṣaranidarśanam /
ekatvamakṣaraṃ prāhurnānātvaṃ kṣaramucyate //

pañcaviṃśatiniṣṭho'yaṃ yadā samyakpracakṣate /
ekatvaṃ darśanaṃ cāsya nānātvaṃ cāpyadarśanam //

tattvanistattvayoretatpṛthagneva nidarśanam /
pañcaviṃśatitatvaṃ tu tattvamāhurmanīṣiṇaḥ //

nistattvaṃ pañcaviṃśasya paramāhurnidarśanam /
vargasya vargamācāraṃ tattvaṃ tattvātsanātanam //