Mahabharata · Chapter 12.307

sampaktvayā'yaṃ nṛpate varṇitaḥ śiṣṭasammataḥ /
yogamārgo yathānyāyaṃ śiṣyāyeha hitaiṣiṇā //

sāṅkhye tvidānīṃ kārtsnyena vidhiṃ prabrūhi pṛcchate /
triṣu lokeṣu yajjñānaṃ sarvaṃ tadviditaṃ hi te //
bhīṣma uvāca /

śṛṇu me tvamidaṃ kṛtsnaṃ sāṅkhyānāṃ viditātmanām /
viditaṃ yatibhiḥ sarvaiḥ kapilādibhirīśvaraiḥ //

yasminnavibhramāḥ keciddṛśyante manujarṣabha /
guṇāśca yasminbahavo doṣahāniśca kevalā //

jñānena parisaṅkhyāya sadoṣānviṣayānnṛpa /
mānuṣāndurjayānkṛtsnānpaiśācānviṣayāṃstathā //

rākṣasānviṣayāñjñātvā yakṣāṇāṃ viṣayāṃstathā /
viṣayānauragāñjñātvā gāndharvaviṣayāṃstathā //

pitṛṇāṃ viṣayāñjñātvā tiryakṣu caratāṃ nṛpa /
suparṇaviṣayāñjñātvā marutāṃ viṣayāṃstathā //

rājarṣiviṣayāñjñātvā brahmarṣiviṣayāṃstathā /
āsurānviṣayāñjñātvā vaiśvadevāṃstathaiva ca //

devarṣiviṣayāñjñātvā yogānāmapi ceśvarān /
prajāpatīnāṃ viṣayānbrahmaṇo viṣayāṃstathā //

āyuṣaśca paraṃ kālaṃ loke vijñāya tattvataḥ /
sukhasya ca paraṃ tattvaṃ vijñāya vadatāṃ vara //

prāpte kāle ca yadduḥkhaṃ satataṃ viṣayaiṣiṇām /
tiryakṣu patatāṃ duḥkhaṃ patatāṃ narake ca yat //

svargasya ca guṇānkṛtsnāndoṣānsarvāṃśca bhārata / parisaṃkhyānasaṃkhyānaṃ satvaṃ sāṃkhyaguṇātmakam /
vedavāde ye'pi doṣā guṇā ye cāpi vaidikāḥ //

jñānayoge ca ye doṣā guṇā yoge ca ye nṛpa / sāṅkhyajñāne ca ye doṣāstathaiva ca guṇā nṛpa /
itareṣu ca ye doṣā guṇāsteṣu ca bhārata //

satvaṃ daśaguṇaṃ jñātvā rajo navaguṇaṃ tathā /
tamaścāṣṭaguṇaṃ jñātvā vṛddhiṃ saptaguṇāṃ tathā //

ṣaṅguṇaṃ ca mano jñātvā nabhaḥ pañcaguṇaṃ tathā /
buddhiṃ caturguṇāṃ jñātvā tamaśca triguṇaṃ tathā //

dviguṇaṃ ca rajo jñātvā satvamekaguṇaṃ punaḥ /
sargaṃ vijñāya tattvena pralaye prekṣya cātmanaḥ //

jñānavijñānasampannāḥ kāraṇairbhāvitāḥ śubhāḥ /
prāpnuvanti śubhaṃ mokṣaṃ sūkṣmā iva nabhaḥ param //

rūpeṇa dṛṣṭiṃ saṃyuktāṃ ghrāṇaṃ gandhaguṇena ca /
śabde saktaṃ tathā śrotraṃ jihvā rasaguṇeṣu ca //

tvacaṃ sparśe tathā saktāṃ vāyuṃ nabhasi cāśritam /
mohaṃ tamasi saṃyuktaṃ lobhamartheṣu saṃśritam //

viṣṇau krāntaṃ balaṃ śakre koṣṭhe saktaṃ tathā'nalam /
apsu devīṃ samāsaktāmapastejasi saṃśritāḥ //

tejaḥ sūkṣme ca saṃyuktaṃ vāyuṃ nabhasi cāśritam /
nabho mahati saṃyuktaṃ mahadbuddhau ca saṃśritam //

buddhiṃ tamasi saṃsaktāṃ tamo rajasi saṃśritam /
rajaḥ satve tathā saktaṃ satvaṃ saktaṃ tathā'tmani //

saktamātmānamīśe ca deve nārāyaṇe tathā /
devaṃ mokṣe ca saṃsaktaṃ mokṣaṃ saktaṃ tu na kvacit //

jñātvā satvayutaṃ dehaṃ vṛtaṃ ṣoḍaśabhirguṇaiḥ /
svabhāvaṃ cetanāṃ caiva jñātvā dehasamāśrite //

madhyasthamekamātmānaṃ pāpaṃ yasminna vidyate /
dvitīyaṃ karma vijñāya nṛpate viṣayaiṣiṇām //

indriyāṇīndriyārthāṃśca sarvānātmani saṃśritān /
durlabhatvaṃ ca mokṣasya vijñāya śrutipūrvakam //

prāṇāpānau samānaṃ ca vyānodānau ca tattvataḥ /
āvahaṃ cānilaṃ jñātvā pravahaṃ cānilaṃ punaḥ //

saptavātāṃstathā śeṣānsaptadhā vihitānpunaḥ /
prajāpatīnṛṣīṃścaiva mārgāṃścaiva bahūnvarān //

saptarṣīśca bahūñjñātvā rājarṣīśca parantapa /
surarṣīnmahataścānyānbrahmarṣīnsūryasannibhān //

aiśvaryāccyāvitāndṛṣṭvā kālena mahatā nṛpa /
mahatāṃ bhūtasaṅghānāṃ śrutvā nāśaṃ ca pārthiva //

gatiṃ cāpyaśubhāṃ jñātvā nṛpate pāpakarmiṇām /
vaitaraṇyāṃ ca yadduḥkhaṃ patitānāṃ yamakṣaye //

yonīṣu ca vicitrāsu saṃsārānaśubhāṃstathā /
jaṭhare cāśubhe vāsaṃ śoṇitodakabhājane //

śleṣmamūtrapurīṣe ca tīvragandhasamanvite /
śukraśoṇitasanghāte majjāsnāyuparigrahe //

sirāśatasamākīrṇe navadvāre pure'śucau /
vijñāyāhitamātmānaṃ yogāṃśca vividhānnṛpa //

tāmasānāṃ ca jantūnāṃ ramaṇīyāvṛtātmanām /
sātvikānāṃ ca jantūnāṃ kutsitaṃ bharatarṣabha //

garhitaṃ mahatāmarthe sāṅkhyānāṃ viditātmanām /
upaplavāṃstathā ghorāñśaśinastejasastathā //

tārāṇāṃ patanaṃ dṛṣṭvā nakṣatrāṇāṃ ca paryayam /
dvandvānāṃ viprayogaṃ ca vijñāya kṛpaṇa nṛpa //

anyonyabhakṣaṇaṃ dṛṣṭvā bhūtānāmapi cāśubham /
bālye mohaṃ ca vijñāya kṣayaṃ dehasya cāśubham //

rāge mohe ca samprāpte kvacitsatvaṃ samāśritam /
sahasreṣu naraḥ kaścinmokṣabuddhiṃ samāśritaḥ //

durlabhatvaṃ ca mokṣasya vijñāya śrutipūrvakam /
bahumānamalabdheṣu labdhe madhyasthatāṃ punaḥ //

viṣayāṇāṃ ca daurātmyaṃ vijñāya nṛpate punaḥ /
gatāsūnāṃ ca kaunteya dehāndṛṣṭvā tathā'śubhān //

vāsaṃ kuleṣu jantūnāṃ duḥkhaṃ vijñāya bhārata /
brahmaghnānāṃ gatiṃ jñātvā patitānāṃ sudāruṇām //

surāpāne ca saktānāṃ brāhmaṇānāṃ durātmanām /
gurūdāraprasaktānāṃ gatiṃ vijñāya cāśubhām //

jananīṣu ca vartante yena samyagyudhiṣṭhira /
sadevakeṣu lokeṣu yena vartanti mānavāḥ //

tena jñānena vijñāya gatiṃ cāśubhakarmaṇām tiryagyonigatānāṃ ca vijñāya ca gatiṃ pṛthak //

vedavādāṃstathā citrānṛtūnāṃ paryayāṃstathā /
kṣayaṃ saṃvatsarāṇāṃ ca māsānāṃ ca kṣayaṃ tathā //

pakṣakṣayaṃ tathā dṛṣṭvā divasānāṃ ca sankṣayam /
kṣayaṃ vṛddhiṃ ca candrasya dṛṣṭvā pratyakṣatastathā //

vṛddhiṃ dṛṣṭvā samudrāṇāṃ kṣayaṃ teṣāṃ tathā punaḥ /
kṣayaṃ dhanānāṃ dṛṣṭvā ca punarvṛddhiṃ tathaiva ca //

saṃyogānāṃ kṣayaṃ dṛṣṭvā yugānāṃ ca viśeṣataḥ /
kṣayaṃ ca dṛṣṭvā śailānāṃ kṣayaṃ ca saritāṃ tathā //

varṇānāṃ ca kṣayaṃ dṛṣṭvā kṣayāntaṃ ca punaḥ punaḥ /
jarā mṛtyustathā janma dṛṣṭvā duḥkhāni caiva ha //

dehadoṣāṃstathā jñātvā teṣāṃ duḥkhaṃ ca tattvataḥ /
dehaviklavatāṃ caiva samyagvijñāya tattvataḥ //

ātmadoṣāṃśca vijñāya sarvānātmani saṃśritān / svadehādutthitāngabdhāṃstathā vijñāya cāśubhān /
mūtraśleṣmapurīṣādīnsvedajāṃśca sukutsitān //
yudhiṣṭhira uvāca /

kānsvagātrodbhavāndoṣānpaśyasyamitavikrama /
etanme saṃśayaṃ kṛtsnaṃ vaktumarhasi tattvataḥ //
bhīṣma uvāca /

pañca doṣānprabho dehe pravadanti manīṣiṇaḥ /
mārgajñāḥ kāpilāḥ sāṅkhyāḥ śṛṇu tānarisūdana //

kāmakrodhau bhayaṃ nidrā pañcamaḥ śvāsa ucyate //

ete doṣāḥ śarīreṣu dṛśyante sarvadehinām /
chindanti kṣamayā krodhaṃ kāmaṃ sankalpavarjanāt //

satvasaṃsevanānnidrāmapramādādbhayaṃ tathā /
chindanti pañcamaṃ śvāsamalpāhāratayā nṛpa //

guṇānguṇaśatairjñātvā doṣāndoṣaśatairapi /
hetūnhetuśataiścitraiścitrānvijñāya tattvataḥ //

apāṃ phenopamaṃ lokaṃ viṣṇormāyāśataiśvitam /
citrabhittipratīkāśaṃ nalasāramanarthakam //

tamaḥ śvabhranibhaṃ dṛṣṭvā varṣabudbudasannibham /
kleśaprāyaṃ sukhāddhīnaṃ nāśottaramihāvaśam //

rajastamasi sammagnaṃ paṅke dvīpamivāvaśam /
sāṅkhyā rājanmahāprājñāstyaktvā dehaṃ prajākṛtaṃ //

jñānayogena sāṅkhyena vyāpinā mahatā nṛpa /
rājasānaśubhāngandhāṃstāmmasāṃśca tathāvidhān //

puṇyāṃśca sātvikāngandhānsparśajāndehasaṃśritān /
chittvā'śu jñānaśastreṇa tapo daṇḍena bhārata //

tato duḥkhodadhiṃ ghoraṃ cintāśokamahāhradam /
vyādhimṛtyumahāgrāhaṃ mahābhayamahoragam //

tamaḥkūrmaṃ rajomīnaṃ prajñayā santarantyuta /
snehapaṅkaṃ jarādurgaṃ jñānadīpamarindam //

karmāgādhaṃ satyatīraṃ sthitavratamarindam /
hiṃsāśīghramahāvegaṃ nānārasasamākaram //

nānāprītimahāratnaṃ duḥkhajvarasamīraṇam /
śokatṛṣṇāmahāvartaṃ tīkṣṇavyādhimahāgajam //

asthisanghātasanghaṭṭaṃ śleṣmaphenamarindam /
dānamuktākaraṃ ghoraṃ śoṇitahradavidrumam //

hasitotkruṣṭanirghoṣaṃ nānājñānasudustaram / rodanāśrumalakṣāraṃ saṅgatyāgaparāyaṇam /

putradārajalaukaughaṃ matribāndhavapattanam /
ahiṃsāsatyamaryādaṃ prāṇatyāgamahormiṇam //

vedāntagamanadvīpaṃ sarvabhūtadayodakam /
mokṣadurlābhaviṣayaṃ va़ḍavāmukhasāgaram //

taranti munayaḥ siddhā jñānayānena bhārata /
tīrtvā'tidustaraṃ janma viśanti vimalaṃ nabhaḥ //

tatra tānsukṛtīnsāṅkhyānsūryo vahati raśmibhiḥ /
padmatantuvadāviśya prasahya viṣayānnṛpa //

tatra tānpravaho vāyuḥ pratigṛhṇāti bhārata /
vītarāgānyatīnsiddhānvīryayuktāṃstapodhanān //

sūkṣmaḥ śītaḥ sugandhī ca sukhasparśaśca bhārata / saptānāṃ marutāṃ śreṣṭho lokāngacchati yaḥ śubhān /
sa tānvahati kaunteya nabhasaḥ paramāṃ gatim //

nabho vahati lokeśa rajasaḥ paramāṃ gatim / tamo vahati lokeśa rajasaḥ paramāṃ gatim /
rajo vahati rājendra satvasya paramāṃ gatim //

satvaṃ vahati rājendra paraṃ nārāyaṇaṃ prabhum /
prabhurvahati śuddhātmā paramātmānamātmanā //

paramātmānamāsādya tadbhūtā yatayo'malāḥ /
amṛtatvāya kalpante na nivartanti vā vibho //

paramā sā gatiḥ pārtha nirdvandvānāṃ mahātmanām /
satyārjavaratānāṃ vai sarvabhūtadayāvatām //
yudhiṣṭhira uvāca /

sthānamuttamamāsādya bhagavantaṃ sthiravratāḥ /
ājanmamaraṇaṃ vā te smarantyuta na vā'nagha //

yadatra tathyaṃ tanme tvaṃ yathāvadvaktumarhasi /
tvadṛte puruṣaṃ nānyaṃ praṣṭumarhāmi kaurava //

mokṣe doṣo mahāneṣa prāpya siddhigatānṛṣīn /
yadi tatraiva vijñāne vartante yatayaḥ pare //

pravṛttilakṣaṇaṃ dharmaṃ paśyāmi paramaṃ nṛpa / magnasya hi pare jñāne kiṃ na duḥkhataraṃ bhavet /
bhīṣma uvāca /

yathānyāyaṃ tvayā tāta praśnaḥ pṛṣṭaḥ susankaṭaḥ /
budhānāmapi sammohaḥ praśne'sminbharatarṣabha //

atrāpi tattvaṃ paramaṃ śṛṇu samyaṅbhayeritam /
buddhiśca paramā yatra kāpilānāṃ mahātmanām //

indriyāṇyeva budhyante svadehe dehināṃ nṛpa /
kāraṇānyātmanastāni sūkṣmaḥ paśyati taistu saḥ //

ātmanā viprahīṇāni kāṣṭhakuḍyasamāni tu /
vinaśyanti na sandehaḥ phenā iva mahārṇave //

indriyaiḥ saha suptasya dehinaḥ śatrutāpana /
sūkṣmaścarati sarvatra nabhasīva samīraṇaḥ //

sa paśyati yathānyāyaṃ sparśānspṛśati vā vibho /
budhyamāno yathāpūrvamakhileneha bhārata //

indriyāṇīha sarvāṇi sve sve sthāne yathāvidhi /
anīśatvātpralīyante sarpā hataviṣā iva //

indriyāṇāṃ tu sarveṣāṃ svasthāneṣveva sarvaśaḥ /
ākramya gatayaḥ sūkṣmāścaratyātmā na saṃśayaḥ //

satvasya ca guṇānkṛtsnānnajasaśca guṇānpunaḥ /
guṇāṃśca tamasaḥ sarvānguṇānbuddheśca bhārata //

guṇāṃśca manasaścāpi nabhasaśca guṇāṃśca saḥ /
guṇānvāyośca dharmātmaṃstejasāṃ ca guṇānpunaḥ //

apāṃ guṇāṃstathā pārtha pārthiṃvāṃśca guṇānapi /
sarvātmanā guṇairvyāptaḥ kṣetrajñeṣu yudhiṣṭhira //

ātmā ca yāti kṣetrajñaṃ karmaṇī ca śubhāśubhe /
śiṣyā iva mahātmānamindriyāṇi ca taṃ prabho //

prakṛtiṃ cāpyatikramya gacchatyātmānamavyayam /
paraṃ nārāyaṇaṃ devaṃ nirdvandvaṃ prakṛteḥ param //

vimuktaḥ sarvapāpebhyaḥ praviṣṭastamanāmayam /
paramātmānamaguṇaṃ na nivartati bhārata //

śiṣṭaṃ tatra manastāta indriyāṇi ca bhārata /
āgacchanti yathākālaṃ guroḥ sandeśakāriṇaḥ //

śakyaṃ cālpena kālena śāntiṃ prāptuṃ guṇārthinā /
evamuktena kaunteya yuktajñānena mokṣiṇā //

sāṅkhyā rājanmahāprājñā gacchanti paramāṃ gatim /
jñānenānena kaunteya tulyaṃ jñānaṃ na vidyate //

atra te saṃśayo mā bhūjjñānaṃ sāṃkhyaṃ paraṃ matam /
akṣaraṃ dhruvamavyaktaṃ pūrṇaṃ brahma sanātanam //

anādimadhyanidhanaṃ nirdvandvaṃ kartṛ śāśvatam /
kūṭasthaṃ caiva nityaṃ ca yadvadanti śamātmakāḥ //

yataḥ sarvāḥ pravartante sargapralayavikriyāḥ /
yacca śaṃsanti śāstreṣu vadanti paramarṣayaḥ //

sarve viprāśca devāśca tathā śamavido janāḥ /
brahmaṇyaṃ paramaṃ devamanantaṃ paramacyutam //

prārthayantaśca taṃ viprā vadanti guṇabuddhayaḥ /
samyagyuktāstathā yogāḥ sāṅkhyāścāmitadarśanāḥ //

amūrtestasya kaunteya sāṅkhyaṃ mūrtiriti śrutiḥ /
abhijñānāni tasyāhurmataṃ hi bharatarṣabha //

dvividhānīha bhūtāni pṛthivyāṃ pṛthivīpate /
jaṅgamājaṅgamākhyāni jaṅgamaṃ tu viśiṣyate //

jñānaṃ mahadyaddhi mahatsu rāja nvedeṣu sāṅkhyeṣu tathaiva yoge /
yaccāpi dṛṣṭaṃ vividhaṃ purāṇe sāṅkhyāgataṃ tannikhilaṃ narendra //

yaccetihāseṣu mahatsu dṛṣṭaṃ yaccārthaśāstre nṛpa śiṣṭajuṣṭe /
jñānaṃ ca loke yadihāsti kiñci tsāṅkhyāgataṃ tacca mahanmahātman //

śamaśca dṛṣṭaḥ paramaṃ balaṃ ca jñānaṃ ca sāṅkhyaṃ ca yathāvaduktam /
tapāṃsi sūkṣmāṇi sukhāni caiva sāṅkhye yathāvadvihitāni rājan //

viparyaye tasya hi pārtha devā ngacchanti sāṅkhyāḥ satataṃ sukhena /
tāṃścānusañcārya tataḥ kṛtārthāḥ patanti vipreṣu yateṣu bhūyaḥ //

hitvā ca dehaṃ praviśanti mokṣaṃ divaukaso dyāmiva pārtha sāṅkhyāḥ /
ato'dhikaṃ te'bhiratā mahārthe sāṅkhye dvijāḥ pārthiva śiṣṭajuṣṭe //

teṣāṃ na tiryaggamanaṃ hi dṛṣṭaṃ nārvāggatiḥ pāpakṛtādhivāsaḥ /
ca cābudhānāmapi te dvijātayo ye jñānametannṛpate'nuraktāḥ //

sāṅkhyaṃ viśālaṃ paramaṃ purāṇaṃ mahārṇavaṃ vimalamudāharanti
kṛtsnaṃ ca sāṅkhyaṃ nṛpate mahātmā nārāyaṇo dhārayate'prameyam //

etanmayoktaṃ naradeva tattvaṃ nārāyaṇo viśvamidaṃ purāṇam /
sa sargakāle ca karoti sargaṃ saṃhārakāle ca tadatti bhūyaḥ //

saṃhṛtya sarvaṃ nijadehasaṃsthaṃ kṛtvā'psu śete jagadantarātmā //