Mahabharata · Chapter 12.306

sāṅkhye yoge ca me tāta viśeṣaṃ vaktumarhasi /
tava dharmajña sarvaṃ hi viditaṃ kurusattama //
bhīṣma uvāca /

sāṅkhyāḥ sāṅkhyaṃ praśaṃsanti yogā yogaṃ dvijātayaḥ /
vadanti kāraṇaṃ śreṣṭhaṃ svapakṣodbhāvanāya vai //

anīśvaraḥ kathaṃ mucyedityevaṃ śatrusūdana /
vadanti kāraṇaśraiṣṭhyaṃ yogāḥ samyaṅbhanīṣiṇaḥ //

vadanti kāraṇaṃ cedaṃ sāṅkhyāḥ samyagdvijātayaḥ /
vijñāyeha gatīḥ sarvā virakto viṣayeṣu yaḥ //

ūrdhvaṃ ca dehātsuvyaktaṃ vimucyediti nānyathā /
etadāhurmahāprājñāḥ sāṅkhyaṃ vai mokṣadarśanam //

svapakṣe kāraṇaṃ grāhyaṃ samarthaṃ vacanaṃ hitam /
śiṣṭānāṃ hi mataṃ grāhyaṃ tvadvidhaiḥ śiṣṭasammataiḥ //

pratyakṣahetavo yogāḥ sāṅkhyāḥ śāstraviniścayāḥ /
ubhe caite mate tattve mama tāta yudhiṣṭhira //

ubhe caite mate jñāne nṛpate śiṣṭasammate /
anuṣṭhite yathāśāstraṃ nayetāṃ paramāṃ gatim //

tulyaṃ śaucaṃ tayorekaṃ dayā bhūteṣu cānagha / vratānāṃ dhāraṇaṃ tulyaṃ darśanaṃ na samaṃ tayoḥ /
tayostu darśanaṃ samyaksūkṣmābhāve prasajyate //
yudhiṣṭhira uvāca /

yadi tulyaṃ vrataṃ śaucaṃ dayā cātra phalaṃ tathā /
na tulyaṃ darśanaṃ kasmāttanme brūhi pitāmaha //
bhīṣma uvāca /

rāgaṃ mohaṃ tathā snehaṃ kāmaṃ krodhaṃ ca kevalam /
yogācchittvā tato doṣānpañcaitānprāpnuvanti te //

yathā cānimiṣāḥ sthūlā jālaṃ chittvā punarjalam /
prāpnuvanti tathā yogāstatpadaṃ vītakalmaṣāḥ //

tathaiva vāgurāṃ chittvā balavanto yathā mṛgāḥ /
prāpnuyurvimalaṃ mārgaṃ vimuktāḥ sarvabandhanaiḥ //

lobhajāni tathā rājanbandhanāni balānvitāḥ /
chittvā yogātparaṃ mārgaṃ gacchanti vimalaṃ śivam //

abalāśca mṛgā rājanvāgurāsu yathā pare /
vinaśyanti na sandehastadvadyogabalādṛte //

balahīnāśca kaunteya yathā jālaṃ gatā jhaṣāḥ /
antaṃ gacchanti rājendra yogāstadvatsudurbalāḥ //

yathā ca śakunāḥ sūkṣmaṃ prāpya jālamarindama /
tatra saktā vipadyante mucyante ca balānvitāḥ //

karmajairbandhanairbaddhāstadvadyogāḥ parantapa /
abalā vai vinaśyanti mucyante ca balānvitāḥ //

alpakaśca yathā rājanvahniḥ śāmyati durbalaḥ /
ākrānta indhanaiḥ sthūlaistadvadyogo balaḥ prabho //

sa eva ca yadā rājanvahnirjātabalaḥ punaḥ /
samīraṇayutaḥ kṣipraṃ dahetkṛtsnāṃ mahīmapi //

tadvajjātabalo yogī dīptatejā mahābalaḥ /
antakāla ivādityaḥ kṛtsnaṃ saṃśoṣayejjagat //

durbalaśca yathā rājansrotasā hiyate naraḥ /
balahīnastathā yogo viṣayairhriyate'vaśaḥ //

tadeva ca mahāsroto viṣṭambhayati vāraṇaḥ /
tadvadyogabalaṃ labdhvā vyūhate viṣayānbahūn //

viśanti cāvaśāḥ pārtha yogādyogabalānvitāḥ /
prajāpatīnṛṣīndevānmahābhūtāni ceśvarāḥ //

na yamo nāntakaḥ kruddho na nṛtyurbhīmavikramaḥ /
īśate nṛpate sarve yogasyāmitatejasaḥ //

ātmanāṃ ca sahasrāṇi bahūni bharatarṣabha /
yogaḥ kuryādbalaṃ prāpya taiśca sarvairmahīṃ caret //

prāpnuyādviṣayānkaścitpunaścograṃ tapaścaret /
sankṣipecca punastāta sūryastetoguṇāniva //

balasthasya hi yogasya bandhaneśasya pārthiva /
vimokṣe prabhaviṣṇutvamupapannamasaṃśayam //

balāni yogaprāptāni mayaitāni viśāmpate /
nidarśanārthaṃ sūkṣmāṇi vakṣyāmi ca punastava //

ātmanaśca samādhāne dhāraṇāṃ prati vā vibho /
nidarśanāni sūkṣmāṇi śṛṇu me bharatarṣabha //

apramatto yathā dhanvī lakṣyaṃ hanti samāhitaḥ /
yuktaḥ samyaktathā yogī mokṣaṃ prāpnotyasaśayam //

snehapūrṇe yathā pātre mana ādhāya niścalam /
puruṣo yukta ārohetsopānaṃ yuktamānasaḥ //

yuktastathā'yamātmānaṃ yogaḥ ṣārthiva niścalam /
karotyamalamātmānaṃ bhāskaropamadarśanam //

yathā ca nāvaṃ kaunteya karṇadhāraḥ samāhitaḥ /
mahārṇavagatāṃ śīghraṃ nayetpārthiva pattanam //

tadvadātmasamādhānaṃ yuktvā yogena tatvavit /
durgamaṃ sthānamāpnoti hitvā dehamimaṃ nṛpa //

sārathiśca yathā yuktvā sadaśvānsusamāhitaḥ /
deśamiṣṭaṃ nayatyāśu dhanvinaṃ puruṣarṣabha //

tathaiva nṛpate yogī dhāraṇāsu samāhitaḥ /
prāpnotyāśu paraṃ sthānaṃ lakṣaṃ mukta ivāśugaḥ //

āveśyātmani cātmānaṃ yogī tiṣṭhati yocalaḥ /
pāpaṃ hanti punītānāṃ padamāpnoti so'jaram //

nābhyāṃ kaṇṭhe ca śīrṣe ca hṛdi vakṣasi pārśvayoḥ /
darśane śravaṇe cāpi ghrāṇe cāmitavikrama //

sthāneṣveteṣu yo yogī mahāvratasamāhitaḥ /
ātmanā sūkṣmamātmānaṃ yuṅkte samyagviśāmpate //

sa śīghramacalaprakhyaṃ karma dagdhyā śubhāśubham /
uttamaṃ yogamāsthāya yadīcchati vimucyate //
yudhiṣṭhira uvāca /

āhārānkīdṛśānkṛtvā kāni jitvā ca bhārata /
yogī balamavāpnoti tadbhavānvaktumarhati //
bhīṣma uvāca /

kaṇānāṃ bhakṣaṇe yuktaḥ piṇyākasya ca bhārata /
snehānāṃ varjane yukto yogī balamavāpnuyāt //

bhuñjāno yāvakaṃ rūkṣaṃ dīrghakālamarindam /
ekāhāro viśuddhātmā yogī balamavāpnuyāt //

pakṣānmāsānṛtūṃścaitānsaṃvatsarānahastathā /
apaḥ pītvā payomiśrā yogī balamavāpnuyāt //

akhaṇḍamapi vā māṃsaṃ satataṃ manujeśvara /
upoṣya samyakśuddhātmā yogī balamavāpnuyāt //

kāmaṃ jitvā tathā krodhaṃ śītoṣṇe varṣameva ca /
bhayaṃ śokaṃ tathā śvāsaṃ pauruṣānviṣayāṃstathā //

aratiṃ durjayāṃ caiva ghorāṃ tṛṣṇāṃ ca pārthiva /
sparśaṃ nidrāṃ tathā tandrīṃ durjayāṃ nṛpasattama //

dīpayanti mahātmānaḥ sūkṣmamātmānamātmanā /
vītarāgā mahāprajñā dhyānādhyayanasampadā //

durgastvepa mataḥ panthā brāhmaṇānāṃ vipaścitām /
na kaścidvrajati hyasminkṣemeṇa bharatarṣabha //

yathā kaścidvanaṃ ghoraṃ bahusarpasarīsṛpam /
śvabhravattoyahīnaṃ ca durgamaṃ bahukaṇṭakam //

abhakṣamaṭavīprāyaṃ dāvadagdhamahīruham /
panthānaṃ taskarākīrṇaṃ kṣemeṇābhipatedyuvā //

yogamārgaṃ tathā'sādya yaḥ kaścidvrajate dvijaḥ /
kṣemeṇoparamenmārgādbahudoṣo hi sa smṛtaḥ //

sustheyaṃ kṣuradhārāsu niśitāsu mahīpate /
dhāraṇāsu tu yogasya duḥstheyamakṛtātmabhiḥ //

vipannā dhāraṇāstāta nayanti na śubhāṃ gatim /
netṛhīnā yathā nāvaḥ puruṣānarṇave nṛpa //

yastu tiṣṭhati kaunteya dhāraṇāsu yathāvidhi /
maraṇaṃ janma duḥkhaṃ ca sukhaṃ ca sa vimuñcati //

nānāśāstreṣu niṣpannaṃ yogeṣvidamudāhṛtam /
paraṃ yogasya yatkṛtyaṃ niścitaṃ taddvijātiṣu //

paraṃ hi tadbrahmamayaṃ mahātma nbrahmāṇamīśaṃ varadaṃ ca viṣṇum /
bhavaṃ ca dharmaṃ ca ṣa़ḍānanaṃ ca ṣaṭ्brahmaputrāṃśca mahān्bhāvān //

tamaśca kaṣṭaṃ sumahadrajaśca satvaṃ viśuddhaṃ prakṛtiṃ parāṃ ca /
siddhiṃ ca devīṃ varuṇasya patnīṃ tejaśca kṛtsnaṃ sumahacca dhairyam //

tārādhipaṃ khe vimalaṃ satāraṃ viśvāṃśca devānuragānpitṛṃśca /
śailāṃśca kṛtsnānudadhīṃśca ghorā nnadīśca sarvāḥ savanānghanāṃśca //

nāgānnagānyakṣagaṇāndiśaśca gandharvasanghānpuruṣānstriyaśca /
parātparaṃ prāpya mahānmahātmā viśeta yogī nacirādvimuktaḥ //

kathā ca yeyaṃ nṛpate prasaktā deve mahāvīryatamau śubheyam /
yogī sa sarvānabhibhūya martyā nnārāyaṇātmā kurute mahātmā //