Mahabharata · Chapter 12.305

satyaṃ damaṃ kṣamāṃ prajñāṃ praśaṃsanti pitāmaha /
vidvāṃso manujā loke kathametanmataṃ tava //
bhīṣma uvāca /

atra te vartayiṣye'hamitihāsaṃ purātanam /
sādhyānāmiha saṃvādaṃ haṃsasya ca yudhiṣṭhira //

haṃso bhūtvā'tha sauvarṇastvajo nityaḥ prajāpatiḥ /
sa vai paryeti lokāṃstrīnatha sādhyānupāgamat //
sādhyā ūcuḥ /

śakune vayaṃ sma devā vai sādhyāstvāmanuyuṅkṣmahe /
pṛcchāmastvāṃ mokṣadharmaṃ bhavāṃśca kila mokṣavit //

śrutosi naḥ paṇḍito dhīravādī sādhuḥ śabdaścarate te patatrin /
kiṃ manyase śreṣṭhatamaṃ dvija tvaṃ kasminmanaste ramate mahātman //

tannaḥ kāryaṃ pakṣivara praśādhi yatkāryāṇāṃ manyase śreṣṭhamekam /
yatkṛtvā vai puruṣaḥ sarvabandhai rvimucyate vihagendreha śīghram //
haṃsa uvāca /

idaṃ kāryamamṛtāśāḥ śṛṇudhvaṃ tapo damaḥ satyamātmābhiguptiḥ /
granthīnvimucya hṛdayasya sarvā npriyāpriye svaṃ vaśamānayīta //

nārutudaḥ syānna nṛśaṃsavādī na hīnataḥ paramabhyādadīta /
yayā'sya vācā para udvijeta na tāṃ vadeduśatiṃ pāpalokyām //

vāksāyakā vadanānniṣyatanti yairāhataḥ śocati rātryahāni /
parasya nāmarmasu te patanti tānpaṇḍito nāvasṛjetpareṣu //

paraścedenamativādavāṇai rbhṛśaṃ vidhyecchama eveha kāryaḥ /
saṃroṣyamāṇaḥ pratihṛṣyate yaḥ sa ādatte sukṛtaṃ vai parasya //

kṣepāyamāṇamabhiṣaṅgavyalīkaṃ nigṛhṇāti jvalitaṃ yaśca manyum /
aduṣṭacetā mudito'nasūyuḥ sa ādatte sukṛtaṃ vai pareṣām //

ākruśyamāno na vadāmi kiñci tkṣamāmyahaṃ tāḍyamānaśca nityam /
śreṣṭhaṃ hyetadyatkṣamāmāhurāryāḥ satyaṃ tathaivārjavamānṛśaṃsyam //

vedasyopaniṣatsatyaṃ satyasyopaniṣaddamaḥ /
damasyopaniṣanmokṣa etatsarvānuśāsanam //

vāco vegaṃ manasaḥ krodhavegaṃ vidhitsāvegamudaropasthavegam /
etānvegānyo viṣahedudīrṇāṃ staṃ manye'haṃ brāhmaṇaṃ vai muniṃ ca //

akrodhanaḥ krudhyatāṃ vai viśiṣṭa stathā titikṣuratitikṣorviśiṣṭaḥ /
amānuṣānmānuṣo vai viśiṣṭa stathā'jñānājjñānavānvai viśiṣṭaḥ //

ākruśyamāno nākrośenmanyurevaṃ titikṣataḥ /
ākroṣṭāraṃ nirdahati sukṛtaṃ cāsya vindati //

yo nāyuktaḥ prāha rūkṣaṃ priyaṃ vā yo vā hato na pratihanti dhairyāt /
pāpaṃ ca yo necchati tasya hantu stasyeha devāḥ spṛhayanti nityam //

pāpīyasaḥ kṣametaiva śreyasaḥ sadṛśasya ca /
vimānito hatokruṣṭa evaṃ siddhiṃ gamiṣyati //

sadā'hamāryānnibhṛtopyupāse na me vidhitsotsahate na roṣaḥ /
na cāpyahaṃ lipsamānaḥ paraimi na caiva kiñcidviṣameṇa yāmi //

nāhaṃ śaptaḥ pratiśapāmi kañci ddamaṃ dvāraṃ hyamṛtasyeha vedmi /
guhyaṃ brahma tadidaṃ bravīmi na mānuṣācchreṣṭhataraṃ hi kiñcit //

nirmucyamānaḥ pāpebhyo ghanebhya iva candramāḥ /
virajāḥ kālamākāṅkṣandhīro dhairyeṇa sidhyati //

yaḥ sarveṣāṃ bhavati hyarcanīya utsecane stambha ivābhijātaḥ /
yasmai vācaṃ suprasannāṃ vadanti sa vai devāngacchati saṃyatātmā //

na tathā vaktumicchanti kalyāṇānpuruṣe guṇān /
yathaiṣāṃ vaktumicchanti nairguṇyamanuyuñjakāḥ //

yasya vāṅbhanasī gupte samyakpraṇihite sadā /
vedāstapaśca tyāgaśca sa idaṃ sarvamāpnuyāt //

ākrośanavimānābhyāṃ nābudhānbodhayedbudhaḥ /
tasmānna vardhayedanyaṃ na cātmānaṃ vihiṃsayent //

amṛtasyeva santṛpyedavamānasya paṇḍitaḥ /
sukhaṃ hyavamataḥ śete yo'vamantā sa naśyati //

yatkrodhano yajati yaddadāti yadvā tapastapyati yajjuhoti /
vaivasvatastaddharate'sya sarvaṃ moghaḥ śramo bhavati hi krodhanasya //

catvāri yasya dvārāṇi suguptānyamarottamāḥ /
upasthamudaraṃ hastau vākcaturthī sa dharmavit //

satyaṃ damaṃ hyārjavamānṛśaṃsyaṃ dhṛtiṃ titikṣāmabhisevamānaḥ /
svādhyāyanityo'spṛhayanyareṣā mekāntaśīlyūrdhvagatirbhavetsaḥ //

sarvāndedānanucaranvatsavaccaturaḥ stanān /
na pāvanatamaṃ kiñcitsatyādgadhyagamaṃ kvacit //

ācakṣe'haṃ manuṣyebhyo devebhyaḥ pratisañcaran /
satyaṃ svargasya sopānaṃ pārāvārasya nauriva //

yādṛśaiḥ saṃvivadate yādṛśāṃścopasevate /
yādṛgicchecca bhavituṃ tādṛgbhavati pūruṣaḥ //

yadi santaṃ sevati yadyasantaṃ tapasvinaṃ yadi vā stenameva /
vāso yathā rāgavaśaṃ prayāti tathā sa teṣāṃ vaśamabhyupaiti //

sadā devāḥ sādhubhiḥ saṃvadante na mānuṣaṃ viṣayaṃ yānti draṣṭum /
nenduḥ samaḥ syādasamo hi vāyu ruccāvacaṃ viṣayaṃ yaḥ sa veda //

aduṣṭaṃ vartamāne tu hṛdayāntarapūruṣe /
tenaiva devāḥ prīyante satāṃ mārgasthitena vai //

viśnodare ye niratāḥ sadaiva stenā narā vākyaruṣāśca nityam /
apetadharmāniti tānviditvā dūrāddevaḥ samparivarjayanti //

na vai devā hīnasatvena toṣyāḥ sarvāśinā duṣkṛtakarmaṇā vā /
satyavratā ye tu narāḥ kṛtajñā dharme ratāstaiḥ saha sambhajante //

avyāhṛtaṃ vyāhṛtācchreya āhuḥ satyaṃ vadedvyāhṛtaṃ taddvitīyam /
dharmyaṃ vadedvyāhṛtaṃ tattṛtīyaṃ priyaṃ vadedvyāhṛtaṃ taccaturtham //
sādhyā ūcuḥ /

kenāyamāvṛto lokaḥ kena vā na prakāśate /
kena tyajati mitrāṇi kena svargaṃ na gacchati //
haṃsa uvāca /

ajñānenāvṛto loko mātsaryānna prakāśate /
lobhāttyajati mitrāṇi saṅgātsvargaṃ na gacchati //
sādhyā ūcaḥ /

kaḥ svideko ramate brāhmaṇānāṃ kaḥ svideko bahubhirjoṣamāste /
kaḥ svideko balavāndurbalopi kaḥ svideṣāṃ kalahaṃ nānvavaiti //
haṃsa uvāca /

prājña eko ramate brāhmaṇānāṃ prājñaścaiko bahubhirjoṣamāste
prājña eko balavāndurbalo'pi prājña eṣāṃ kalahaṃ nānvabaiti //
sādhyā ūcuḥ /

kiṃ brāhmaṇānāṃ devatvaṃ kiñca sādhutvamucyate /
asādhutve ca kiṃ teṣāṃ kimeṣāṃ mānuṣaṃ matam //
haṃsa uvāca /

svādhyāya eṣāṃ devatvaṃ vrataṃ sādhutvamucyate /
asādhutvaṃ parīvādo mṛtyurmānuṣyamucyate //
bhīṣma uvāca /

ityuktvā paramo devo bhagavānnitya avyayaḥ /
sādhyairdevagaṇaiḥ sārdhaṃ divamevāruroha saḥ //

etadyaśasyamāyuṣyaṃ puṇyaṃ svargāya ca dhruvam / darśitaṃ devadevena parameṇāvyayena ca //

saṃvāda ityayaṃ śreṣṭhaḥ sādhyānāṃ parikīrtitaḥ /
kṣetraṃ vai karmaṇāṃ yoniḥ sadbhāvaḥ satyamucyate //