Mahabharata · Chapter 12.281

atraivodāharantīmamitihāsaṃ purātanam /
nāradasya ca saṃvādaṃ devalasyāsitasya ca //

āsīnaṃ devalaṃ vṛddhaṃ buddhvā buddhimatāṃ varam /
nāradaḥ paripapraccha bhūtānāṃ prabhavāpyayam //
nārada uvāca /

kutaḥ sṛṣṭamidaṃ viśvaṃ brahmansthāvarajaṅgamam /
pralaye ca kamabhyeti tadbhavānprabravītu me //
asita uvāca /

yebhyaḥ sṛjati bhūtāni kālo bhāvapracoditaḥ /
mahābhūtāni pañceti tānyāhurbhūtacintakāḥ //

tebhyaḥ sṛjati bhūtāni kāla ātmapracoditaḥ /
etebhyo yaḥ paraṃ brūyādasadbrūyādasaṃśayam //

viddhi nārada pañcaitāñśāśvatānacalāndhruvān /
mahatastejaso rāśīnkālaṣaṣṭhānsvabhāvataḥ //

āpaścaivāntarikṣaṃ ca pṛthivī vāyupāvakau /
asiddhiḥ parametebhyo bhūtebhyo muktasaṃśayam //

nopapattyā na vā yuktyā tvasadbrūyādasaṃśayam /
vetthaitānabhinirvṛttānṣaḍete yasya rāśayaḥ //

pañcaiva tāni kālaśca bhāvābhāvau ca kevalau /
aṣṭau bhūtāni bhūtānāṃ śāśvatāni bhavāvyayau //

abhāvabhāviteṣveva tebhyaśca prabhavantyapi /
vinaṣṭo'pyanutānyeva janturbhavati pañcadhā //

tasya bhūmimayo dehaḥ śrotramākāśasambhavam /
sūryāccakṣurasurvāyoradbhyastu khalu śoṇitam //

cakṣuṣī nāsikākarṇau tvak jihveti ca pa़ñcamī /
indriyāṇīndriyārthānāṃ jñānāni kavayo viduḥ //

darśanaṃ śravaṇaṃ ghrāṇaṃ sparśanaṃ rasanaṃ tathā /
upapattyā guṇānviddhi pañca pañcasu dhātuṣu //

rūpaṃ gandho rasaḥ sparśaḥ śabdaścaivātha tadguṇāḥ /
indriyairupalabhyante pañcadhā pañca pañcabhiḥ //

rūpaṃ gandhaṃ rasaṃ sparśaṃ śabdaṃ caivātha tadguṇān /
indriyāṇi na budhyante kṣetrajñastaistu budhyate //

cittamindriyasanghātātparaṃ tasmātparaṃ manaḥ /
manasastu parā buddhiḥ kṣetrajño buddhitaḥ paraḥ //

pūrvaṃ cetayate janturindriyairviṣayānpṛthak / vicārya manasā paścādatha buddhyā vyavasyati /
indriyairupasṛṣṭārthānmatvā yastvadhyavasyati //

cittamindriyasanghātaṃ mano buddhistathā'ṣṭamī /
aṣṭau jñānendriyāṇyāhuretānyadhyātmacintakāḥ //

pāṇiṃ pādaṃ ca pāyuṃ ca mehanaṃ pañcamaṃ mukham /
iti saṃśabdyamānāni śṛṇu karmendriyāṇyapi //

jalpanābhyavahārārthaṃ mukhamindriyamucyate /
gamanendriyaṃ tathā pādau karmaṇaḥ karaṇe karau //

pāyūpasthaṃ visargārthamindriye tulyakarmaṇī /
visarge ca purīṣasya visarge cāpi kāmike //

manaḥ ṣaṣṭhānyathaitāni vācā samyagyathāgamam /
jñānaceṣṭendriyaguṇāḥ sarveṣāṃ śabditā mayā //

indriyāṇāṃ svakarmabhyaḥ śramāduparamo yadā /
bhavatīndriyasannyāsādatha svapiti vai naraḥ //

indriyāṇāṃ vyuparame mano'vyuparataṃ yadi /
sevate viṣayāneva taṃ vidyātsvapnadarśanam //

sātvikāścaiva ye bhāvāstathā rājasatāmasāḥ /
karmayuktāḥ praśaṃsanti sātvikānnetarāṃstathā //

ānandaḥ karmaṇāṃ siddhiḥ pratipattiḥ parā gatiḥ /
sātvikasya nimittāni bhāvānsaṃśrayase smṛtiḥ //

jantuṣvekatameṣvevaṃ bhāvaṃ yo vā samāsthitaḥ /
bhāvayorīpsitaṃ nityaṃ pratyakṣaṃ gamanaṃ dvayoḥ //

indriyāṇi ca bhāvāśca guṇāḥ saptadaśa smṛtāḥ /
teṣāmaṣṭādaśo dehī yaḥ śarīre sa śāśvataḥ //

athavā saśarīrāste guṇāḥ sarve śarīriṇām /
saṃśritāstadviyoge hi saśarīrā na santi te //

athavā saṃvibhāgena śarīraṃ pāñcabhautikam / ekaśca daśa cāṣṭau ca guṇāḥ saha śarīriṇām /
ūṣmaṇā saha viśo vā sanghātaḥ pāñcabhautikaḥ //

mahānsandhārayatyetaccharīraṃ vāyunā saha /
satyaprabhāvayuktasya nimittaṃ dehabhedane //

tathaivotpadyate kiñcitpañcatvaṃ gacchate tathā / puṇyapāpavināśānte puṇyapāpasamīritaḥ /
dehaṃ viśati kālena tato'yaṃ karmasambhavam //

hitvāhitvā hyayaṃ praiti dehāddehaṃ kṛtāśrayaḥ /
kālasañcoditaḥ kṣetrī viśīrṇādvā gṛhādgṛham //

taṃ tu naivānutapyante prājñā niścitaniścayāḥ /
kṛpaṇāstvanutapyante janāḥ sambandhimāninaḥ //

na hyayaṃ kasyacitkaścinnāsya kaścana vidyate /
bhavatyeko hyayaṃ nityaṃ śarīre sukhaduḥkhakṛt //

naiva sañjāyate janturna ca jātu vipadyate /
yāti dehamayaṃ muktvā kadācitparamāṃ gatim //

puṇyapāpamayaṃ dehaṃ kṣapayankarmasankṣayāt /
kṣīṇadehaḥ punardehī brahmatvamupagacchati //

puṇyapāpakṣayārthaṃ hi sāṅkhyajñānaṃ vidhīyate /
tatkṣaye hṛdi paśyanti brahmabhāve parāṃ gatim //