Mahabharata · Chapter 12.280

mokṣaḥ pitāmahenokta upāyānnānupāyataḥ /
tamupāyaṃ yathānyāyaṃ śrotumicchāmi bhārata //
bhīṣma uvāca /

tvayyevaitanmahāprājña yuktaṃ nipuṇadarśanam /
yadupāyena sarvārthaṃ nityaṃ mṛgayase'nagha //

karaṇe ghaṭasya yā buddhirghaṭotpattau na sā matā /
evaṃ dharmābhyapāyeṣu nānyaddharmeṣu kāraṇam //

pūrve samudre yaḥ panthāḥ sa na gacchati paścimam /
ekaḥ panthā hi mokṣasya tanme vistarataḥ śṛṇu //

kṣamayā krodhamucchindyātkāmaṃ sankalpavarjanāt /
satvasaṃsevānaddhīro nidrāmucchettumarhati //

apramādādbhayaṃ rakṣecchvāsaṃ kṣetrajñaśīlanāt /
icchāṃ dveṣaṃ ca kāmaṃ ca dhairyeṇa vinivartayet //

bhramaṃ sammohamāvartamabhyāsādvinivartayet /
nidrāṃ cāpratibhāṃ caiva jñānābhyāsena tattvavit //

upadravāṃstathā rogānhitajīrṇamitāśanāt /
lobhaṃ mohaṃ ca santoṣādviṣayāṃstattvadarśanāt //

anukrośādadharmaṃ ca jayeddharmamavekṣayā /
āyatyā ca jayedāśāmarthaṃ saṅgavivarjanāt //

anityatvena ca snehaṃ kṣudhaṃ yogena paṇḍitaḥ /
kāruṇyenātmano mānaṃ tṛṣṇāṃ ca paritoṣataḥ //

utthānena jayettandrīṃ vitarkaṃ niścayājjayet /
maunena bahubhāṣāṃ ca śauryeṇa ca bhayaṃ jayet //

yacchedvāṅbhanasī buddhyā tāṃ yacchejjñānacakṣuṣā /
jñānamātmā mahānyacchettaṃ yacchejjñānamātmanaḥ //

tadetadupaśāntena boddhavyaṃ śucikarmaṇā /
yogadoṣānsamucchidyātpañca yānkavayo viduḥ //

kāmaṃ krodhaṃ ca lobhaṃ ca bhayaṃ svapnaṃ ca pañcamam /
parityajya niṣeveta tathemānyogasādhanān //

dhyānamadhyayanaṃ dānaṃ satyaṃ hrīrārjavaṃ kṣamā /
śaucamāhārataḥ śuddhirindriyāṇāṃ ca saṃyamaḥ //

etairvivardhate tejaḥ pāpmānamapahanti ca /
sidhyanti cāsya sankalpā vijñānaṃ ca pravartate //

dhūtapāpaḥ sa tejasvī ladhvāhāro jitendriyaḥ /
kāmakrodhau vaśe kṛtvā ninīṣedbrahmaṇaḥ padam //

amūḍhatvamasaṅgitvaṃ kāmakrodhavivarjanam /
adainyamanudīrṇatvamanudvego vyavasthitiḥ //

eṣa mārgo hi mokṣasya prasanno vimalaḥ śuciḥ /
tathā vākkāyamanasāṃ niyamaḥ kāmato'nyathā //