Mahabharata · Chapter 12.276

vedāḥ pramāṇaṃ lokānāṃ na vedāḥ pṛṣṭhataḥ kṛtāḥ /
dve brahmaṇī veditavye śabdabrahma paraṃ ca yat //

śabdabrahmaṇi niṣṇātaḥ paraṃ brahmādhigacchati /
śarīrametatkurute yadvede kurute tanum //

kṛtaśuddhaśarīro hi pātraṃ bhavati brāhmaṇaḥ /
ānantyamanucintyedaṃ karmaṇāṃ tadbrabīmi te //

nirāgamamanaitihyamatyakṣaṃ lokasākṣikam /
dharma ityeva ye yajñānvitanvanti nirāśiṣaḥ //

utpannatyāgino lubdhāḥ kṛpāsūyāvivarjitāḥ /
dhanināmeṣa vai panthāstīrtheṣu pratipādanam //

anāśritāḥ pāpakṛtyāḥ kadācitkarmayoginaḥ /
manaḥ sankalpasaṃsiddhā viśuddhajñānaniścayāḥ //

akrudhyanto'nasūyanto nirahankāramatsarāḥ /
jñānaniṣṭhāstriśuklāśca sarvabhūtahite ratāḥ //

āsangṛhasthā bhūyiṣṭhā apakrāntāḥ svakarmasu /
rājānaśca tathā yuktā brāhmaṇāśca yathāvidhi //

samā hyārjavasampannāḥ santuṣṭā jñānaniścayāḥ /
pratyakṣadharmāḥ śucayaḥ śraddadhānāḥ parāvare //

purastādbhāvitātmāno yathāvaccaritavratāḥ /
caranti dharmaṃ kṛcchre'pi durge caivāpi saṃhatāḥ //

saṃhatya dharmaṃ caratāṃ purā'sītsukhameva tat /
teṣāṃ nāsīdvidhātavyaṃ prāyaścittaṃ kathañcana //

satyaṃ hi dharmamāsthāya durādharṣatamā matāḥ /
na mātrāmanurudhyante na dharmacchalamantataḥ //

ya eva prathamaḥ kalpastamevātra caranmahān //

asyāṃ sthitau sthitānāṃ hi prāyaścittaṃ na vidyate /
yadā tu durbalātmānaḥ prāyaścittaṃ tadā bhavet //

eta evaṃvidhāḥ prāhuḥ purāṇā yajñavāhanāḥ /
traividyavṛddhāḥ śucayo vṛttavanto yaśasvinaḥ //

yajanto'haraharyajñairnirāśīrbandhanā budhāḥ /
teṣā yajñāśca vedāśca karmāṇi ca yathāgamam //

āgamāśca yathākāmaṃ sankalpāśca yathāvratam /
apetakāmakrodhānāṃ duścarācārakarmaṇām //

svakarmabhiḥ śaṃsitānāṃ prakṛtyā śaṃsitātmanām /
ṛjūnāṃ śamanityānāṃ sveṣu karmasu vartatām //

sarvamānantyamevāsīditi naḥ śāśvatāścutiḥ /
teṣāmadīnasatvānāṃ duścarācārakarmaṇām //

svakarmabhiḥ saṃsitānāṃ tapo ghoratvamāgatam /
saṃ sadācāramāścaryaṃ purāṇaṃ śāśvataṃ dhruvam //

aśaknuvadbhiścarituṃ kiñciddharmeṣu sūcitam /
nirāpaddharma ācāro hyapramādo'parābhavaḥ //

sarvavarṇeṣu yatteṣu nāsītkaścidvyatikramaḥ /
dharmamekaṃ catuṣpādamāśritāste narā vibho //

taṃ santo vidhivatprāpya gacchanti paramāṃ gatim /
gṛhebhya eva niṣkramya vanamanye samāśritāḥ //

gṛhamevābhisaṃśritya tato'nye brahmacāriṇaḥ /
vyastamekaṃ caturdhā tu brāhmaṇā āśramaṃ viduḥ //

sarve sarvatra tiṣṭhanto gacchanti paramāṃ gatim / eva evaṃvidhāḥ prāhuḥ purāṇā brahmacāriṇaḥ //

ta ete divi dṛśyante jyotirbhūtā dvijātayaḥ / nakṣatrāṇīva dhiṣṇyeṣu bahavastārakāgaṇāḥ /
ānantyamupasamprāptāḥ santoṣāditi vaidikam //

yadyāgacchanti saṃsāraṃ punaryoniṣu tādṛśāḥ /
na lipyante pārakṛtyaiḥ kadācitkarmayonitaḥ //

evameva brahmacārī śuśrūṣurghoraniścayaḥ /
evaṃyukto brāhmaṇaḥ syādanyo brāhmaṇako bhavet //

karmaiva puruṣasyāha śubhaṃ vā yadi vā'śubham /
evaṃ pakvakaṣāyāṇāmānantyena śrutena ca //

sarvamānantyamevāsīditi naḥ śāśvatī śrutiḥ /
teṣāmapetatṛṣṇānāṃ nirṇiktānāṃ śubhātmanām //

caturtha aupaniṣado dharmaḥ sādhāraṇaḥ smṛtaḥ /
saṃsiddhaiḥ sevyate nityaṃ brāhmaṇairniyatātmabhiḥ //

santoṣamūlastyāgātmā jñānādhiṣṭhānamucyate /
apavargamatirnityo yatidharmaḥ sanātanaḥ //

sādhāraṇaḥ kevalo vā yathābalamupāsyate / gacchante balinaḥ kṣemaṃ durbalo'trāvasīdati /
brāhmaṇaḥ padamanvicchansaṃsārānmucyate śuciḥ //
syūmaraśmiruvāca /

ye bhuñjate ye dadate yajante'dhīyate ca ye /
mātrābhirdharmalubdhābhirye vā tyāgaṃ samāśritāḥ //

eteṣāṃ pretyabhāve tu katamaḥ svargajittamaḥ /
etadācakṣva me brahmanyāthātathyena pṛcchataḥ //
kapila uvāca /

parigrahāḥ śubhāḥ sarve guṇato'bhyudayāśca te /
na tu tyāgasukhaṃ prāptā etattvamapi paśyasi //
syūmaraśmiruvāca /

bhavanto jñānaniṣṭhā vai gṛhasthāḥ karmaniścayāḥ /
āśramāṇāṃ ca sarveṣāṃ niṣṭhāyāmaikyamucyate //

ekatvena pṛthaktvena viśeṣo nānya ucyate /
tadyathāvadyathānyāyaṃ bhagavānprabravītu me //
kapila uvāca /

śarīrapaktiḥ karmāṇi jñānaṃ tu paramā gatiḥ /
pakve kaṣāyavijñānaṃ yathā jñānaṃ ca tiṣṭhati //

ānṛśaṃsyaṃ kṣamā śāntirahiṃsā satyamārjavam /
adroho'nabhimānaśca hrīstitikṣā śamastathā //

panthāno brahmaṇastveta etaiḥ prāpnoti yatparam /
tadvidvānanubuddhyeta manasā karmaniścayam //

yāṃ viprāḥ sarvataḥ śāntā viśuddhā jñānaniścayāḥ /
gatiṃ gacchanti santuṣṭāstāmāhuḥ paramāṃ gatim //

vedāṃśca veditavyaṃ ca viditvā ca yathāsthitim /
evaṃ vedavidityāhurato'nyo vātarecakaḥ //

sarvaṃ vidurvedavido vede sarvaṃ pratiṣṭhitam /
vede hi niṣṭhā sarvasya yadyadasti ca nāsti ca //

eṣaiva niṣṭhā sarvatra yattadasti ca nāsti ca /
etadantaṃ ca madhyaṃ ca saccā'sacca vijānataḥ //

samāptaṃ tyāga ityeva śama ityeva niścitam /
santoṣa ityanugatamapavarge pratiṣṭhitam //

ṛtaṃ satyaṃ viditaṃ veditavyaṃ sarvasyātmā sthāvaraṃ jaṅgamaṃ ca /
sarvaṃ sukhaṃ yacchivamuttaraṃ ca brahmāvyaktaṃ prabhavaścāvyayaṃ ca //

tejaḥ kṣamā śāntiranāmayaṃ śubhaṃ tathāvidhaṃ vyoma sanātanaṃ dhruvam /
etaiḥ śabdairgamyate buddhinetrai stasmai namo brahmaṇe brāhmaṇāya //