Mahabharata · Chapter 12.261

bhūtānāṃ guṇasaṅkhyānaṃ bhūyaḥ putra niśāmaya /
dvaipāyanamukhāddhaṣṭaṃ ślāghayā parayā'nagha //

dīptānalanibhaḥ prāha bhagavāndhūmavatsalaḥ /
tato'hamapi vakṣyāmi bhūyaḥ putra nidarśanam //

bhūmeḥ sthairyaṃ gurutvaṃ ca kāṭhinyaṃ prasavātmatā /
gandho bhāraśca śaktiśca sanghātaḥ sthāpanā dhṛtiḥ //

apāṃ śaityaṃ rasaḥ kledo dravatvaṃ snehasaumyatā /
jihvāvisyandanaṃ cāpi bhaumānāṃ śrapaṇaṃ tathā //

agnerdurdharṣatā jyotistāpaḥ pākaḥ prakāśanam /
śaucaṃ rāgo laghustaikṣṇyaṃ satataṃ cordhvabhāgitā //

vāyoraniyamasparśo vādasthānaṃ svatantratā /
balaṃ śaidhyaṃ ca mokṣaṃ ca karma ceṣṭātmatā bhavaḥ //

ākāśasya guṇaḥ śabdo vyāpitvaṃ chidratā'pi ca /
anāśrayamanālambamavyaktamavikāritā //

apratīghātitā caiva śrotatvaṃ vivarāṇi ca /
guṇāḥ pañcāśataṃ proktāḥ pañcabhūtavibhāvitāḥ //

phalopapattirvyaktiśca visargaḥ kalpanā kṣamā /
sadasaccāśutā caiva manaso nava vai guṇāḥ //

iṣṭāniṣṭavipattiśca vyavasāyaḥ samādhitā /
saṃśayaḥ pratipattiśca buddheḥ pañca guṇānviduḥ //
yudhiṣṭhira uvāca /

kathaṃ pañcaguṇā buddhiḥ kathaṃ pañcendriyā guṇāḥ /
etanme sarvamācakṣva sūkṣmajñānaṃ pitāmaha //
bhīṣma uvāca /

āhuḥ ṣaṣṭiṃ bhūtaguṇānvai bhūtaviṣaktānprakṛtivisṛṣṭān /
nityaviṣaktāṃścākṣarasṛṣṭā nputra na nityaṃ tadiha vadanti //

tatputracintākalilaṃ tadukta manāgataṃ vai tava sampratīha /
bhūtārthavattvaṃ tadavāpya sarvaṃ bhūtaprabhāvādbhava śāntabuddhiḥ //